ଭୁବନେଶ୍ୱର /କଟକ .- ଭୀଷଣ ସାମୁଦ୍ରିକ ବାତ୍ୟା ତିତଲି ଏବେ ସ୍ଥଳଭାଗର ନିକଟତର ହୋଇଛି ଗୋପାଳ ପୁରଠାରୁ ଏହା ବୁଧବାର ରାତି ସୁଦ୍ଧା ୧୬୦ କିଲୋମିଟର ରହିଥିଲା । ରାତି ଦଶଟା ତିରିଶ ସମୟରେ ଗୋପାଳପୁର ସମୁଦ୍ରକୂଳରେ ପବନର ବେଗ ୧୦୦ କିଲୋମିଟରରେ ପହଞ୍ଚିଛି । ଗୁରୁବାର ଭୋର୍ ୫ଟା୩୦ ସୁଦ୍ଧା ଏହା ସ୍ଥଳ ଭାଗକୁ ସ୍ପର୍ଶ କରିପାରେ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ବାତ୍ୟା ତିତଲି ସମୁଦ୍ର ମଧ୍ୟରେ ଘଣ୍ଟାକୁ ୧୮ କିଲୋମିଟର ବେଗରେ ଆଗକୁ ବଢୁଛି । ଏହାର ପ୍ରଭାବରେ ୧୪୫ରୁ ୧୬୫ କିଲୋମିଟର ବେଗରେ ପବନ ବହିପାରେ ବୋଲି ଆଶଙ୍କା କରାଯାଉଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଧବାର ସନ୍ଧ୍ୟା ସମୟରେ ସ୍ୱତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟରେ ବାତ୍ୟା ମୁକାବିଲା ପାଇଁ ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପର ସମୀକ୍ଷା କରିଥିଲେ । ବାତ୍ୟାକୁ ଦୃଷ୍ଟିରେ ରଖି ସମୁଦ୍ରକୂଳ ଅଞ୍ଚଳରୁ ପ୍ରାୟ ୩ ଲକ୍ଷ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଏଥିରେ କେହିଁ ମୃତାହତ ନ ହୁଅନ୍ତୁ ସେଥିପାଇଁ ବିଶେଷ ଦୃଷ୍ଟି ଦିଆଯାଉଥିବା ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି ।