ଛତ୍ରପୁର: ସବୁ ବାପା-ମା’ ଙ୍କ ଇଛା ଥାଏ ସେମାନଙ୍କ ପୁଅ ଭଲ ଚାକିରିିଟିଏ କରୁ ଏବଂ ଶାନ୍ତିରେ ଜୀବନ ବିତାଉ। ବାପା-ମା’ଙ୍କ ଇଛା ପୂରଣ କରିବାକୁ ଯୁବସମାଜ ଚାକିରି ପଛରେ ଗୋଡାଇବା କିଛି ନୂଆକଥା ନୁହେଁ। ହେଲେ ଉଚ୍ଚ ଦରମାରେ ଚାକିରି କରିଥିବା ଗୋଟିଏ ପରିବାରର ଦୁଇ ଇଞ୍ଜିନିୟର ଭାଇ ଚାକରି ମୋହ ଛାଡି ଚାଷକୁ ଆପଣାର କରିବା ଭଳି ଏକ ଘଟଣା ଅନ୍ୟ ପାଇଁ ଉଦାହରଣ ହୋଇଛି। ଉଚ୍ଚ ଦରମାରେ ଦୁଇଭାଇ ଚାକିରି କରି ପରିବାର ପ୍ରତିପୋଷଣ କରୁଥିଲେ। ସେହି ଦୁଇଭାଇ କରୋନାକାଳରେ ଗ୍ରାମକୁ ଫେରି ନିଜ ଜମିରେ ପରିବା ଚାଷ କରି ନିଜେ ଆତ୍ମନିର୍ଭରଶୀଳ ହେବା ସହ ଅନ୍ୟ ଚାଷୀଙ୍କ ପାଇଁ ଉଦାହରଣ ପାଲଟିଛନ୍ତି। ଏପରିକି ଦୁହେଁ ସଫଳ ଚାଷୀ ଭାବେ ନିଜକୁ ପ୍ରମାଣିତ କରିବା ସହ ଅନ୍ୟ ପରିବାରକୁ ରୋଜଗାର ଯୋଗାଇବାରେ ସହାୟକ ସାଜିଛନ୍ତି। ସଫଳ ଚାଷୀ ଭାବେ ନିଜକୁ ପ୍ରତିପାଦନ କରିଥିବା ଉଚ୍ଚଶିକ୍ଷିତ ଦୁଇଭାଇ ହେଲେ ଛତ୍ରପୁର ବ୍ଲକ ବଉଳଗଁା ପଞ୍ଚାୟତ ଅନ୍ତର୍ଗତ ଦିବ୍ୟସିଂହପୁର ଗ୍ରାମର ରାଜେନ୍ଦ୍ର ଶତପଥୀଙ୍କ ଦୁଇ ଇଞ୍ଜିନିୟର ପୁଅ ପ୍ରଶାନ୍ତ ଓ ସୁବ୍ରତ ଶତପଥୀ।
ରାଜେନ୍ଦ୍ରଙ୍କ ବଡପୁଅ ପ୍ରଶାନ୍ତଙ୍କ ଯୋଗ୍ୟତା ଡିପ୍ଲୋମା ଇନ୍ କମ୍ପ୍ୟୁଟର ସାଇନ୍ସ । ଚେନ୍ନଇର ବିସାଲା କମ୍ପାନୀରେ ସେ କାମ କରୁଥିଲେ। ପରେ ସୁରୟା ଗୃପର ସୋଲାର ପ୍ରୋଜେକ୍ଟର ଓଡିଶା ମୁଖ୍ୟ ଭାବେ କାମ କରୁଥିଲେ। ତାଙ୍କ ସାନଭାଇ ସୁବତ୍ର ଶତପଥୀ ଏନଆଇଟି ଦିଲ୍ଲୀରୁ ଇଞ୍ଜିନିୟରିଂ ପାଠ ସାରିବା ପରେ ଅନୁଗୋଳରେ ଟାଟା ଷ୍ଟିଲ ବିଏସଏଲ ଲିମିଟେଡରେ ଇଞ୍ଜିନିୟର ଭାବେ ୨୦୦୯ରୁ ୨୦୨୦ ପର୍ଯ୍ୟନ୍ତ କାମ କରୁଥିଲେ। ଭଲ ଦରମା ମଧ୍ୟ ମିଳୁଥିଲା। କିନ୍ତୁ ଦୁଇ ଭାଇଙ୍କ ଚାକିରିରେ ମନ ଲାଗି ନଥିଲା। କରୋନା ସମୟରେ ଦୁଇଭାଇ ଚାକିରି ଛାଡି ଗ୍ରାମକୁ ଆସି ଯାଇଥିଲେ। ମନରେ ଥିବା ସଂକଳ୍ପକୁ ସାକାର ରୂପ ଦେବାକୁ ଗ୍ରାମରେ ନିଜର ଏକ ଏକର ଜମିରେ ପ୍ରଥମେ ବିଭିନ୍ନ ପ୍ରକାର ପନିପରିବା ଚାଷ ଆରମ୍ଭ କରିଲେ। ଦୁଇଭାଇ ଭଲ ଚାଷୀ ହେବା ସହ ୫ରୁ ୭ ପରିବାରକୁ ଦୈନିନ୍ଦିନ କାମ ଯୋଗାଇ ସେମାନଙ୍କ ପରିବାର ପାଇଁ ଆର୍ଥିକ ରୋଜଗାର ସୃଷ୍ଟି କରିପାରିଛନ୍ତି। ସରକାରୀ ସହାୟତା ମିଳିଲେ ପରିବା ଚାଷକୁ ଅଧିକ ସମ୍ପ୍ରସାରଣ କରିବା ସହ ଅଧିକ ଲୋକଙ୍କୁ ରୋଜଗାର ଯୋଗାଇପାରିବେ ବୋଲି ଦୁଇଭାଇ କହିଛନ୍ତି।
ଆଗକୁ ଗାଈ ଫାର୍ମ ଓ ଜିଆଖତ ଚାଷ କରିବାକୁ ଦୁଇଭାଇ ଲକ୍ଷ୍ୟ ରଖିଛନ୍ତି। ବିଦ୍ୟୁତ ସମସ୍ୟା କାରଣରୁ ପନିପରିବା ଚାଷକୁ ଜଳସେଚନ ଠିକ ଭାବେ ହୋଇପାରୁନି। ବିଦ୍ୟୁତ ସେବା ଠିକ୍ ହୋଇପାରିଲେ ଆହୁରି ଅଧିକରୁ ଅଧିକ କିସମର ପନିପରିବା ଚାଷ କରିପାରିବେ ବୋଲି ଦୁହେଁ କହିଛନ୍ତି। ଉନ୍ନତ ପ୍ରଣାଳୀ ମାଧ୍ୟମରେ ନର୍ସରୀ ବେଡ ତିଆରି କରି ସେଥିରୁ ଉନ୍ନତମାନର ଚାରା ଉପନ୍ନ କରି ଚାଷ କରିବା ଦ୍ୱାରା ଅଧିକ ଲାଭ ହୋଇଥାଏ ବୋଲି ସେମାନେ କହିଛନ୍ତି। ଦୁହିଁଙ୍କ ଏହି ଉନ୍ନତ କିସମର ଚାଷ ପ୍ରଣାଳୀ ଆଖପାଖ ଚାଷୀଙ୍କ ପାଇଁ ପ୍ରେରଣାଦାୟୀ ହୋଇଛି। ସରକାରୀ ଚାକିରି ଖଣ୍ଡେ ମଣିଷର ପରିବାର ପ୍ରତି ପୋଷଣରେ ସହାୟକ ହୋଇପାରେ, କିନ୍ତୁ ଜୀବନ ପାଇଁ ସବୁ କିଛି ନୁହେଁ। ମଣିଷକୁ ଆତ୍ମନିର୍ଭର ହେବାକୁ ହେଲେ ନିଷ୍ଠା ଓ ଚେଷ୍ଟା ସହ ଭଗବାନଙ୍କ ଆର୍ଶୀବାଦ ଜରୁରୀ। ମନରେ ଦ୍ୱନ୍ଦ୍ବ ନରଖି ବିଶ୍ୱାସର ସହ ଯେକୌଣସି କାମ ଆରମ୍ଭ କଲେ ମଣିଷ ନିଶ୍ଚୟ ସଫଳତା ପାଇବ ବୋଲି ଦୁହେଁ କହିଛନ୍ତି। ଦୁଇଭାଇଙ୍କ ଏଭଳି ମନଲୋଭା ପରିବା ଚାଷସ୍ଥଳକୁ ଛତ୍ରପୁର ବିଡିଓ ଅମ୍ବିକାପ୍ରସାଦ ଦାଶ ପରିଦର୍ଶନ କରି ଖୁସିବ୍ୟକ୍ତ କରିଥିଲେ। ସେମାନଙ୍କୁ ସମସ୍ତ ସୁବିଧା ଯୋଗାଇବାକୁ ବିଡିଓ ପ୍ରତିଶ୍ରୁତି ଦେଇଥିଲେ। ଦୁଇ ପୁଅ ଆଜି ସଫଳ ଚାଷୀ ଭାବେ ଉଭା ହୋଇଥିବାରୁ ସେ ବେଶ ଖୁସି ବୋଲି କହିଛନ୍ତି ମା’ ହରପ୍ରିୟା ଶତପଥୀ।
ଦୁଇଭାଇଙ୍କ ଏଭଳି ପ୍ରୟାସକୁ ଗଞ୍ଜାମ ଜିଲାପାଳ ଭୂୟସୀ ପ୍ରଶଂସା କରିଛନ୍ତି। ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ନିଜେ ଦୁଇଭାଇଙ୍କ ଚାଷଜମିକୁ ଯାଇ ଚାଷ ସ୍ଥିତି ନିରୀକ୍ଷଣ କରିଥିଲେ। ପ୍ରୋତ୍ସାହନ ମିଳିଲେ ସେମାନେ ଆହୁରି ଆଗକୁ ବଢି ଆଉ କିଛି ପରିବାରଙ୍କୁ ଦୈନିନ୍ଦିନ କାମ ଯୋଗାଇ ଦେବାରେ ସହାୟକ ହୋଇପାରିବେ ବୋଲି ଦୁଇଭାଇ ଜିଲାପାଳଙ୍କୁ କହିଥିଲେ। ଗୁହାଳ, ଗଭୀର କୂପ, ସୋପିଟ୍ ବ୍ୟବସ୍ଥା ସହ କୃଷି ବିଭାଗ ପକ୍ଷରୁ ସବସିଡରେ ସିଞ୍ଚନ ଯନ୍ତ୍ର, ପମ୍ପସେଟ୍, ଶକ୍ତିଚାଳିତ ଘାସକଟା ଯନ୍ତ୍ର, ଉଦ୍ୟାନ ବିଭାଗ ପକ୍ଷରୁ ଅନ୍ୟ ସୁବିଧା ସହ ବିଜୁଳି ବ୍ୟବସ୍ଥା କରାଯିବ ବୋଲି ଦୁଇ ଭାଇଙ୍କୁ ଜିଲାପାଳ ପ୍ରତିଶ୍ରୁତି ଦେଇଛନ୍ତି। ଜିଲାପାଳଙ୍କ ପରିଦର୍ଶନ ବେଳେ ବିଡିଓ ଅମ୍ବିକାପ୍ରସାଦ ଦାଶ, ଏଇଇ ନିରଞ୍ଜନ ପଣ୍ଡା, ଛତ୍ରପୁର ବିଦ୍ୟୁତ ବିଭାଗ ଏସଡିଓ ରାଜକିଶୋର ବଲ୍ଲଭ, କନିଷ୍ଠଯନ୍ତ୍ରୀ ସୁଧିରକୁମାର ଗୌଡ, ସହକାରୀ ଉଦ୍ୟାନ କୃଷି ଅଧିକାରୀ ସୌମ୍ୟ ପ୍ରିୟଦର୍ଶିନୀ, ସହକାରୀ କୃଷି ଅଧିକାରୀ ଗୋକୁଳଚନ୍ଦ୍ର ପ୍ରଧାନ ପ୍ରମୁଖ ଉପସ୍ଥିତ ଥିଲେ।
Comments are closed.