ଚେନ୍ନାଇ : ଭାରତର ଲୋକପ୍ରିୟ ଭିଡିଓ ଆପ୍ ଟିକ୍ ଟକ୍ ଉପରେ ଲାଗିଥିବା ପ୍ରତିବନ୍ଧକ ମାଡ୍ରାସ୍ ହାଇକୋର୍ଟ ହଟାଇ ଦେଇଛନ୍ତି। ଗତ ଏପ୍ରିଲ ୪ରେ ମାଡ୍ରାସ୍ ହାଇକୋର୍ଟର ମଦୁରାଇ ବେଞ୍ଚ ଏହି ଆପ ଉପରେ ପ୍ରତିବନ୍ଧକ ଜାରି କରିଥିଲେ। ପ୍ରାୟ ୧ ସପ୍ତାହ ପରେ ଗୁଗୁଲ ପ୍ଲ-ଷ୍ଟୋର ଏବଂ ଆପ୍ ଷ୍ଟୋରକୁ ଏହି ଆପ ପୁଣି ଫେରିଆସିଛି। ଗତ ବୁଧବାର ମାଡ୍ରାସ୍ ହାଇକୋର୍ଟ ଏହି ମାମଲା ସମ୍ପର୍କିତ ଟିକ୍ ଟକ୍ ର ସତ୍ୟପାଠ ଗ୍ରହଣ କରିଥିଲେ। ପରେ ଏହି ଆପ୍ ଉପରୁ ପ୍ରତିବନ୍ଧକ ହଟାଇ ଦିଆଯାଇଛି। ଟିକ ଟକ୍ ଆପରେ ଅଶ୍ଳୀଳ ଭିଡିଓ ଅପଲୋଡ ଏବଂ ସମାଜକୁ ଅଶ୍ଳୀଳ ବାର୍ତ୍ତା ଯାଉଥିବା ଅଭିଯୋଗ ହୋଇଥିଲା। ପରେ ଟିକ ଟକ୍ ଆପ ଉପରେ କଟକଣା ଜାରି କରିବା ପାଇଁ ମାଦ୍ରାସ ହାଇକୋର୍ଟଙ୍କ ମଦୁରାଇ ବେଞ୍ଚ କେନ୍ଦ୍ର ସରକାରଙ୍କୁ ନିର୍ଦେଶ ଦେଇଥିଲେ। ଏନେଇ କୋର୍ଟରେ ଏକ ଜନହିତକର ମାମଲା ଦାଖଲ ହେବା ପରେ ଏହି ଆପ୍ ଉପରେ ପ୍ରତିବନ୍ଧକ ଲଗାଯାଇଥିଲା। ମାଡ୍ରାସ ହାଇକୋର୍ଟ ଏହା ଉପରେ ପ୍ରତିବନ୍ଧକ ଲଗାଇବା ସହ ଭାରତ ସରକାର ଗୁଗଲ ଏବଂ ଆପଲ କମ୍ପାନୀକୁ ନିଜ ନିଜର ପ୍ଲେ ଷ୍ଟୋରରୁ ଟିକ୍ ଟକ୍ ଆପ୍କୁ ହଟାଇବା ପାଇଁ କହିଥିଲେ।
Comments are closed.