କ୍ଷେତରେ କାମ କରୁଥିବା ସମୟରେ ଶ୍ରମିକଙ୍କୁ ଆକ୍ରମଣ କଲା ବାଘ

ଦମୋହ : ମଧ୍ୟପ୍ରଦେଶ ଅନ୍ତର୍ଗତ ଦମୋହ ଜିଲାର ପଥରିଆ ବିକାସଖଣ୍ଡ ଅନ୍ତର୍ଗତ ଦେବରାତ ଗ୍ରାମରେ ଚିତାବାଘ ଆତଙ୍କ ଦେଖାଦେଇଛି। ବାଘ ପାଇଁ ଉକ୍ତ ଅଞ୍ଚଳରେ ଭୟର ବାତାବରଣ ରହିଥିବା ବେଳେ ଲୋକେ ନିଜ କାମ ପାଇଁ ବାହାରକୁ ବାହାରିବାକୁ ଭୟ କରୁଛନ୍ତି। ଏଠାରେ ଗତ ବୁଧବାର ସକାଳେ ଜଣେ ଶ୍ରମିକ ଉପରେ ଚିତାବାଘ ଆକ୍ରମଣ କରିଥିବା ନେଇ ଖବର ମିଳିଛି। ଏହାର ଭିଡିଓ ମଧ୍ୟ ସାମ୍ନାକୁ ଆସିଛି।
ମିଳିଥିବା ସୂଚନା ଅନୁଯାୟୀ, କ୍ଷେତରେ ଶ୍ରମିକ କାମ କରୁଥିବା ସମୟରେ ବାଘ ଆକ୍ରମଣ କରିଥିଲା। ଗୁରୁତର ଆହତ ହୋଇଥିବା ଶ୍ରମିକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଘଟଣା ବିଷୟରେ ଖବର ପାଇ ପୁଲିସ ଓ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚିଥିଲେ। ପହଞ୍ଚିବା ପରେ ପୁଲିସ, ବନକର୍ମଚାରୀ,ଗ୍ରାମବାସୀ ବାଘକୁ ଧରିବା ପାଇଁ ପ୍ରୟାସ କରିବା ସମୟରେ ବାଘଟି ଜଣେ ଗ୍ରାମବାସୀଙ୍କୁ ଆକ୍ରମଣ କରିଥିଲା। ସେହି ଭିଡିଓ ଭାଇରାଲ ହେଉଥିବା ଦେଖାଯାଉଛି। ବାଘଟିକୁ ଖୁବ ଶୀଘ୍ର ଧରାଯାଉ ବୋଲି ଗ୍ରାମବାସୀ କହିଛନ୍ତି। ଉକ୍ତ ବାଘଟି ପନ୍ନା ବ୍ୟାଘ୍ର ଅଭୟାରଣ୍ୟରୁ କିଭଳି ଆସିଛି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ମାତ୍ର ବାଘ କାରଣରୁ ଭୟର ବାତାବରଣ ସୃଷ୍ଟି ହେବା ସହ ଗ୍ରାମବାସୀ ଭୟଭୀତ ହୋଇ ରହିଛନ୍ତି। ବନବିଭାଗ ବାଘକୁ ଧରିବା ପାଇଁ ପ୍ରୟାସ ଜାରି ରଖିଛି।

Comments are closed.