ଦୁବାଇ : କରୋନା ଭୂତାଣୁ ସଂକ୍ରମଣଜନିତ ପରିସ୍ଥିତିକୁ ଦୃଷ୍ଟିରେ ରଖି ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଟେଷ୍ଟ ଫର୍ମାଟ୍ରେ କେତେକ ପରବର୍ତ୍ତନ କରିଛି। କରୋନା ସଂକ୍ରମଣକୁ ଦୃଷ୍ଟିରେ ରଖି ଅନୀଲ କୁମ୍ବଲେଙ୍କ ନେତୃତ୍ବାଧୀନ କ୍ରିକେଟ୍ କମିଟି କେତେକ ସୁପାରିସ କରିିଥଲା ଯାହାକୁ ମଙ୍ଗଳବାର ଆଇସିସି ମଞ୍ଜୁରି ଦେଇଛି।
ନୂଆ ନିୟମ ଅନୁଯାୟୀ ମ୍ୟାଚ୍ ଚାଲିଥିବା ବେଳେ କୌଣସି ଖେଳାଳିଙ୍କ ନିକଟରେ କରୋନା ସଂକ୍ରମଣର ଲକ୍ଷଣ ପ୍ରକାଶ ପାଇଲେ ସେହି ଖେଳାଳିଙ୍କୁ ମ୍ୟାଚ୍ ରେଫରୀଙ୍କ ଅନୁମତି ନେଇ ବଦଳା ଯାଇ ପାରିବ। ତାଙ୍କ ସ୍ଥାନରେ ଆଉ ଜଣେ କ୍ରିକେଟର୍ଙ୍କୁ ମ୍ୟାଚ୍ରେ ଖେଳିବାକୁ ସୁଯୋଗ ମିଳିବ। ତେବେ ଏହି ନିୟମ କେବଳ ଟେଷ୍ଟରେ ଲାଗୁ ହେବ। ଦିନିକିଆ ଓ ଟ୍ବେଣ୍ଟି୨୦ ମ୍ୟାଚ୍ରେ ନୂଆ ନିୟମ ଲାଗୁ ହେବ ନାହିଁ ବୋଲି ଆଇସିସି ତରଫରୁ ଜାରି ପ୍ରେସ୍ ବିଜ୍ଞପ୍ତିରେ ସ୍ପଷ୍ଟ କରି ଦିଆଯାଇଛି।
ଅନ୍ୟପକ୍ଷରେ ବୋଲର ଓ ଫିଲଡର୍ମାନେ ବଲ୍ରେ ପାଟିର ଲାଳ ଲଗାଇ ପାରିବେ ନାହିଁ ବୋଲି ଆଇସିସିର କ୍ରିକେଟ୍ କମିଟି ଯେଉଁ ସୁପାରିସ କରିଥିଲା ତାହାକୁ ମଞ୍ଜୁରି ଦେଇଛି ଆଇସିସି। ଯଦି କୌଣସି ଦଳର କ୍ରିକେଟର୍ ବଲ୍ରେ ପାଟିର ଲାଳ ଲଗାଉଥିବା ଦେଖିବାକୁ ମିଳେ ତେବେ ପ୍ରଥମେ ଦଳକୁ ଚେତାବନୀ ଦିଆଯିବ। ଦ୍ବିତୀୟଥର ଏପରି ଘଟିଲେ ବ୍ୟାଟିଂ କରୁଥିବା ଦଳକୁ ୫ ରନ୍ ପ୍ରଦାନ କରାଯିବ।
ସେହିପରି ଦୁଇ ଦଳ ମଧ୍ୟରେ ମ୍ୟାଚ୍ ପରିଚାଳନା ପାଇଁ ନିରପେକ୍ଷ ଅମ୍ପାୟାର ନିଯୁକ୍ତି ନିୟମରେ ପରିବର୍ତ୍ତନ ଆଣିଛି ଆଇସିସି। କରୋନା ସଂକ୍ରମଣଜନିତ ପରିସ୍ଥିତିକୁ ଦୃଷ୍ଟିରେ ରଖି ବିଭିନ୍ନ ଦେଶ ତରଫରୁ ବିମାନ ଯାତ୍ରା ନେଇ ନାନା କଟକଣା ଜାରି ହୋଇଥିବାରୁ ଟେଷ୍ଟ ସିରିଜ୍ରେ ଦୁଇଜଣ ଘରୋଇ ଅମ୍ପାୟାର ଦାୟିତ୍ବ ନିର୍ବାହ କରିପାରିବେ ବୋଲି ଆଇସିସି ତରଫରୁ ସୂଚନା ଦିଆଯାଇଛି। ଏଥିସହ ପ୍ରତ୍ୟେକ ଦଳ ଗୋଟିଏ ଲେଖାଏଁ ଇନିଂସରେ ଅତିରିକ୍ତ ଗୋଟିଏ ଡିଆରଏସ୍ ପାଇବେ ବୋଲି ଆଇସିସି ତରଫରୁ ଜାରି ବିଜ୍ଞପ୍ତିରେ ଦର୍ଶାଯାଇଛି।
Comments are closed.