ମାଦ୍ରିଦ୍: କରୋନା ଭୂତାଣୁ ସଂକ୍ରମଣଜନିତ ପରିସ୍ଥିତିକୁ ଦୃଷ୍ଟିରେ ରଖି ଚଳିତବର୍ଷ ଟେନିସ୍ ଟୁର୍ଣ୍ଣାମେଣ୍ଟ ଆୟୋଜନ ସମ୍ଭାବନା ନାହିଁ ବୋଲି ମତ ଦେଇଛନ୍ତି ତାରକା ପୁରୁଷ ଟେନିସ୍ ଖେଳାଳି ସ୍ପେନର ନାଦାଲ୍। ସ୍ପେନରୁ ପ୍ରକାଶିତ ଏକ ଖବରକାଗଜକୁ ସାକ୍ଷାତକାର ଦେବା ଅବସରରେ ନାଦାଲ୍ କହିଥିଲେ ଚଳିତବର୍ଷ ଶେଷ ବେଳକୁ ସବୁକିଛି ଠିକ୍ ହୋଇଯିବ ଏବଂ ଟେନିସ୍ ଟୁର୍ଣ୍ଣାମେଣ୍ଟ ଖେଳାଯାଇ ପାରିବ ବୋଲି ପୂର୍ବରୁ ସେ ଭାବୁଥିଲେ। ତେବେ ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ୨୦୨୧ ପୂର୍ବରୁ ଟେନିସ୍ ଟୁର୍ଣ୍ଣାମେଣ୍ଟ ଆୟୋଜିତ ହେବା ଭଳି ଲାଗୁ ନାହିଁ।
ସୂଚନାଯୋଗ୍ୟ କରୋନା ଭୂତାଣୁ ସଂକ୍ରମଣଜନିତ କାରଣରୁ ଚଳିତବର୍ଷ ୱିମ୍ବିଲଡନ୍ ଟେନିସ୍ ଟୁର୍ଣ୍ଣାମେଣ୍ଟ ବାତିଲ ହୋଇଥିବା ବେଳେ ଫ୍ରେଞ୍ଚ୍ ଓପନ୍କୁ ସେପ୍ଟେମ୍ବରକୁ ଘୁଞ୍ଚାଇ ଦିଆଯାଇଛି। ସେହିପରି ୟୁଏସ୍ ଓପନ୍ ଟେନିସ୍ ଟୁର୍ଣ୍ଣାମେଣ୍ଟ ଆସନ୍ତା ଅଗଷ୍ଟରେ ଅନୁଷ୍ଠିତ ହେବାର କାର୍ୟ୍ୟସୂଚୀ ରହିଥିବା ବେଳେ ଏହା ସ୍ଥଗିତ ରହିବା ନେଇ ଚର୍ଚ୍ଚା ଜୋର୍ ଧରିଛି। ନିଜ ପ୍ରତିକ୍ରିୟାରେ ନାଦାଲ୍ କହିଛନ୍ତି ଚଳିତବର୍ଷ କୌଣସି ଟେନିସ୍ ଟୁର୍ଣ୍ଣାମେଣ୍ଟ ଆୟୋଜିତ ହୋଇପାରିବ ବୋଲି ସେ ଆଶା ଛାଡ଼ି ଦେଇଛନ୍ତି। ଆସନ୍ତା ବର୍ଷ ଜାନୁଆରୀରେ ଖେଳାଯିବାକୁ ଥିବା ଅଷ୍ଟ୍ରେଲିଆନ୍ ଓପନ୍ ଟୁର୍ଣ୍ଣାମେଣ୍ଟରେ ଭାଗ ନେବାକୁ ସେ ନିଜକୁ ପ୍ରସ୍ତୁତ କରୁଛନ୍ତି।