ପୁଲିସର ରକ୍ତଦାନ ପ୍ରସ୍ତୁତି, ଭିଡିଓ କଲ ଜରିଆରେ ସହଯୋଗ ଲୋଡିଲେ ଏସପି

ଟିଟିଲାଗଡ଼ : ମହାମାରୀ ସଂକ୍ରମଣ ଭୟ ନେଇ ରକ୍ତଦାତା ସତର୍କତା ଅବଲମ୍ବନ କରୁଥିବା ନେଇ ରକ୍ତଭଣ୍ଡାର ଗୁଡିକ ଖାଲି ପଡୁଛି। ଏପରିପ୍ରେକ୍ଷୀରେ ବଲାଙ୍ଗୀର ଜିଲା ପୁଲିସ ପ୍ରଶାସନ ଏକ ଭିନ୍ନ ଭୂମିକାରେ ଅବତୀର୍ଣ୍ଣ ସହ ରକ୍ତଦାନ ଭଳି ମହତ କାର୍ୟ୍ୟକ୍ରମ ଆରମ୍ଭ କରିଛି। ଏପରିପ୍ରେକ୍ଷୀରେ ମଙ୍ଗଳବାର ଟିଟିଲାଗଡ ଏସଡିପିଓ ସୁରେନ୍ଦ୍ରନାଥ ଶତପଥିଙ୍କ ଅଧ୍ୟକ୍ଷତାରେ ଟିଟିଲାଗଡ ଥାନା ପରିସରରେ ପୁଲିସ ପକ୍ଷରୁ ମେଗା ରକ୍ତଦାନ ଶିବିର ଆୟୋଜନ ନେଇ ଏକ ପ୍ରସ୍ତୁତି ବୈଠକ ଆୟୋଜିତ ହୋଇଯାଇଛି।

କାର୍ଯ୍ୟକ୍ରମରେ ବଲାଙ୍ଗୀର ଏସପିଙ୍କ ପ୍ରତିନିଧି ଭାବରେ ବଲାଙ୍ଗୀର ଗୃହରକ୍ଷୀ ବାହିନୀ ଆସିଷ୍ଟାନ୍ତ କମାଣ୍ଡେନ୍ଟ କୁମୁଦ ସେଠ, ରିଜର୍ଭ ଇନ୍ସପେକ୍ଟର ଆତିଶ ସାହୁ ଯୋଗଦେଇ ଉପସ୍ଥିତ ସହରର ବିଭିନ୍ନ ସଂଗଠନର କର୍ମକର୍ତାଙ୍କ ସହ ଆଲୋଚନା କରିଥିଲେ। ସର୍ବସମ୍ମତି କ୍ରମେ ଆସନ୍ତା ୨୫ରେ ଶିବିର ଆୟୋଜନ ପାଇଁ ସ୍ଥିର କରାଯାଇଛି। ଏନେଇ ଗଣମାଧ୍ୟମ, ବ୍ୟାନର, ଡାକବାଜି ଯନ୍ତ୍ର ଯୋଗେ ପ୍ରଚାର ପ୍ରସାର ସହ ଅଧିକରୁ ଅଧିକ ରକ୍ତ ସଂଗ୍ରହ ପାଇଁ ସ୍ଥିର ହୋଇଥିଲା। ବୈଠକ ସମୟରେ ବଲାଙ୍ଗିର ଏସପି ଏମ. ସନ୍ଦୀପ ସମ୍ପଦ ଭିଡିଓ କଲ ଜରିଆରେ ଉପସ୍ଥିତ ବିଭିନ୍ନ ସଂଗଠନର କର୍ମକର୍ତାଙ୍କ ସହ କଥାବାର୍ତା ସହ ଶିବିରକୁ ସଫଳ କରିବା ପାଇଁ ସହଯୋଗ ଲୋଡିଥିଲେ। ରାଜ୍ୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ମନ୍ତ୍ରୀ ଟୁକୁନୀ ସାହୁଙ୍କ ପ୍ରତିନିଧି ଅରୁଣ ମିଶ୍ର, ବରିଷ୍ଠ ସମାଜସେବୀ ରାଜୁ ମିଶ୍ର, ଅଲେଖ ଦଳବେହେରା, ପୂର୍ବ କାଉନସିଲର କୃଷ୍ଣଚନ୍ଦ୍ର ସରାଫ, ମାରୱାଡି ଯୁବା ମଂଚ ରାଷ୍ଟ୍ରୀୟ ଉପସଭାପତି ରିଙ୍କୁ ଅଗ୍ରୱାଲ, ରାଜ୍ୟ ସରପଂଚ ସଂଘ କାର୍ଯ୍ୟକାରୀ ସଭାପତି ହରିନାରାୟଣ ମିଶ୍ର, ଜିଲା ସାଧାରଣ ସମ୍ପାଦକ ବିରବର ସାହୁ, ଏସଏସମ ଫିଟନେସ ଅଧ୍ୟକ୍ଷ ସନ୍ତୋଷ ମହାନ୍ତି, ଟିଟିଲାଗଡ ରକ୍ତଦାତା ସଂଘ ସଭାପତି ବନମାଲି ବେହେରାଙ୍କ ସମେତ ବହୁ ସ୍ୱେଚ୍ଛାସେବୀ ଉପସ୍ଥିତ ଥିଲେ।

Comments
Loading...