ଅଗ୍ନିକାଣ୍ଡରେ ଜଳିଗଲା ଦୁଇ ବଖରା

ବାଙ୍କୀ : ବାଙ୍କୀ ତହସିଲ ଅଧିନ କଦଳୀବାଡି ପଞ୍ଚାୟତର ମାଳବିହାରପୁର ଗ୍ରାମରେ ଅଗ୍ନିକାଣ୍ଡ ଘଟି ଭରତ ନାଏକଙ୍କର ଗୋଟିଏ ବଖରା ଓ ଆରତ ନାଏକଙ୍କର ଏକ ବଖରା ଚାଳ ଘର ମଙ୍ଗଳବାର ଅପରାହ୍ନରେ ପୋଡି ଜଳି ପାଉଁଶ ହୋଇଛି। ଅଗ୍ନିକାଣ୍ଡର କାରଣ ସମ୍ପର୍କରେ କିଛି ଜଣାପଡିନାହିଁ। ଅଗ୍ନିଶମ ବିଭାଗ ଖବର ପାଇ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ଏହି ଅଗ୍ନିକାଣ୍ଡରେ ପ୍ରଭାବିତ ପରିବାରଙ୍କର ଘରର ସମସ୍ତ ଆସବାବ ପତ୍ର ସହ ଦରକାରୀ କାଗଜପତ୍ର,ଧାନ ଚାଉଳ ଓ ଘରେ ସଞ୍ଚିତ ଥିବା ଅର୍ଥ ରାଶି ପୋଡିଯାଇଥିବା ବିପନ୍ନ ପରିବାର ପକ୍ଷରୁ ସୂଚନା ମିଳିଛି। ଉଭୟ ଦୀନମଜୁରିଆ ହୋଇଥିବାରୁ କ୍ଷୟକ୍ଷତି ନେଇ ଚିନ୍ତା ବଢିଛି। ସେହିପରି ଘରେ ପାଳିଥିବା ଛେଳି ମଧ୍ୟରୁ ୩ଟି ଛେଳି ସମ୍ପୂର୍ଣ୍ଣ ଦଗ୍ଧ ହୋଇ ବାହାରେ ପଡିଥିଲା ବେଳେ ୧ବର୍ଷରୁ ଦେଢ ବର୍ଷ ମଧ୍ୟରେ ଥିବା କେତେକ ଛେଳି ଛୁଆ ପାଉଁଶ ତଳେ ପୋଡିଯାଇଥିବା ଭରତ ଓ ଆରତ ନାଏକ ଆଶଙ୍କା କରିଛନ୍ତି। ଖବର ପାଇ ରତାଗଡ ଆରଆଇ ସୁଚିତ୍ରା ନାୟକ ଏବଂ ଏଆରଆଇ ପ୍ରସନ୍ନ ନାୟକ ଘଟଣା ସ୍ଥଳକୁ ଯାଇ ଅନୁସନ୍ଧାନ କରି ଫେରିଛନ୍ତି। ବୁଧବାର ଦିନ ସକାଳେ ବାଙ୍କୀ ତହସିଲ ପକ୍ଷରୁ ସରକାରୀ ସହାୟତା ବ୍ୟବସ୍ଥା କରାଯିବ ବୋଲି ଆରଆଇ କହିଛନ୍ତି। ସ୍ଥାନୀୟ ସରପଞ୍ଚ ପ୍ରକାଶ କୁମାର ବେଉରା ପହଞ୍ଚି ବିପନ୍ନ ପରିବାରଙ୍କୁ ସରକାରୀ ସହାୟତା ଯୋଗାଇ ଦେବା ପାଇଁ ଆରଆଇଙ୍କୁ ଅନୁରୋଧ କରିଛନ୍ତି।

Comments
Loading...