ଭାରତୀୟ-ପ୍ରଶାନ୍ତ ମହାସାଗରରେ ମୁତୟନ ହେବ ବ୍ରିଟେନର ବିମାନବାହୀ ଯୁଦ୍ଧଜାହାଜ

ଅଷ୍ଟ୍ରେଲିଆର ଚେତାବନୀ: ବଢୁଛି ଯୁଦ୍ଧ ଆଶଙ୍କା

ନୂଆଦିଲ୍ଲୀ: ବ୍ରିଟେନର ବିମାନବାହୀ ଯୁଦ୍ଧଜାହାଜ ଭାରତୀୟ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ମୁତୟନ ହେବ। ବ୍ରିଟେନର ପ୍ରମୁଖ ଯୁଦ୍ଧଜାହାଜ ଏଚଏମଏସ କୁଇନ ଏଲିଜାବେଥ ନେତୃତ୍ୱରେ ଏକ ନୋୖଭେଳାକୁ ମୁତୟନ କରାଯିବ। ବ୍ରିଟେନର ବିମାନବାହୀ ଯୁଦ୍ଧ ଜାହାଜରେ ୧୮ ଏଫ-୩୫ବି ଶତ୍ରୁପକ୍ଷକୁ ମାତ୍‍ ଦେଉଥିବା ଲଢୁଆ ବିମାନ ସହିତ ଦୁଇଟି ବିଧ୍ୱଂସୀକାରୀ ଜାହାଜ, ଦୁଇଟି ସହାୟକ ଜାହାଜ ରହିବ। ଏଥିସହିତ ଆମେରିକା ନୋୖବାହିନୀର ଏକ ବିଧ୍ୱଂସୀକାରୀ ଯୁଦ୍ଧ ଜାହାଜ, ହଲାଣ୍ଡର ଏକ ଫ୍ରିଗେଟ, ଆମେରିକା ମେରିନ କର୍ପସ ଏଫ-୩୫ବି ଜେଟର ଏକ ସ୍କ୍ୱାଡ୍ରନ ଏଥିରେ ସାମିଲ ହେବ। ଏଗୁଡିକ ଦକ୍ଷିଣ ଓ ପୂର୍ବ ଚୀନ ସାଗର ଦେଇ ଭାରତୀୟ ପ୍ରଶାନ୍ତ ମହାସାଗର ଅଞ୍ଚଳକୁ ଯିବେ। ଏହି ଜାହାଜଗୁଡିକ ଭାରତ, ସିଙ୍ଗାପୁର, ଜାପାନ ଓ ଦକ୍ଷିଣ କୋରିଆ ଆଦି ରାଷ୍ଟ୍ରରେ ରହଣି କରିବେ ବୋଲି ବ୍ରିଟେନର ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଭାରତୀୟ ପ୍ରଶାନ୍ତ ମହାସାଗର ଅଞ୍ଚଳ ମୁଖ୍ୟତଃ ଭାରତ ମହାସାଗର ଏବଂ ଦକ୍ଷିଣ ଚୀନ ସାଗର ସମେତ ପଶ୍ଚିମ ଓ କେନ୍ଦ୍ରୀୟ ପ୍ରଶାନ୍ତ ମହାସାଗରକୁ ନେଇ ଗଠିତ। ଦକ୍ଷିଣ ଚୀନ ସାଗରରେ ଚୀନର ଆଞ୍ଚଳିକ ଅଧିକାର ଜାହିର ଏବଂ ଭାରତ ମହାସାଗର ଅଞ୍ଚଳକୁ ଏହାର ଅଗ୍ରସର ଉକ୍ତ ଅଞ୍ଚଳ ପ୍ରତି ବିପଦ ସୃଷ୍ଟିକରିଛି। ଚୀନ ଉଭୟ ଦକ୍ଷିଣ ଚୀନ ସାଗର ଏବଂ ପୂର୍ବ ଚୀନ ସାଗରରେ ଗତ କିଛିମାସ ହେଲା ତାହାର ସାମୁଦ୍ରିକ କାର୍ଯ୍ୟକଳାପ ବୃଦ୍ଧିକରିଛି। ଚୀନ-ଭାରତ ସମ୍ପର୍କ ତିକ୍ତ ହେବାପରେ ଉକ୍ତ ଅଞ୍ଚଳରେ ଆମେରିକାର ବର୍ଦ୍ଧିତ ଉପସ୍ଥିତିକୁ ଦୃଷ୍ଟିରେ ରଖି ଚୀନ ପକ୍ଷରୁ ଏଭଳି ପଦକ୍ଷେପ ନିଆଯାଉଛି।
ବ୍ରିଟେନର ଏଭଳି ଯୋଜନାକୁ ଜାପାନ ସ୍ୱାଗତ କରିଛି। ଜାପାନର ପ୍ରତିରକ୍ଷା ମନ୍ତ୍ରୀ କିଶି ନୋବୁଓ କହିଛନ୍ତି ଯେ ଉକ୍ତ ଅଞ୍ଚଳରେ ଶାନ୍ତି ଓ ସ୍ଥିରତାକୁ ପ୍ରୋତ୍ସାହିତ କରିବା ଦିଗରେ ବ୍ରିଟେନ ପ୍ରମୁଖ ଭୂମିକା ଗ୍ରହଣ କରିବା ନେଇ ସେ ପୂର୍ଣ୍ଣ ଆଶାବାଦୀ ଅଛନ୍ତି। ନିକଟରେ ଅଷ୍ଟ୍ରେଲିଆର ସ୍ୱରାଷ୍ଟ୍ର ବ୍ୟାପାର ବିଭାଗ ସେକ୍ରେଟାରୀ ତଥା ଜଣେ ଶୀର୍ଷସ୍ତରର ନିରାପତ୍ତା ଅଧିକାରୀ ମାଇକ ପେଜୁଲେ କହିଥିଲେ ଯେ ଉକ୍ତ ଅଞ୍ଚଳରେ ଯୁଦ୍ଧ ସମ୍ଭାବନା ବୃଦ୍ଧିପାଇବାରେ ଲାଗିଛି।

Comments
Loading...