ମହିଳା ମେକଅପ କର୍ମୀଙ୍କୁ ବଳାତ୍କାର ଉଦ୍ୟମ ; ସେଲୁନ ମାଲିକ ଗିରଫ

ନୂଆଦିଲ୍ଲୀ : ଉତ୍ତରପ୍ରଦେଶ ଗ୍ରେଟର ନୋଏଡା ନିକଟସ୍ଥ ଏକ ସେଲୁନରେ ଆଶ୍ଚର୍ଯ୍ୟଜନକ ଘଟଣା ଦେଖିବାକୁ ମିଳିଥିଲା। ଏହି ସେଲୁନରେ ଜଣେ ମହିଳା ମେକଅପ କର୍ମୀଙ୍କୁ ବଳାତ୍କାର ଉଦ୍ୟମ କରାଯାଇଥିଲା। ମିଳିଥିବା ସୂଚନା ଅନୁସାରେ, ପୀଡିତା ମହିଳା ଜଣକ ଏକ ମାସ ଧରି ଉକ୍ତ ସେଲୁନରେ ମେକଅପ କର୍ମୀ ଭାବରେ କାର୍ଯ୍ୟ କରୁଥିଲେ। ସେ ନିଜର ଭଉଣୀ ସହ ଶନିବାର ଦରମା ପାଇଁ ସେଲୁନକୁ ଯାଇଥିଲେ। ଏହି ସମୟରେ ସେଲୁନ ମାଲିକ ତାଙ୍କୁ ବଳାତ୍କାର ଉଦ୍ୟମ କରିଥିଲେ। କିନ୍ତୁ, ମହିଳା ଜଣକ ସେଠାରୁ ଖସି ପଳାଇବାକୁ ଚେଷ୍ଟା କରିବା ବେଳେ ସେଲୁନରେ ଥିବା ଅନ୍ୟ ପୁରୁଷ କର୍ମଚାରୀମାନେ ତାଙ୍କୁ କାବୁ କରି ପଟିଥିଲେ। ଏନେଇ ପୀଡିତା ଶନିବାର ଥାନାରେ ଏତଲା କରିଥିଲେ ମଧ୍ୟ ପୁଲିସ ଏହାକୁ ଗ୍ରହଣ କରିନଥିବା ପୀଡିତା ଅଭିଯୋଗ କରିଛନ୍ତି। ପରେ ସେ ମହିଳା ସହାୟକ ହେଲ୍ପଲାଇନ ନମ୍ବରରେ ଫୋନ କରିବା ପରେ ତାଙ୍କ ଏତଲା ଗ୍ରହଣ କରାଯାଇଥିଲା। ପୁଲିସ ଏହି ମାମଲାର ତଦନ୍ତ ଆରମ୍ଭ କରି ସେଲୁନ ମାଲିକକୁ ଗିରଫ କରିଛି। ଏହି ଘଟଣାରେ ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତମାନେ ଫେରାର ଅଛନ୍ତି। ଏହି ଘଟଣାର ଏକ ଭିଡିଓ ସାମଜିକ ଗଣମାଧ୍ୟମରେ ଭାଇରାଲ ହୋଇଛି।

Comments
Loading...