ଏସିଆ ଏକାଦଶ ତରଫରୁ କୋହଲିଙ୍କ ଖେଳିବା ନେଇ ଅନିଶ୍ଚିତତା

ନୂଆଦିଲ୍ଲୀ  : ମାର୍ଚ୍ଚ ୨୧ ଓ ୨୨ ତାରିଖରେ ଏସିଆ ଏକାଦଶ ଓ ବିଶ୍ବ ଏକାଦଶ ମଧ୍ୟରେ ଦୁଇଟି ଟ୍ବେଣ୍ଟି୨୦ କ୍ରିକେଟ୍ ମ୍ୟାଚ୍ ଆୟୋଜନ ପାଇଁ ବାଂଲାଦେଶ କ୍ରିକେଟ୍‌ ଆସୋସିଏସନ୍‌ ଯୋଜନା ରଖିଛି।
ବାଂଲାଦେଶର ମହାନ୍‌ ନେତା ଶେଖ୍‌ ମୁଜିବୁର ରେହମାନ୍‌ଙ୍କ ଜନ୍ମ ଶତବାର୍ଷିକୀ ପାଳନ ଅବସରରେ ଏହି ଦୁଇଟି ପ୍ରଦର୍ଶନୀ ମ୍ୟାଚ୍ ଖେଳାଯିବ। ଏସିଆ ଏକାଦଶ ତରଫରୁ ଭାରତୀୟ କ୍ରିକେଟ୍‌ ଦଳର ଅଧିନାୟକ ବିରାଟ କୋହଲି ଖେଳିବେ ବୋଲି ଆଲୋଚନା ଚାଲିଥିବା ବେଳେ ବର୍ତ୍ତମାନ ସୁଦ୍ଧା ଏ ସଂପର୍କରେ କୌଣସି ଚୂଡାନ୍ତ ନିଷ୍ପତ୍ତି ହୋଇନଥିବା ବିସିିସିଆଇ ସୂତ୍ରରୁ ଜଣାପଡ଼ିଛି। କୋହଲି ଅତିକମ୍‌ରେ ଗୋଟିଏ ପ୍ରଦର୍ଶନୀ ମ୍ୟାଚ୍‌ ଖେଳିବେ ବୋଲି ବାଂଲାଦେଶ କ୍ରିକେଟ୍‌ ବୋର୍ଡ ଆଶା ରଖିଥିବା ବେଳେ ସେ ବର୍ତ୍ତମାନ ସୁଦ୍ଧା ଏସିଆ ଏକାଦଶ ତରଫରୁ ଖେଳିବାକୁ ସ୍ବୀକୃତି ପ୍ରଦାନ କରିନଥିବା ଜଣାପଡ଼ିଛି।
ବିସିସିଆଇ ସୂତ୍ରରୁ ମିଳିଥିବା ଖବର ଅନୁଯାୟୀ ଭାରତୀୟ ଦଳ ନ୍ୟୁଜିଲାଣ୍ଡରୁ ଫେରିବା ପରେ ଅଧିକ ମ୍ୟାଚ୍‌ ଖେଳୁଥିବା ଯୋଗୁଁ କୋହଲିଙ୍କ ଉପରେ ପଡୁଥିବା ଚାପର ତର୍ଜମା କରାଯିବ। ଏହାପରେ ସେ ଏସିଆ ଏକାଦଶ ତରଫରୁ ପ୍ରଦର୍ଶନୀ ମ୍ୟାଚ୍‌ରେ ଖେଳିବେ କି ନାହିଁ ସେ ସଂପର୍କରେ ନିଷ୍ପତ୍ତି ହେବ।
ନ୍ୟୁଜିଲାଣ୍ଡରେ ୬ ସପ୍ତାହ କଟାଇବା ପରେ ଭାରତୀୟ କ୍ରିକେଟ୍‌ ଦଳ ମାର୍ଚ୍ଚ ୬ରେ ଭାରତ ଫେରିବ। ଦଳ ମାର୍ଚ୍ଚ ୧୨, ୧୫ ଓ ୧୮ରେ ଦକ୍ଷିଣ ଆଫ୍ରିକା ବିପକ୍ଷରେ ୩ଟି ଦିନିକିଆ ମ୍ୟାଚ୍‌ ଖେଳିବ। ଏଥିନିମନ୍ତେ ସବୁ ଖେଳାଳି ମାର୍ଚ୍ଚ ୧୦ରେ ଧର୍ମଶାଳାରେ ଏକତ୍ରିତ ହେବ। ସେତେବେଳେ କ୍ରିକେଟର୍‌ଙ୍କ ଉପରେ ଅଧିକ ମ୍ୟାଚ୍‌ ଖେଳିବାରୁ ପଡୁଥିବା ଚାପ ସଂପର୍କରେ ତର୍ଜମା କରାଯିବ। ତର୍ଜମା ଶେଷ ହେବା ପରେ କୋହଲି ଏସିଆ ଏକାଦଶ ତରଫରୁ ଖେଳିବା ସଂପର୍କରେ ନିଷ୍ପତ୍ତି ହେବ।
ସୂଚନାଥାଉକି କିଛିଦିନ ତଳେ କୋହଲି ଅଧିକ ମ୍ୟାଚ୍‌ ଖେଳିବାକୁ ନେଇ ଅସନ୍ତୋଷବ୍ୟକ୍ତ କରିଥିଲେ। କୋହଲି ଏସିଆ ଏକାଦଶ ତରଫରୁ ଖେଳିବେ କି ବୋଲି ପ୍ରଶ୍ନର ଉତ୍ତରରେ ଭାରତୀୟ ଦଳର ମୁଖ୍ୟ ପ୍ରଶିକ୍ଷକ ରବି ଶାସ୍ତ୍ରୀ କହିଥିଲେ ଏହା ତାଙ୍କର (କୋହଲି) ବ୍ୟକ୍ତିଗତ ନିଷ୍ପତ୍ତି ହେବ। ଯଦି ସେ କିଛିଦିନ ବିଶ୍ରାମ ନେବାକୁ ଚାହିଁବେ ତେବେ ତାଙ୍କୁ ବିଶ୍ରାମ ମିଳିବ।

Comments
Loading...