ଭୁବନେଶ୍ଵର: କରୋନା ଭୂତାଣୁ ସାରା ବିଶ୍ଵରେ ମହାମାରୀ ରୂପ ନେଇଛି। ଭାରତରେ ବି ପ୍ରତିଦିନ ଏହି ଭୂତାଣୁ ଦ୍ବାରା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। କରୋନାକୁ ପରାଜିତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୁଦ୍ଧ ଡାକରା ଦେବା ସହିତ ଦେଶରେ ୨ଟି ପର୍ଯ୍ୟାୟରେ ୪୦ ଦିନିଅ ଲକଡାଉନ ଲାଗୁ କରିଛନ୍ତି। ଓଡ଼ିଶାରେ ବି ଏହି ଲକଡାଉନକୁ ସଫଳ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଡ଼ା ପଦକ୍ଷେପ ନେଇଛନ୍ତି। ଫଳରେ ରାଜ୍ୟରେ ଏବେ କରୋନା ଭୂତାଣୁ ନିୟନ୍ତ୍ରଣାଧୀନ ରହିଛି। ରାଜ୍ୟ ପୁଲିସ ବିଭାଗ ପକ୍ଷରୁ ମଧ୍ୟ ଆପ୍ରାଣ ଉଦ୍ୟମ କରାଯାଉଛି। ଲକଡାଉନ ନିୟମ ଉଲ୍ଲଂଘନକାରୀଙ୍କୁ ପୁଲିସ ବାରମ୍ବାର ସଚେତନ କରାଉଛି। ଏହି ପରିପ୍ରେକ୍ଷୀରେ କରୋନା ହଟସ୍ପଟ ପାଲଟିଥିବା ରାଜଧାନୀ ଭୁବନେଶ୍ଵରରେ କମିଶନରେଟ ପୁଲିସ ଲୋକଙ୍କୁ ସଚେତନ କରାଇବାକୁ ଅଭିନବ ପ୍ରୟାସ ଆରମ୍ଭ କରିଛି। ଟ୍ରାଫିକ ଛକରେ ଟ୍ରାଫିକ କର୍ମଚାରୀ ଏବଂ ପୁଲିସ କର୍ମଚାରୀମାନେ ଗୀତ ଗାଇ ସଚେତନ କରାଉଛନ୍ତି। ରବିବାର ରାଜଧାନୀ ରାସ୍ତାରେ ଏଭଳି ଦୃଶ୍ୟ ଦେଖିବାକୁ ମିଳିଥିଲା। ପୁଲିସ କର୍ମଚାରୀ ଏବଂ କେତେଜଣ ସ୍ଵେଚ୍ଛାସେବୀ ହାତରେ ପ୍ଲାକାର୍ଡ ଧରି ଗୀତ ଗାଇ ସଚେତନତା ସୃଷ୍ଟି କରିଥିଲେ। ପୁଲିସର ଏହି ପ୍ରୟାସକୁ ବୁଦ୍ଧିଜୀବୀ ମହଲରେ ପ୍ରଶଂସା କରାଯାଇଛି।
Comments are closed.