ଉଦ୍ଧବ-କଙ୍ଗନା କଳି: ବ୍ୟକ୍ତିଗତ ସ୍ଥରରୁ ରାଜ୍ୟସ୍ଥରକୁ ଗଲାଣି ଆକ୍ଷେପ ପ୍ରତି ଆକ୍ଷେପ

ସୁଶାନ୍ତ ସିଂ ରାଜପୁତ ମୃତ୍ୟୁ ଘଟଣାରେ ଅଭିନେତ୍ରୀ କଙ୍ଗନା ରଣାୱତ ଦେଇଥିବା ବିବୃତ୍ତି ଉପରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଦଶହରା ରାଲିରେ କହିଛନ୍ତି ଯେ ହିମାଚଳ ପ୍ରଦେଶରେ ବହୁଳ ପରିମାଣରେ ଗଂଜେଇ ଚାଷ କରାଯାଉଛି। ଉଦ୍ଧବ ଯଦିଓ ସିଧାସଳଖ କଙ୍ଗନାଙ୍କ ନାଁ ନେଇ ନଥିଲେ କିନ୍ତୁ କହିଥିଲେ ଯେ ଯେଉଁମାନେ ମହାରାଷ୍ଟ୍ରକୁ ଗଂଜେଇ ବେପାରର ପେଣ୍ଠସ୍ଥଳୀ କହି ବଦନାମ କରିବାକୁ ଚେଷ୍ଟା କରୁଛନ୍ତି, ସେମାନେ ଜାଣିନାହାନ୍ତି ଯେ ସେମାନଙ୍କ ରାଜ୍ୟ ହିଁ ଏହାର ମୁଖ୍ୟ ପେଣ୍ଠସ୍ଥଳୀ। ମୁମ୍ବାଇ ପୁଲିସକୁ ସମର୍ଥନ କରି ସେ କହିଛନ୍ତି ଯେ ଯେଉଁମାନେ ନ୍ୟାୟ ପାଇଁ ଲୁହ ଝରାଉଥିଲେ ସେମାନେ ଏବେ କେଉଁଠି। ସେ କହିଛନ୍ତି, ଗଂଜେଇ ନୁହେଁ ଆମ ଘରେ ଆମେ ତୁଳସୀ ଗଛ ଲଗାଉ।

Just how beauty of Himalayas belongs to every Indian, opportunities that Mumbai offers too belongs to each one of us, both are my homes, Uddhav Thackeray don’t you dare to snatch our democratic rights and divide us, your filthy speeches are a vulgar display of your incompetence..

— Kangana Ranaut (@KanganaTeam) October 26, 2020

ଆଜି କଙ୍ଗନା ମଧ୍ୟ ଟ୍ଵିଟରରେ ପୋଷ୍ଟ କରି କହିଛନ୍ତି, ମୁଖ୍ୟମନ୍ତ୍ରୀ ତୁମେ ଜଣେ ଅତି କ୍ଷୁଦ୍ର ବ୍ୟକ୍ତି, ହିମାଚଳଙ୍କୁ ଦେବ ଭୁମି କୁହାଯାଏ କାରଣ ଏଠାରେ ସର୍ବାଧିକ ସଂଖ୍ୟକ ମନ୍ଦିର ଅଛି ଓ ଅପରାଧ ହାର ଶୂନ୍ୟ। ସେ କହିଛନ୍ତି ଯେ ହିମାଚଳ ହେଉଛି ଉର୍ବର ଜମିର ସହର ଯେଉଁଠି ସେଓ, କିୱି, ଡାଳିମ୍ବ ଓ ଷ୍ଟ୍ରବେରି ଭଳି ଫଳ ଫଳିଥାଏ। କଙ୍ଗନା ଆହୁରି ମଧ୍ୟ ଟ୍ୱିଟ କରିଛନ୍ତି ଯେ ହିମାଚଳର ସୌନ୍ଦର୍ଯ୍ୟ ପ୍ରତ୍ୟେକ ଭାରତୀୟଙ୍କର ଅଟେ, ମୁମ୍ବାଇ ମଧ୍ୟ ପ୍ରଦାନ କରୁଥିବା ସୁଯୋଗ ଆମ ପ୍ରତ୍ୟେକଙ୍କର ଅଟେ, ଉଭୟ ମୋର ଘର, ଉଦ୍ଧବ ଠାକରେ ଆପଣ ଆମର ଗଣତାନ୍ତ୍ରିକ ଅଧିକାର ଛଡ଼ାଇବାକୁ ଏବଂ ଆମକୁ ଭାଗ କରିବାକୁ ସାହସ କରନ୍ତୁ ନାହିଁ।