ଗଞ୍ଜାମ ଜିଲାପାଳଙ୍କ ଘୋଷଣା, ବାଲ୍ୟ ବିବାହ ହେଲେ ଦାୟୀ ରହିବେ ପୁରୋହିତ

ଛତ୍ରପୁର: ଜୁଲାଇ ମାସ ଶେଷ ସୁଦ୍ଧା ଗଂଜାମ ଜିଲା କିଭଳି ବାଲ୍ୟ ବିବାହ ମୁକ୍ତ ଜିଲା ହେବ ତାହା ଉପରେ ଜିଲାପାଳ ବିଜୟ ଅମୃତା କୁଲାଙ୍ଗେ ଗୁରୁତ୍ବାରୋପ କରିଛନ୍ତି। ଜିଲାପାଳଙ୍କ ଅଧ୍ୟକ୍ଷତାରେ ଶୁକ୍ରବାର ନିର୍ଭୟ କଢି ଟାସ୍କ ଫୋର୍ସ ବୈଠକ ଅନୁଷ୍ଠିତ ହୋଇଥିଲା। ବାଲ୍ୟ ବିବାହ ନେଇ ଜିଲାରେ ୧୪ ସମ୍ବେଦନଶୀଳ ଅଂଚଳ ଚିହ୍ନଟ ହୋଇଛି। ଏହା ଉପରେ ଅଧିକ ତଥ୍ୟ ସଂଗ୍ରହ କରିବାକୁ ପଡିବ ବୋଲି ବୋଲି ଜିଲାପାଳ କହିଥିଲେ। ବାଲ୍ୟ ବିବାହ ସମ୍ପର୍କରେ ୧୦ଟି ଏତଲା ଥାନାରେ ଦିଆଯାଇଥିବା ବେଳେ ୧୧ ମାମଲା ସିଡବ୍ଲ୍ୟୁସିକୁ ହସ୍ତାନ୍ତର ହୋଇଛି। ଗ୍ରାମାଞ୍ଚଳରେ ଅଧିକ ବାଲ୍ୟ ବିବାହ ହେଉଥିବା ବେଳେ ସ୍ଥାନୀୟ ସ୍କୁଲର ଶିକ୍ଷକ ଓ ଅଙ୍ଗନୱାଡି କର୍ମୀ ଏହା କିଭଳି ଜାଣିପାରୁନାହାନ୍ତି ସେ ନେଇ ଜିଲାପାଳ ପ୍ରଶ୍ନ କରିଥିଲେ।

ଆଗାମୀ ଦିନରେ ଯେଉଁ ଅଞ୍ଚଳରେ ବାଲ୍ୟବିବାହ ହେବ ସେଥିପାଇଁ ଶିକ୍ଷକମାନେ ଦାୟୀ ରହିବେ ବୋଲି ଜିଲାପାଳ କହିଥିଲେ। ଯେଉଁ ସ୍ଥାନରେ ବାଲ୍ୟ ବିବାହ ହେଉଥିବା ଜଣାପଡିବ ସେଥିରେ ନିୟୋଜିତ ପଣ୍ଡିତ କିମ୍ବା ବ୍ରାହ୍ମଣ(ପୁରୋହିତ) ନାମରେ ସ୍ଥାନୀୟ ଥାନାରେ ଏତଲା ଦିଆଯିବ। ଯେଉଁ ଅଂଚଳରେ କୈାଣସି ବିବାହ କାର୍ୟ୍ୟ ହେଉଥିବ ସେଠାର ଉଭୟ ବର ଓ କନ୍ୟାର ଆଧାର କାର୍ଡ ଯାଞ୍ଚ କରାଯିବ। ଜିଲାରେ ଯେକୈାଣସି ସ୍ଥାନରେ ବାଲ୍ୟ ବିବାହ ହେଉଥିବା ନେଇ ଖବର ଦେଲେ ଉକ୍ତ ବ୍ୟକ୍ତିକୁ ୫ ହଜାର ଟଙ୍କା ପୁରସ୍କାର ମିଳିବ। ୨୦୧୭ ରେ ୨୪ ଟି ବାଲ୍ୟ ବିବାହ ରୋକାଯାଇଥିବା ବେଳେ ୨୦୧୮ ରେ ୨୨ ଟି , ୨୦୧୯ ରେ ୪୫ ଟି ଓ ୨୦୨୦ ରେ ୨୨୮ ଟି ବାଲ୍ୟ ବିବାହ ରୋକାଯାଇଛି। ସୋରଡା ବ୍ଲକରେ ସର୍ବାଧିକ ୪୮ ଟି ବାଲ୍ୟ ବିବାହ ରୋକାଯାଇଛି। ଫେବୃୟାରୀ ୧୪ ତାରିଖ ଭେଲେନଟାଇନ୍‍ ଡେଦିନ ଜିଲାର ସମସ୍ତ ୫୦୩ ପଂଚାୟତରେ ସ୍ୱତନ୍ତ୍ର କାର୍ୟ୍ୟକ୍ରମ କରାଯାଇ ନବଜାତ କନ୍ୟା ଶିଶୁ ମାନଙ୍କ ମା’ ମାନଙ୍କୁ ସମ୍ବର୍ଦ୍ଧନା ଦେବା ସହ ନବ ବିବାହିତା ଦମ୍ପତିଙ୍କୁ ଡାକି ପ୍ରତିଜ୍ଞା ନେବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି।

Comments
Loading...