ବେଗୁନିଆ : ବେଗୁନିଆ ତହସିଲ ଅଂଚଳରେ ଥିବା ବହୁ ବେଆଇନ ପଥର ଖଣିରୁ ପଥର ମାଫିଆମାନେ ତହସିଲଦାରଙ୍କ ଭୟରେ ଲୁଚିଛପି ରାତିଅଧିଆ ପଥର ଚାଲାଣ କରୁଥିବାବେଳେ ଆଜି ସକାଳେ ତହସିଲଦାର ପୃଥ୍ୱୀରାଜ ମଣ୍ଡଳ ବିଭିନ୍ନ ସ୍ଥାନରୁ ୩ଟି ବାଲି ବୋଝେଇ ହାଇୱା, ଗୋଟିଏ ଜେସିବି ଏବଂ ଏକ ପାୱାର ଟିଲର ଜବତ କରିଥିବା ଜଣାପଡିଛି । ଆଜି ସକାଳ ୬ଟାରେ ବେଗୁନିଆ ଆରଆଇ ବିଜୟ କୁମାର ମାର୍ଥା ଏବଂ ସୁପରଭାଇଜର କୃଷ୍ଣଚନ୍ଦ୍ର ମହାପାତ୍ର ବାଘମାରୀ ଅଭିମୁଖେ ଯାଉଥିବା ୩ଟି ବାଲି ବୋଝେଇ ହାଇୱା ସିମୋର ଠାରେ ଅଟକ ରଖି ତହସିଲଦାରଙ୍କୁ ଫୋନ କରିଥିଲେ । ତହସିଲଦାର ଘଟଣାସ୍ଥଳରେ ପହଂଚି ଗାଡି ୩ଟିକୁ ଜବତ କରି ନିଜ କାର୍ଯ୍ୟାଳୟକୁ ଆଣିଥିଲେ । ଏହା ପରେ ୮.୩୦ମିନିଟ ସମୟରେ ଦେଉଳି ପଂଚାୟତ ଅନ୍ତର୍ଗତ ଗୋଡାସ୍ଥିତ ଏକ ସରକାରୀ ସ୍ଥାନରୁ ଜେସିବି ସାହାଯ୍ୟରେ ମାଟି ଖୋଳା ଯାଇ ପଥର କାଟିବା ପାଇଁ ଏକ ପାୱାରଟିଲର ରଖାଯାଇଥିଲା। ତହସିଲଦାର ସେଠାରେ ଚଢ଼ାଉ କରି ଉକ୍ତ ଜେସିବି ଏବଂ ପାୱାରଟିଲରଟିକୁ ଜବତ କରି ନିଜ କାର୍ଯ୍ୟାଳୟକୁ ଆଣିଛନ୍ତି । ତହସିଲଦାରଙ୍କର ଆଜିର ଚଢ଼ଉ ଘଟଣା ନେଇ ପଥର ମାଫିଆଙ୍କ ମଧ୍ୟରେ ଭାଳେଣି ପଡିଛି ।
Comments are closed.