‘ବିଶ୍ବ କର୍କଟ ଦିବସ’ : ୫ଟି ଖାଦ୍ୟ, ଯାହା ଆପଣଙ୍କୁ କ୍ୟାନ୍ସରଠାରୁ ରଖିବ ଦୂରେଇ

ଚଳିତ ଦିନରେ ଅଧିକାଂଶ ଲୋକ କର୍କଟ ରୋଗରେ ପୀଡ଼ିତ। ହୁଏତ କ୍ବଚିତ୍ ଲୋକ ଏହି ରୋଗ ସହ ଲଢି ବିଜୟ ହାସଲ କରି ପାରୁଛନ୍ତି। ଆଜି କାଲିର ଅନିୟମିତ ଜୀବନଶୈଳୀ ଓ ଖାଦ୍ୟପେୟ ଏହାର ଏକ ମୁଖ୍ୟ କାରଣ। ତେଣୁ କର୍କଟରୁ ଦୂରେଇ ରହିବା ପାଇଁ ସଚେତନତା ନିହାତି ଆବଶ୍ୟକ। ଲୋକଙ୍କ ମଧ୍ୟରେ କର୍କଟ ରୋଗ ପ୍ରତି ସଚେତନତା ସୃଷ୍ଟି କରିବା ପାଇଁ ପ୍ରତ୍ୟେକ ବର୍ଷ ଫେବୃୟାରୀ ୪ ତାରିଖକୁ ‘ବିଶ୍ବ କର୍କଟ ଦିବସ’ ଭାବେ ପାଳନ କରାଯାଉଛି। ଏହି ଦିବସ ଅବସରରେ ଆସନ୍ତୁ ଜାଣିବା ଏପରି କିଛି ବିଶେଷ ଖାଦ୍ୟ ବିଷୟରେ, ଯାହା ଆପଣଙ୍କୁ କର୍କଟଠାରୁ ଦୂରେଇ ରଖିବାରେ ସହାୟକ ହେବ।

ଟମାଟର- ଟମାଟର ଭିଟାମିନ୍-ସି’ର ଏକ ମୁଖ୍ୟ ସ୍ରୋତ। ଏହା ସହିତ ଏଥିରେ ଜୈବିକ ସୋଡ଼ିୟମ୍‌, ଫସଫରସ, କ୍ୟାଲସିୟମ, ପୋଟାସିୟମ୍‌, ମ୍ୟାଗ୍ନେସିୟମ୍‌ ଓ ସଲ୍ଫର ଆଦି ଭରପୁର ମାତ୍ରାରେ ଥାଏ। ଟମାଟରରେ ଥିତବା ଗ୍ଲୁଟାଥିୟୋନ ଶରୀରର ରୋଗ ପ୍ରତିରୋଧକ ଶକ୍ତି ବଢାଇଥାଏ ଓ ଏହା ପ୍ରୋଷ୍ଟେଟ୍ କର୍କଟରୁ ରକ୍ଷା କରିଥାଏ।

ବ୍ରୋକୋଲୀ- ବ୍ରୋକୋଲୀରେ ଇଣ୍ଡୋଲ-୩ କାର୍ବିନାଲ ଥାଏ, ଯାହା ହେଉଛି ଏକ ଆଣ୍ଟି ଅକ୍ସିଡାଣ୍ଟ। ଏହା ଆଷ୍ଟ୍ରୋଜେନ୍‌କୁ ଭାଙ୍ଗି ବ୍ରେଷ୍ଟ କ୍ୟାନ୍ସର, ସର୍ଭିକ୍ସ କ୍ୟାନ୍ସର ଏବଂ ଓଭାରୀ କ୍ୟାନ୍ସରରୁ ରକ୍ଷା କରିଥାଏ।

ବେରୀ- ବ୍ଲୁବେରୀରେ ଆଣ୍ଟି ଅକ୍ସିଡାଣ୍ଟ ଥାଏ, ଯାହା ଶରୀର ପାଇଁ ଖୁବ୍ ଲାଭଦାୟକ ହୋଇଥାଏ। ଜଙ୍ଗଲୀ ବ୍ଲୁବେରୀ, ଷ୍ଟ୍ରବେରୀ ଓ ଅଙ୍ଗୁର ଖାଇବା ଦ୍ବାରା ସର୍ଭାଇକଲ କର୍କଟ ହେବାର ଆଶଙ୍କାକୁ କମ୍ କରିଥାଏ।

ଗାଜର- ଗାଜରରେ ଭରପୁର ମାତ୍ରାରେ ଆଣ୍ଟି ଅକ୍ସିଡାଣ୍ଟ ଥାଏ। ଗାଜର କୋଷିକାକୁ ସୁରକ୍ଷିତ ରଖିଥାଏ ଓ ରୋଗ ପ୍ରତିରୋଧକ ପ୍ରଣାଳୀକୁ ମଜଭୂତ କରିଥାଏ। ଗାଜରର ବାହାର ପରସ୍ତରେ ଥିବା ବିଟା କ୍ୟାରୋଟିନ୍‌ ପ୍ରାକୃତିକ ଭାବେ ଚର୍ମ କର୍କଟରୁ ରକ୍ଷା କରିଥାଏ।

ହଳଦୀ- ହଳଦୀରେ ମ୍ୟାଗ୍ନେସିୟମ୍‌, ପୋଟାସିୟମ୍‌, ଆଇରନ୍‌, ଭିଟାମିନ ବି-୬, ଓମେଗା-୩, ଓମେଗା-୬ ଫ୍ୟାଟି ଏସିଡ଼୍‌ ଓ ଆଣ୍ଟିସେପ୍ଟିକ୍ ଗୁଣ ଥାଏ। କର୍କଟରୁ ରକ୍ଷା କରିବାରେ ହଳଦୀ ଖୁବ୍ ଲାଭଦାୟକ ସାବ୍ୟସ୍ତ ହୋଇଥାଏ। କର୍କଟ ଚିକିତ୍ସାରେ ମଧ୍ୟ ହଳଦୀକୁ ଔଷଧୀ ଭାବେ ବ୍ୟବହାର କରାଯାଏ। ନିୟମିତ ହଳଦୀ ସେବନ କରିବା ଦ୍ବାରା କର୍କଟ ଭଳି ପ୍ରାଣଘାତୀ ରୋଗରୁ ରକ୍ଷା ମିଳିପାରିବ।

Comments
Loading...