ତିତ୍‍ଲିର କ୍ଷୟକ୍ଷତି ନେଇ ରାଜନାଥଙ୍କୁ ଭେଟିଲେ ଧର୍ମେନ୍ଦ୍ର

0

ଭୁବନେଶ୍ୱର :ରାଜ୍ୟରେ ସାମୁଦ୍ରିକ ଝଡ଼ ତିତ୍‍ଲିର କ୍ଷୟକ୍ଷତି ନେଇ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂହଙ୍କୁ ନୂଆଦିଲ୍ଲୀଠାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସାକ୍ଷାତ ଆଲୋଚନା କରିଥିବା ନେଇ ଟ୍ୱିଟ୍‍ ଯୋଗେ ସୂଚନା ଦେଇଛନ୍ତି। ଓଡ଼ିଶାର ଏହି ପ୍ରାକୃତିକ ବିପର୍ଯ୍ୟୟ ସମୟରେ ନ୍ୟାସ୍‍ନାଲ ଡିଜାଷ୍ଟର ରେସପନ୍ସ ଫୋର୍ସ(ଏନଡିଆରଏଫ୍‍)ସକ୍ରିୟତାର ସହିତ କାର୍ଯ୍ୟ କରିଥିବାରୁ ଶ୍ରୀ ପ୍ରଧାନ ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ସିଂହଙ୍କୁ ଧନ୍ୟବାଦ ଦେଇଥିଲେ। ଏହି ଅବସରରେ ଶ୍ରୀ ସିଂହ ରାଜ୍ୟର ଆବଶ୍ୟକତା ଅନୁସାରେ ବିପର୍ଯ୍ୟୟ ପରିଚଳନା ସମେତ ପୁନଃ ନିର୍ମାଣ ଓ ପୁନଃ ଥଇଥାନ କାମରେ କେନ୍ଦ୍ର ସବୁ ପ୍ରକାର ସାହାଯ୍ୟ ସହଯୋଗ ଯୋଗାଇ ଦେବ ବୋଲି ପ୍ରତିଶ୍ରୁତି ଦେଇଥିବା ଶ୍ରୀ ପ୍ରଧାନ ଦର୍ଶାଇଛନ୍ତି। ଦୁର୍ଗାପୂଜାର ଅବ୍ୟବହିତ ପୂର୍ବରୁ ମା’ଦୁର୍ଗା ଓ ମହାପ୍ରଭୁ ଶ୍ରୀଜଗନ୍ନାଥଙ୍କର ଅପାର କରୁଣା ଯୋଗୁଁ ସାମୁଦ୍ରିକ ଝଡ଼ ତିତ୍‍ଲି ଓଡ଼ିଶାରେ ଅଧିକ କ୍ଷୟ କ୍ଷତି କରିନାହିଁ। ବାତ୍ୟାର ପ୍ରକୋପ ନଥିଲେ ମଧ୍ୟ ଆଗାମୀ ଦୁଇ ଦିନ ଧରି ରାଜ୍ୟର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ଥିବାରୁ ଜନସାଧାରଣ ସତର୍କ ରହିବାକୁ ଶ୍ରୀ ପ୍ରଧାନ ଅନୁରୋଧ କରିଛନ୍ତି।

Comments
Loading...