ଭାରତ ୧୪୫ରେ ଅଲ୍‌ଆଉଟ୍‌ ପରେ ଇଂଲଣ୍ଡ ୮/୨

ଅହମ୍ମଦାବାଦ: ନରେନ୍ଦ୍ର ମୋଦୀ ଷ୍ଟାଡିୟମରେ ବୁଧବାରଠାରୁ ଭାରତ-ଇଂଲଣ୍ଡ ମଧ୍ୟରେ ଆରମ୍ଭ ହୋଇଥିବା ୩ୟ ଦିବାରାତ୍ର ଟେଷ୍ଟ ରୋମାଞ୍ଚକର ସ୍ଥିତିରେ ରହିଛି। ୨ୟ ଦିନ ଖେଳ ସରି ନ ଥିବାବେଳେ ଉଭୟ ଦଳର ପ୍ରଥମ ଇନିଂସ ବ୍ୟାଟିଂ ଶେଷ ହୋଇଯାଇଛି। ଅର୍ଥାତ ୨ଟି ଦିନରେ ୨୪ଟି ଉଇକେଟ୍‌ର ପତନ ହୋଇସାରିଛି। ଇଂଲଣ୍ଡ ପ୍ରଥମ ଇନିଂସରେ ୧୧୨ ରନ୍‌ରେ ଅଲଆଉଟ୍‌ ହୋଇଯାଇଥିଲା। ଏହାର ଜବାବରେ ଟିମ ଇଣ୍ଡିଆ ପ୍ରଥମ ଇନିଂସରେ ୧୪୫ ରନ୍‌ କରିବାକୁ ସକ୍ଷମ ହୋଇଛି। ୩୩ ରନରେ ପଛୁଆ ଥିବା ଭ୍ରମଣକାରୀ ଦଳ ଗୁରୁବାର ୨ୟ ଇନିଂସ ଖେଳ ଆରମ୍ଭ କରିଥିବାବେଳେ ୨ ଉଇକେଟ୍‌ ବିନିମୟରେ ୮ ରନ୍‌ ସଂଗ୍ରହ କରିଛି।

ଇଂଲଣ୍ଡ ପ୍ରଥମ ଇନିଂସରେ ମାତ୍ର ୧୧୨ ରନ୍‌ କରି ସମସ୍ତ ଉଇକେଟ୍‌ ହରାଇ ଦେଇଥିଲା। ଜାକ୍‌ କ୍ରଲେ ଏକମାତ୍ର ଖେଳାଳି ଭାବେ ୫୩ ରନ୍‌ ସଂଗ୍ରହ କରିବାରେ ସମର୍ଥ ହୋଇଥିଲେ। ଅନ୍ୟ ସମସ୍ତ ଖେଳାଳି ଭଲ ପ୍ରଦର୍ଶନ କରିପାରି ନ ଥିଲେ। ସେହିପରି ଟିମ୍‌ ଇଣ୍ଡିଆ ଏହାର ପ୍ରଥମ ଇନିଂସରେ ୧୪୫ ରନ୍‌ କରି ସମସ୍ତ ଉଇକେଟ୍‌ ହରାଇଥିଲା। ରୋହିତ ଶର୍ମା କେବଳ ୬୬ ରନ୍‌ କରିବାକୁ ସକ୍ଷମ ହୋଇଥିଲେ। ଅନ୍ୟ ସବୁ ବ୍ୟାଟ୍ସମ୍ୟାନ ଭଲ ସ୍କୋର କରିବାରେ ବିଫଳ ହୋଇଥିଲେ। ଇଂଲଣ୍ଡ ପକ୍ଷରୁ ଅଧିନାୟକ ଜୋ ରୁଟ୍‌ ୫ଟି ଏବଂ ଜ୍ୟାକ୍‌ ଲିଚ୍‌ ୪ଟି ଉଇକେଟ୍‌ ନେଇଥିଲେ। ଜୋଫ୍ରା ଆର୍ଚର ଗୋଟିଏ ଉଇକେଟ୍‌ ଅକ୍ତିଆର କରିଥିଲେ।

ଇଂଲଣ୍ଡ ଏହାର ୨ୟ ଇନିଂସ ଖେଳ ଆରମ୍ଭ କରିଛି। ୩.୧ ଓଭରରେ ଦଳ ୨ ଉଇକେଟ୍‌ ହରାଇ ୮ ରନ୍‌ ସଂଗ୍ରହ କରିଛି। ସ୍ପିନର ଅକ୍ଷର ପଟେଲ ୨ଟି ଯାକ ଉଇକେଟ୍‌ ହାସଲ କରିଛନ୍ତି।

Comments
Loading...