ସିଦ୍ଧାର୍ଥ ଶୁକ୍ଳା: ବିଗ୍ ବସ୍-୧୩ର ବିଜେତା ସିଦ୍ଧାର୍ଥ ଶୁକ୍ଳାଙ୍କର ମାତ୍ର ୪୦ ବର୍ଷ ବୟସରେ ପରଲୋକ ହୋଇଯାଇଛି। ୨୦୨୧ ସେପ୍ଟେମ୍ବର ୨ରେ ସିଦ୍ଧାର୍ଥଙ୍କ ମୃତ୍ୟୁ ଖବର ତାଙ୍କର ଅଗଣିତ ପ୍ରଶଂସକଙ୍କ ମନ ଭାଙ୍ଗି ଦେଇଥିଲା। ସବୁବେଳେ ଜିମ୍ ଯାଇ ନିଜକୁ ଫିଟ୍ ରଖୁଥିବା ସିଦ୍ଧାର୍ଥଙ୍କର ହୃଦ୍ଘାତରେ ପରଲୋକ ଖବରକୁ ଦର୍ଶକ ସହଜରେ ଗ୍ରହଣ କରିପାରିନଥିଲେ। ବାଳିକା ବଧୂ, ଦିଲ୍ ସେ ଦିଲ୍ ତକ୍ ପରି ଲୋକପ୍ରିୟ ଧାରାବାହିକରେ ଅଭିନୟ କରି ସେ ଦର୍ଶକଙ୍କ ପ୍ରିୟ ହୋଇପାରିଥିଲେ।
ସୁରେଖା ସିକ୍ରି: ପରଦାର ଚର୍ଚ୍ଚିତ ଜେଜେମା’ ତଥା ଜାତୀୟ ପୁରସ୍କାର ପ୍ରାପ୍ତ ବରିଷ୍ଠ ଅଭିନେତ୍ରୀ ସୁରେଖା ସିକ୍ରି ମଧ୍ୟ ଏହି ବର୍ଷ ଜୁଲାଇ ୧୬ରେ ମୃତ୍ୟୁବରଣ କରିଥିଲେ। ‘ବାଳିକା ବଧୂ’ରେ ଅଭିନୟ କରି ଭାରତୀୟ ଟେଲି ପ୍ରଶଂସକ ମହଲରେ ସେ ‘ଦାଦି ସା’ ଭାବେ ପରିଚିତ ହୋଇଥିଲେ। ହୃଦ୍ଘାତରେ ମୃତ୍ୟୁ ବରଣ କରିଥିବା ସୁରେଖା ପୂର୍ବରୁ ୨ଥର ମସ୍ତିଷ୍କାଘାତର ମଧ୍ୟ ଶିକାର ହୋଇଥିଲେ। ନିଜ ଅଭିନୀତ ‘ତମସ୍’, ‘ମାମୋ’, ‘ବଧାଇ ହୋ ବଧାଇ’ ଚଳଚ୍ଚିତ୍ର ପାଇଁ ସୁରେଖା ଜାତୀୟ ପୁରସ୍କାର ପାଇଥିଲେ।
ଅରବିନ୍ଦ ତ୍ରିବେଦୀ: ‘ରାମାୟଣ’ର ଏକ ପ୍ରମୁଖ ଚରିତ୍ର ରାବଣ ଭୂମିକାରେ ଅଭିନୟ କରି ଇତିହାସ ସୃଷ୍ଟି କରିଥିବା ଅଭିନେତା ଅରବିନ୍ଦ ତ୍ରିବେଦୀ ମଧ୍ୟ ଅକ୍ଟୋବର ୬ରେ ଆଖି ବୁଜିଥିଲେ। ଅରବିନ୍ଦ ରାବଣ ଭୂମିକାରେ ଅଭିନୟ କରିବା ପରେ ସମସ୍ତେ ତାଙ୍କୁ ପରିହାସ ଛଳରେ ରାବଣ ବୋଲି ଡାକୁଥିଲେ।
ଅନୁପମ ଶ୍ୟାମ: ଟେଲିଜଗତର ବରିଷ୍ଠ ଖଳନାୟକ ଭାବେ ପରିଚିତ ଅନୁପମ ଶ୍ୟାମ୍ ମଧ୍ୟ ଏଇ ବର୍ଷ ଆଖି ବୁଜିଛନ୍ତି। ଛୋଟ ପରଦା ସହ ବଡ ପରଦାରେ ବି ସେ ଜଣେ ଚର୍ଚ୍ଚିତ କଳାକାର ଥିଲେ। ତାଙ୍କ ଅଭିନୀତ ‘ସ୍ଲମ୍ଡଗ୍ ମିଲିଅନେୟାର’ ଅନ୍ତର୍ଜାତୀୟସ୍ତରରେ ପ୍ରଶଂସା ପାଇଥିଲା। ବୃକକ୍ ରୋଗରେ ଆକ୍ରାନ୍ତ ହୋଇ ମାତ୍ର ୬୩ ବର୍ଷ ବୟସରେ ଅନୁପମ ଶ୍ୟାମ ଆଖି ବୁଜିଛନ୍ତି।
ଚନ୍ଦ୍ରଶେଖର ବୈଦ୍ୟ: ପୌରାଣିକ ଧାରାବାହିକ ରାମାୟଣରେ ଆର୍ଯ୍ୟ ସୁମନ୍ତ ଚରିତ୍ରରେ ଅଭିନୟ କରି ଲୋକପ୍ରିୟ ହୋଇଥିଲେ ଚନ୍ଦ୍ରଶେଖର ବୈଦ୍ୟ। ଏହି ବର୍ଷ ଜୁନ୍ ୧୬ରେ ୯୮ ବର୍ଷ ବୟସରେ ସେ ଆରପାରିକୁ ଚାଲିଯାଇଛନ୍ତି। ଚନ୍ଦ୍ରଶେଖର ବୟସାଧିକ୍ୟ ରୋଗରେ ଆକ୍ରାନ୍ତ ହୋଇ ମୃତ୍ୟୁ ବରଣ କରିଥିଲେ।
Comments are closed.