ଭୁବନେଶ୍ୱର: ଓଲିଉଡର ଲୋକପ୍ରିୟ କଣ୍ଠଶିଳ୍ପୀ ତପୁ ମିଶ୍ରଙ୍କ ଶନିବାର ରାତିରେ ଦେହାନ୍ତ ହୋଇଥିଲା। ରବିବାର ସତ୍ୟନଗର ଶ୍ମଶାନରେ ତପୁଙ୍କ ଅନ୍ତିମ ସଂସ୍କାର ସମ୍ପନ୍ନ ହୋଇଛି। ନବବଧୂ ବେଶରେ ତାଙ୍କୁ ସଜାଇ ଦିଆଯାଇଥିଲା। ସ୍ବାମୀ ଦୀପକ ପୂଜାରୀ ମୁଖାଗ୍ନି ଦେଇଥିଲେ। ଏହି ଅବସରରେ ଭଉଣୀ, ପରିବାର ଲୋକଙ୍କ ସମେତ ବହୁ ସାଥୀ କଳାକାର ଉପସ୍ଥିତ ଥିଲେ l ନିକଟରେ କରୋନା ଆକ୍ରାନ୍ତ ହୋଇ ତପୁ ଡାକ୍ତରଖାନରେ ଭର୍ତ୍ତି ହୋଇଥିଲେ। ପରେ ସୁସ୍ଥ ହୋଇଥିଲେ ମଧ୍ୟ ତାଙ୍କ ଫୁସଫୁସ ସଂକ୍ରମଣ କାରଣରୁ ସ୍ବାସ୍ଥ୍ୟାବସ୍ଥା ଅଧିକ ଗୁରୁତର ହୋଇପଡ଼ିଥିଲା। ଦୀର୍ଘଦିନ ଧରି ଡାକ୍ତରଖାନାରେ ସଙ୍ଘର୍ଷ କରିବା ପରେ ଶେଷରେ ଚିକିତ୍ସାଧୀନ ଅବସ୍ଥାରେ ସେ ଆଖି ବୁଜିଥିଲେ।
ପଞ୍ଚଭୂତରେ ତପୁ ବିଲୀନ
ଭଜନ, ଆଧୁନିକ, ଚଳଚ୍ଚିତ୍ର, ଆଲବମ୍, ଲୋକ ସଙ୍ଗୀତରେ କଣ୍ଠଦାନ କରି ସ୍ୱତନ୍ତ୍ର ଛାପ ଛାଡ଼ିଯାଇଛନ୍ତି ତପୁ l ସେ ଚାଲିଯାଇଛନ୍ତି ସତ କିନ୍ତୁ ଅବର୍ତ୍ତମାନରେ ନିଜ ସଙ୍ଗୀତ ମାଧ୍ୟମରେ ସମସ୍ତଙ୍କ ହୃଦୟରେ ରହିବେ ବୋଲି ଅନେକ କଳାକାର ଶୋକପ୍ରକାଶ କରି କହିଛନ୍ତି। ଶେଷକୃତ୍ୟ ସମ୍ପନ୍ନବେଳେ ସଙ୍ଗୀତକାର ପ୍ରେମାନନ୍ଦ, ଏଲିନା, ବୁଲୁ, ଉଷସୀ, ସୋଫିଆ, ବିଭୁକିଶୋର ପ୍ରମୁଖ ବହୁ ଶୁଭେଛୁ ଉପସ୍ଥିତ ଥିଲେ। ତପୁଙ୍କ ବିୟୋଗରେ ରାଜ୍ୟପାଳ ପ୍ରଫେସର ଗଣେଶୀ ଲାଲ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଓଡ଼ିଶା ସିନେ କ୍ରିଟିକ୍ ଆସୋସିଏସନ ପକ୍ଷରୁ ପ୍ରଦୋଷ ପଟ୍ଟନାୟକ, ଦିଲୀପ ହାଲିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଶୋକପ୍ରକାଶ କରିଛନ୍ତି।
Comments are closed.