ଉତ୍ତରପ୍ରଦେଶରେ ବିଜେପିକୁ ଅଟକାଇପାରିଲାନି ମହାମେଣ୍ଟ !

ଲକ୍ଷ୍ନୌ: ଉତ୍ତରପ୍ରଦେଶରେ ବିଜେପି ନେତୃତ୍ଵାଧୀନ ଏନଡିଏକୁ ଅଟକାଇବାକୁ ସମାଜବାଦୀ ପାର୍ଟି ଏବଂ ବହୁଜନ ସମାଜ ପାର୍ଟି କଳବଳ କୌଶଳ ଲଗାଇ ଦେଇଥିଲେ। ବିଜେପିକୁ ମାତ୍‌ ଦେବାକୁ ଉଭୟ ଦଳ ମିଶି ମହାମେଣ୍ଟ ଗଠନ କରିଥିଲେ। କିନ୍ତୁ ଗେରୁଆ ଦଳକୁ ଅଟକାଇ ପାରିନାହିଁ ମହାମେଣ୍ଟ। ଅପରାହ୍ନ ୨ଟା ସୁଦ୍ଧା ରାଜ୍ୟରେ ୮୦ ଆସନରୁ ବିଜେପି ୫୪ ଆସନରେ ଆଗୁଆ ରହିଛି। ସେହିପରି ଏସପି-ବିଏସପି ମହାମେଣ୍ଟ ମାତ୍ର ୨୪ ଆସନରେ ଆଗୁଆ ରହିଛି। କଂଗ୍ରେସ ୨ଟି ଆସନରେ ଆଗରେ ରହିଛି।

ଉତ୍ତର ପ୍ରଦେଶର ବହୁ ଚର୍ଚ୍ଚିତ ଆମେଠି ଆସନରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କଠାରୁ ବିଜେପି ପ୍ରାର୍ଥୀ ସ୍ମୃତି ଇରାନୀ ୫ ହଜାରରୁ ଅଧିକ ଭୋଟରେ ଆଗୁଆ ରହିଛନ୍ତି। ସେହିପରି ରାଏବରେଲୀରେ ସୋନିଆ ଗାନ୍ଧୀ ଆଗୁଆ ଥିବାବେଳେ ବାରାଣସୀରେ ନରେନ୍ଦ୍ର ମୋଦୀ ଆଗରେ ଅଛନ୍ତି। ଏହାବ୍ୟତୀତ ଆଜମଗଡ଼ ଆସନରେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ଆଗୁଆ ରହିଛନ୍ତି।

Comments
Loading...