ତବଲିଗି ଜମାତର ୨୨୦୦ ବିଦେଶୀ ନାଗରିକ କଳାତାଲିକାଭୁକ୍ତ; ଆଗାମୀ ୧୦ ବର୍ଷ ଲାଗି ଭାରତ ମନା

ନୂଆଦିଲ୍ଲୀ:  ପର୍ଯ୍ୟଟକ ଭିସାରେ ଭାରତ ଆସି ଏଠାରେ ତବଲିଗି ଜମାତର ଧାର୍ମିକ କାର୍ଯ୍ୟକ୍ରମରେ ସାମିଲ ହୋଇଥିବା ୨୨୦୦ ବିଦେଶୀ ନାଗରିକଙ୍କ ଉପରେ ଭାରତ ସରକାର ଲଗାଇଛନ୍ତି କଠୋର କାର୍ଯ୍ୟାନୁଷ୍ଠାନ ।  ଏହି ବିଦେଶୀମାନଙ୍କୁ ୧୦ ବର୍ଷ ପାଇଁ ଭାରତ ଆସିବା ଉପରେ ସରକାର ପ୍ରତିବନ୍ଧକ ଲଗାଇଛନ୍ତି । ଏମାନେ ଆସନ୍ତା ୧୦ ବର୍ଷ ପର୍ଯ୍ୟନ୍ତ ଭାରତ ଆସିବା ପାଇଁ ଆଉ ଭିସା ଦିଆଯିବ ନାହିଁ । ଏହି ଲୋକମାନେ ଭିସା ନିୟମ ଉଲ୍ଲଙ୍ଘନ କରି ଏଠାରେ ଧାର୍ମିକ କାର୍ଯ୍ୟକ୍ରମରେ ସାମିଲ ହୋଇଥିବାରୁ ସରକାର ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ସୂଚନା ମିଳିଛି ।

କୁହାଯାଉଛି ଯେ ୨୨୦୦ରୁ ଅଧିକ ବିଦେଶୀ ତବଲିଗି ଜମାତର ସଦସ୍ୟ ଅଛନ୍ତି ଯେଉଁମାନେ ଭାରତ ପର୍ଯ୍ୟଟନ ସମୟରେ ପୁରା ଦେଶରେ ବିଭିନ୍ନ ସ୍ଥାନରେ  ତବଲିଗି ଜମାତ କାର୍ଯ୍ୟକ୍ରମରେ ଭାଗ ନେଇଛନ୍ତି । ଏମାନଙ୍କୁ ୧୦ ବର୍ଷ ପାଇଁ ଏମାନଙ୍କୁ କଳାତାଲିକାଭୁକ୍ତ କରାଯାଇଛି । ଏହି ସଂଖ୍ୟା ଆହୁରି ବଢ଼ି ପାରେ ବୋଲି ଅନୁମାନ କରାଯାଉଛି ।

#UPDATE More than 2,200 blacklisted foreign nationals banned for 10 years from travelling to India for their involvement in Tablighi Jamaat activities: Government Sources https://t.co/9b4t5QpkSt

— ANI (@ANI) June 4, 2020

ନିଜାମୁଦ୍ଦିନ ଘଟଣା ଆଲୋକକୁ ଆସିବା ପରେ ଦେଶର ବିଭିନ୍ନ ସ୍ଥାନରେ ମରକଜକୁ ବିଦେଶରୁ ଆସିଥିବା ଲୋକଙ୍କ ସମ୍ପର୍କରେ ତଥ୍ୟ ଆସିବାରେ ଲାଗିଲା । ତେଲଙ୍ଗାନାରୁ ଆରମ୍ଭ କରି ଉତ୍ତରପ୍ରଦେଶ, ବିହାର, ଝାଡ଼ଖଣ୍ଡ ଆଦି ରାଜ୍ୟର ବିଭିନ୍ନ ମସଜିଦରୁ ୭୦୦ରୁ ଅଧିକ ବିଦେଶୀ ଧରା ପଡ଼ିଥିଲେ । ଏମାନଙ୍କ ମଧ୍ୟରୁ ଅଧିକାଂଶ ପର୍ଯ୍ୟଟନ ଭିସାରେ ଭାରତ ଆସିଥିଲେ। ନିଜାମୁଦ୍ଦି ମରକଜରେ ୨୧୬ ବିଦେଶୀଙ୍କ ବ୍ୟତୀତ ଲକ୍ଷ୍ନୌରେ ୧୩, ରାଞ୍ଚିରେ ୩୦, ପାଟନାର ମସଜିଦରୁ ମଧ୍ୟ ବିଦେଶୀଙ୍କୁ ଧରା ଯାଇଥିଲା । ଜାନୁଆରୀ ୨୦୨୦ଠାରୁ ଭାରତକୁ ୨୨୦୦ରୁ ଅଧିକ ବିଦେଶୀ ତବଲିଗିରେ ସାମିଲ ହେବାକୁ ପର୍ଯ୍ୟଟନ ଭିସାରେ ଆସିଥିବା ସୂଚନା ମିଳିଥିଲା ।