ଟ୍ରାକ୍ଟର ଓଲଟି ଜଣେ ମୃତ, ଜଣେ ଗୁରୁତର

ଧର୍ମଗଡ : କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଜୟନ୍ତପୁର କନ୍ୟାଶ୍ରମ ନିକଟରେ ରାସ୍ତା କାମରେ ନିୟୋଜିତ ଏକ ଟ୍ରାକ୍ଟର ଓଲଟି ପଡିବାରୁ ଜଣଙ୍କର ମୃତ୍ୟୁ ହୋଇଥିବାବେଳେ ଜଣେ ଗୁରୁତର ହୋଇଥିବା ଜଣାପଡ଼ିଛି। ଆଉ ଦୁଇ ଜଣ ଶ୍ରମିକଙ୍କୁ ପ୍ରାଥମିକ ଚିକିତ୍ସା ପରେ ଛାଡି ଦିଆଯାଇଛି। ମୃତ ଶ୍ରମିକଙ୍କ ନାମ ଗଙ୍ଗାଧର ପୁଝାରୀ(୪୫), ଗୁରୁତର ଶ୍ରମିକ ଜଣଙ୍କ ମକରନ୍ଦ ପୁଝାରୀ। ମକରନ୍ଦଙ୍କ ଡାହାଣ ଗୋଡ ଭାଙ୍ଗି ଯାଇଛି। ତାଙ୍କୁ ଭବାନିପାଟଣା ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ସମସ୍ତ ଶ୍ରମିକ ନବରଙ୍ଗପୁର ଜିଲ୍ଲା ସେମଲା ଗାଁର ବୋଲି ଜଣାପଡିଛି।

ସୂଚନା ଅନୁସାରେ, ଏକ ଟ୍ରାକ୍ଟର ମେଟାଲ ନେଇ ଜୟନ୍ତପୁର ଆଶ୍ରମ ରାସ୍ତାରେ ଯିବାବେଳେ ଜୟନ୍ତପୁର କନ୍ୟାଶ୍ରମ ନିକଟରେ ଟ୍ରାକ୍ଟରର ଡାଲା ଓଲଟି ପଡିଥିଲା। ଶ୍ରମିକମାନେ ଡାଲାରେ ବସିଥିବାରୁ ଡାଲା ତଳେ ଚାପି ହୋଇ ରହିଗଲେ। ସ୍ଥାନିୟ ଲୋକେ ଗଛ ବଳା ସାହାଯ୍ୟରେ ସମସ୍ତ ଶ୍ରମିକଙ୍କୁ ବାହାର କରିଥିଲେ। ତେବେ ଘଟଣାସ୍ଥଳରେ ହିଁ ଜଣଙ୍କର ମୃତ୍ୟୁ ହୋଇଥିବାବେଳେ ଲୋକଙ୍କ ସାହାଯ୍ୟରେ ୧୦୮ ଆମ୍ବୁଲାନ୍ସ ଯୋଗେ ପ୍ରଥମେ ଧର୍ମଗଡ ଓ ପରେ ଭାବାନିପାଟଣା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଖବର ପାଇ କୋକସରା ପୁଲିସ ଘଟଣାସ୍ଥଳକୁ ଆସି ତଦନ୍ତ ଆରମ୍ଭ କରିଛି।

Comments
Loading...