ୱାଶିଂଟନ୍: ଚୀନର ଜିନ୍ଜିଆଙ୍ଗ ପ୍ରଦେଶରେ ବସବାସ କରୁଥିବା ଉଇଘର ମୁସଲମାନ ସମ୍ପ୍ରଦାୟ ପ୍ରତି ସରକାରଙ୍କ ଅତ୍ୟାଚାର ଓ ସେମାନଙ୍କର ମାନବାଧିକାର ଉଲ୍ଲଙ୍ଘନକୁ ନେଇ ପୁଣି ସ୍ବର ଉତ୍ତୋଳନ କରିଛି ଆମେରିକା। ଉଇଘରମାନଙ୍କ ବିରୋଧରେ ଚୀନ ସରକାର ନାନା କଟକଣା ଲାଗୁ କରିଥିବାବେଳେ ସେମାନଙ୍କର ଗଣସଂହାର ଭଳି କାର୍ୟ୍ୟକ୍ରମ ଚଳାଇଥିବା ଅଭିଯୋଗ ହୋଇଆସୁଛି। ସାନି ଅଭିଯୋଗ ଅନୁଯାୟୀ, ଚୀନ ସରକାର ଉଇଘର ମହିଳାମାନଙ୍କର ବଳପୂର୍ବକ ଗର୍ଭପାତ କରାଉଥିବାବେଳେ ସେମାନଙ୍କୁ ଜୋର୍ ଜବରଦସ୍ତ ଲଣ୍ଡା କରାଉଛନ୍ତି। ସେମାନଙ୍କ ଚୁଟିକୁ ନେଇ ବିଭିନ୍ନ ସାମଗ୍ରୀ ପ୍ରସ୍ତୁତିରେ ଉପଯୋଗ କରୁଛନ୍ତି। ବେଆଇନ ଭାବେ ଚାଲାଣ ହେଉଥିବା ଏଭଳି ବହୁ ଉତ୍ପାଦକୁ ଆମେରିକାରେ ଜବତ କରାଯାଉଛି।
ଆମେରିକାର ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ରବର୍ଟ ଓ’ବ୍ରିଏନ୍ କହିଛନ୍ତି ଯେ ଚୀନ ସରକାର ଉଇଘର ମୁସଲମାନଙ୍କ ଉପରେ ଏଭଳି ନିର୍ୟାତନା ଚଳାଇଛନ୍ତି ଯେ ତାହା ଗଣସଂହାରଠାରୁ କିଛି କମ୍ ନୁହେଁ। ଚୀନ ବିରୋଧରେ ସ୍ବର ଉତ୍ତୋଳନ କରୁଥିବା ଲକ୍ଷାଧିକ ଉଇଘର ଅଧିବାସୀଙ୍କୁ ସରକାର ବନ୍ଦୀ କରି ରଖିବା ସହ ନାନା ନିର୍ୟାତନା ଦେଉଛନ୍ତି; କିନ୍ତୁ ସେମାନଙ୍କ ଅଟକ ଶିବିରକୁ ଦକ୍ଷତା ବିକାଶ ତାଲିମକେନ୍ଦ୍ର ଭାବେ ବର୍ଣ୍ଣନା କରାଯାଉଛି। ହଂକଂରେ ଚାଲିଥିବା ଗଣତନ୍ତ୍ର ସପକ୍ଷ ଆନ୍ଦୋଳନକୁ ଦବାଇବା ପାଇଁ ଚୀନର ବଳପ୍ରୟୋଗ ସମ୍ପର୍କିତ ଏକ ଆଲୋଚନାଚକ୍ରରେ ଅଂଶଗ୍ରହଣ ପରିପ୍ରେକ୍ଷୀରେ ରବର୍ଟ କହିଛନ୍ତି ଯେ ଚୀନ ବିରୋଧରେ ବିଶ୍ବବାସୀ ଏକାଠି ହେବା ସହ ମାନବାଧିକାର ସୁରକ୍ଷା ପାଇଁ ଉଇଘର ଅଧିବାସୀଙ୍କ ସଂଗ୍ରାମକୁ ସମର୍ଥନ କରିବା ଉଚିତ। ଚୀନକୁ ଏକଘରକିଆ କରାଯିବାର ସମୟ ଆସିଛି। ନିକଟରେ ଆମେରିକା ବୈଦେଶିକ ସଚିବ ମାଇକ ପମ୍ପିଓ କହିଥିଲେ ଯେ ଚୀନ ସରକାର ବାଧ୍ୟକରି ଉଇଘର ମହିଳାଙ୍କର ଜନ୍ମ ନିୟନ୍ତ୍ରଣ ଅସ୍ତ୍ରୋପଚାର ଓ ଗର୍ଭପାତ କରାଉଛନ୍ତି।
Comments are closed.