ନେତାଜୀ ଜୟନ୍ତୀରେ ସଂସ୍କୃତି ମନ୍ତ୍ରାଳୟର ସାଂସ୍କୃତିକ କାର୍ଯ୍ୟକ୍ରମ

ଭାରତ ସରକାରଙ୍କ ସଂସ୍କୃତି ମନ୍ତ୍ରଣାଳୟ ଅଧୀନ ଦକ୍ଷିଣ ମଧ୍ୟ କ୍ଷେତ୍ର ସାଂସ୍କୃତିକ କେନ୍ଦ୍ର, ନାଗପୁର ପକ୍ଷରୁ ‘ଏକ ଭାରତ ଶ୍ରେଷ୍ଠ ଭାରତ’ ଯୋଜନା ଅନ୍ତର୍ଗତ “ନେତାଜୀ ସୁଭାଷ ଚନ୍ଦ୍ର ବୋଷଙ୍କ ୧୨୫ତମ ଜନ୍ମ ବାର୍ଷିକୀ ସମାରୋହ” ଆୟୋଜିତ ହୋଇଯାଇଛି। ଏହି ଅବସରରେ କେନ୍ଦ୍ର ପେଟ୍ରୋଲିୟମ, ପ୍ରାକୃତିକ ବାଷ୍ପ ଓ ଇସ୍ପାତ ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ ନେତାଜୀଙ୍କ ଜନ୍ମସ୍ଥାନକୁ ଯାଇ ତାଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ପ୍ରଦାନ ପୂର୍ବକ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ଏହାପରେ ଶ୍ରୀ ପ୍ରଧାନ ସଂସ୍କୃତି ମନ୍ତ୍ରଣାଳୟ ଅଧିକାରୀଙ୍କ ସହ ମତ ବିନିମୟ କରିଥିଲେ ଓ ସାଂସ୍କୃତିକ କାର୍ୟ୍ୟକ୍ରମ ପରିସର ପରିଦର୍ଶନ କରିଥିଲେ।

ପୂର୍ବାହ୍ନ ୧୧ଟା ସମୟରେ ସାଂସ୍କୃତିକ କାର୍ୟ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ମହାରାଷ୍ଟ୍ର ନାଗପୁରର ବହୁଦେଶୀୟ ସାମାଜିକ ସଂସ୍ଥା ପ୍ରୟାସ ପକ୍ଷରୁ ନେତାଜୀଙ୍କ ଜୀବନୀ ଉପରେ ପ୍ରସ୍ତୁତ ନାଟକ ‘ବୋଷ’ ତଥା “ଦେଶଭକ୍ତି ସଙ୍ଗୀତର ରଙ୍ଗାରଙ୍ଗ କାର୍ୟ୍ୟକ୍ରମ” ଆୟୋଜନ କରାଯାଇଥିଲା। ସେହିପରି ଓଡ଼ିଆ କଳାକାରଙ୍କ ଦ୍ବାରା ଆକର୍ଷଣୀୟ ଲୋକନୃତ୍ୟ ଓ ଓଡ଼ିଆ ସଙ୍ଗୀତ କାର୍ୟ୍ୟକ୍ରମ ପରିବେଷଣ କରାଯାଇଥିଲା। ଏହି କାର୍ୟ୍ୟକ୍ରମରେ ବିଶିଷ୍ଟ ଅତିଥିମାନେ ଯୋଗଦେଇ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜୀବନାଦର୍ଶ ଉପରେ ବକ୍ତବ୍ୟ ରଖିଥିଲେ। ଶେଷରେ ଜାତୀୟ ସଙ୍ଗୀତ ଗାନ କରାଯିବା ପରେ ସାଂସ୍କୃତିକ କାର୍ୟ୍ୟକ୍ରମ ଶେଷ କରାଯାଇଥିଲା।

Comments
Loading...