ଟିଟିଲାଗଡ ବିଡିଓଙ୍କୁ ଆକ୍ରମଣ ଘଟଣା, ସୁରକ୍ଷା ପ୍ରତିଶୃତି ପରେ ଧାରଣା ଉଠିଲା

ଟିଟିଲାଗଡ: ଟିଟିଲାଗଡ ବିଡିଓ ନବୀନ ଚନ୍ଦ୍ର ନାୟକଙ୍କୁ ଆକ୍ରମଣ ଘଟଣାକୁ ନେଇ ବ୍ଲକ କର୍ମଚାରୀଙ୍କ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ କଲମ ଛାଡ ଆନ୍ଦୋଳନ ଆଜି ପ୍ରତ୍ୟାହୃତ ହୋଇଛି। ସୁଚନା ଯେ ଗତ ୨୨ରେ ବିଡିଓଙ୍କୁ ତାଙ୍କ କାର୍ଯ୍ୟାଳୟ ପ୍ରକୋଷ୍ଠରେ ବିଜେପି ନେତା କୁନା ଭାଟି ଆକ୍ରମଣ କରିଥିବା ଅଭିଯୋଗ ହୋଇଥିଲା। ଏହାକୁ ନେଇ ଦୋଷୀ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଏବଂ କର୍ମଚାରୀ ତଥା ବ୍ଲକକୁ ନିତ୍ୟ ଆସୁଥିବା ପଞ୍ଚାୟତ ସ୍ତରୀୟ ଲୋକପ୍ରତିନିଧିଙ୍କ ସୁରକ୍ଷା ଦାବିରେ ବ୍ଲକ କର୍ମଚାରୀ ଆନ୍ଦୋଳନକୁ ଓହ୍ଲାଇଥିଲେ। ଆଜି ଆନ୍ଦୋଳନର ଦ୍ୱିତୀୟ ଦିବସରେ ମଧ୍ୟ ବିଡିଓ ଶ୍ରୀ ନାୟକ, ଅତିରିକ୍ତ ବିଡିଓ ମହେନ୍ଦ୍ର ପ୍ରଧାନୀ, ବ୍ଲକ ସରପଞ୍ଚ ସଂଘ, ସମିତି ସଭ୍ୟ ତଥା ସମସ୍ତ ପଂଚାୟତ ଏବଂ ବ୍ଲକ କର୍ମଚାରୀ ବ୍ଲକ କାର୍ଯ୍ୟାଳୟ ସମ୍ମୁଖରେ କଲମ ଛାଡ ଆନ୍ଦୋଳନ ଜାରି ରଖିଥିଲେ। ଏନେଇ ଟିଟିଲାଗଡ ଏସଡିପିଓ ସୁରେନ୍ଦ୍ରନାଥ ଶପତଥି ବ୍ଲକ କାର୍ଯ୍ୟାଳୟକୁ ଆସି ଅଭିଯୁକ୍ତର କୋଭିଡ ଟେଷ୍ଟ ପରେ କୋର୍ଟ ଚାଲାଣ କରାଯାଇଥିବା ସୁଚନା ଦେବା ସହ ବ୍ଲକ କାର୍ଯ୍ୟାଳୟରେ ଆଗାମୀ ଦିନରେ ଏଭଳି ଅପ୍ରିତିକର ପରିସ୍ଥିତି ଏଡାଇବା ପାଇଁ ସୁରକ୍ଷା ବ୍ୟବସ୍ଥା କରାଯିବ ବୋଲି ସୁଚିତ କରିଥିଲେ। ପରେ ଆନ୍ଦୋଳନ ପ୍ରତ୍ୟାହାର ହୋଇଛି।

Comments
Loading...