ରିଆତି ସିଧାସଳଖ ଚାଷୀଙ୍କ ଜମା ଖାତାକୁ ଯିବା ନିଷ୍ପତି ପାଇଁ ପ୍ରଧାନମନ୍ତ୍ରୀ ଓ କୃଷି ମନ୍ତ୍ରୀଙ୍କୁ ଧନ୍ୟବାଦ : ଧର୍ମେନ୍ଦ୍ର ପ୍ରଧାନ

କେନ୍ଦ୍ର କ୍ୟାବିନେଟର ଆଖୁଚାଷୀଙ୍କ ପାଇଁ ୩୫୦୦ କୋଟିର ସବସିଡି ମଞ୍ଜୁରକୁ କେନ୍ଦ୍ରମନ୍ତ୍ରୀଙ୍କ ସ୍ୱାଗତ

-ଭାରତବର୍ଷର ପ୍ରାୟ ୫ କୋଟି ଆଖୁଚାଷୀ ହେବେ ଉପକୃତ
-ଦେଶରେ ଚିନିର ଉତ୍ପାଦନ ବଢ଼ିବା ସହ ଅତିରିକ୍ତ ଇଥାନଲ ତିଆରି ହେବ
-ରୋଜଗାର ସୃଷ୍ଟି ହେବ ଏବଂ ଆଖୁ ଚାଷୀଙ୍କ ଆୟ ବୃଦ୍ଧି ପାଇବ

ନୂଆଦିଲ୍ଲୀ/ଭୁବନେଶ୍ୱର:  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ବୁଧବାର ବସିଥିବା କ୍ୟାବିନେଟ୍‍ ବୈଠକରେ ଆଖୁଚାଷୀଙ୍କ ପାଇଁ ୩୫୦୦ କୋଟି ଟଙ୍କାର ରିଆତି ମଞ୍ଜୁର ହେବା ଏବଂ ଏହି ରିଆତି ରାଶି ସିଧାସଳଖ ଚାଷୀଙ୍କ ବ୍ୟାଙ୍କ୍‍ ଖାତାକୁ ଯିବା ନିଷ୍ପତିକୁ  କେନ୍ଦ୍ର ବେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସ୍ୱାଗତ କରିଛନ୍ତି।
ଚାଷୀଙ୍କ ହିତରେ ନିଆଯାଇଥିବା ଗୁରୁତ୍ୱପୂର୍ଣ୍ଣ ନିଷ୍ପତି ପାଇଁ ଶ୍ରୀ ପ୍ରଧାନ ପ୍ରଧାନମନ୍ତ୍ରୀ ମୋଦୀ ଓ କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ନରେନ୍ଦ୍ର ସିଂହ ତୋମାରକୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି ଯେ କେନ୍ଦ୍ର କ୍ୟାବିନେଟର ନିଷ୍ପତି ଦ୍ୱାରା ଚିନି ରପ୍ତାନୀ ଉପରେ ଦିଆଯାଉଥିବା ସବସିଡ଼ି ଏବେ ସିଧା ଚାଷୀଙ୍କ ବ୍ୟାଙ୍କ୍‍ ଖାତାକୁ ଆସିବ। ଆଖୁ ଚାଷୀଙ୍କ ଜମା ଖାତାକୁ ସିଧାସଳଖ ୩ ହଜାର ୫୦୦ କୋଟି ପ୍ରଦାନ କରାଯିବା ଦ୍ୱାରା ଚାଷୀମାନଙ୍କର ଅନେକ ସମସ୍ୟାର ଅନ୍ତ ଘଟିବ ଏବଂ ସେମାନେ ଉପକୃତ ହୋଇପାରିବେ।

ଭାରତବର୍ଷର ପ୍ରାୟ ୫ କୋଟି ଆଖୁଚାଷୀ ଓ ଚିନି ମିଲ ଗୁଡିକରେ କାମ କରୁଥିବା କର୍ମଚାରୀମାନେ ଏହି ନିଷ୍ପତି ଫଳରେ ଉପକୃତ ହେବେ। ଚିନି ଆମଦାନୀରେ ସବସିଡ଼ି ମିଳିବା ଦ୍ୱାରା ଚିନି ଉତ୍ପାଦନ ବଢ଼ିବ, ଅତିରିକ୍ତ ଇଥାନଲ ତିଆରି କରାଯାଇ ପାରିବ। ଫଳରେ ରୋଜଗାର ସୃଷ୍ଟି ହେବ ଏବଂ ଆଖୁ ଚାଷୀଙ୍କ ଆୟ ବୃଦ୍ଧି ପାଇବ।
ସେହିପରି କେନ୍ଦ୍ର କ୍ୟାବିନେଟରେ ଡ଼ିଜିଟାଲ ଇଣ୍ଡିଆକୁ ତ୍ୱରାନ୍ୱିତ କରିବା ଦିଗରେ ସେକ୍ଟ୍ରମ ନିଲାମୀକୁ ମଞ୍ଜୁରି ଦିଆଯାଇଛି। ଏହାବ୍ୟତିତ ଭାରତର ଉତର ପୂର୍ବାଚଂଳର ପ୍ରଗତି ଓ ସମୃଦ୍ଧି ଦିଗରେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ କେନ୍ଦ୍ର କ୍ୟାବିନେଟ୍‍ ଉତର ପୂର୍ବାଞ୍ଚଳର ୬ଟି ରାଜ୍ୟ ପାଇଁ ଶକ୍ତି ବ୍ୟବସ୍ଥାର ଉନ୍ନତି ପ୍ରକଳ୍ପର ସଂଶୋଧିତ ମୂଲ୍ୟ ଆକଳନକୁ ଅନୁମୋଦନ କରିଛି। ଆନ୍ତରାଜ୍ୟ ସରବରାହ ଏବଂ ବିତରଣ ଭିତିଭୂମିକୁ ମଜବୁତ୍‍ କରିବା ଦିଗରେ ଏହି ନିଷ୍ପତି ଉତର ପୂର୍ବାଞ୍ଚଳରେ ଏକ ନିର୍ଭରଯୋଗ୍ୟ ବିଦ୍ୟୁତ ଗ୍ରୀଡ଼୍‍ ସୃଷ୍ଟି କରିବା ସହ ଅର୍ଥନୈତିକ ବିକାଶରେ ନୂଆ ସୁଯୋଗ ପାଇଁ ଦ୍ୱାର ଫିଟିବ ବୋଲି ସେ କହିଛନ୍ତି।

Comments are closed.