ଟି୨୦ ବିଶ୍ବକପ୍ ଭାରତରେ ଆୟୋଜନ ହେବ କି ନାହିଁ, ଜୁନ୍ ୨୮ ସୁଦ୍ଧା ଜଣାଅ – ଆଇସିସି
ଦୁବାଇ: ମଙ୍ଗଳବାର ଆନ୍ତର୍ଜାତିକ କ୍ରିକେଟ୍ ପରିଷଦ (ଆଇସିସି)ର ଆଭାସୀ ବୋର୍ଡ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ କିଛି ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି। ଭାରତରେ ଅକ୍ଟୋବର-ନଭେମ୍ବରରେ ହେବାକୁ ଥିବା ଟ୍ବେଣ୍ଟି୨୦ ବିଶ୍ବକପ୍ ଆୟୋଜନ ପାଇଁ ଚୂଡ଼ାନ୍ତ ନିଷ୍ପତ୍ତି ନେବାକୁ ଆଇସିସିକୁ ବିସିସିଆଇ ମାସେ ସମୟ ମାଗିଥିଲା। ବିସିସିଆଇକୁ ଆଇସିସି ଠିକ୍ ମାସେ ସମୟ ଦେଇଛି। ଟ୍ବେଣ୍ଟି୨୦ ବିଶ୍ବକପ୍ ଭାରତରେ ଆୟୋଜନ ହେବ କି ନାହିଁ; ଜୁନ୍ ୨୮ ସୁଦ୍ଧା ତାହା ଜଣାଇବା ଏବଂ ବିକଳ୍ପ ସ୍ଥାନ ୟୁଏଇରେ ବିଶ୍ବକପ୍ ଆୟୋଜନ କରିବା ଲାଗି ପ୍ରସ୍ତୁତ ରହିବା ଲାଗି ବିସିସିଆଇକୁ ଆଇସିସି କହିଛି।
ଏହାସହ ଆଇସିସି ନିଷ୍ପତ୍ତି ନେଇଛି ଯେ ୨୦୨୭ ଓ ୨୦୩୧ ଦିନିକିଆ ବିଶ୍ବକପ୍ରେ ୧୦ଟି ସ୍ଥାନରେ ୧୪ଟି ଦଳ ଖେଳିବେ। ୧୪ଟି ଦଳଙ୍କୁ ୭ଟି ଲେଖାଏଁ ୨ଟି ଗ୍ରୁପ୍ରେ ବିଭକ୍ତ କରାଯିବ। ପ୍ରତି ଗ୍ରୁପ୍ରୁ ୩ଟି ଲେଖାଏଁ; ଏହିପରି ୬ଟି ଦଳ ସୁପର ସିକ୍ସ ପର୍ଯ୍ୟାୟ ଖେଳିବେ। ପୁଣି ୨୦୨୪ରୁ ପ୍ରତି ୨ ବର୍ଷରେ ଥରେ ଟ୍ବେଣ୍ଟି୨୦ ବିଶ୍ବକପ୍ ଆୟୋଜନ କରାଯିବ। ୨୦୨୪ରୁ ୨୦୩୦ ମଧ୍ୟରେ ଟ୍ବେଣ୍ଟି୨୦ ବିଶ୍ବକପ୍ରେ ୧୬ଟି ଦଳ ସ୍ଥାନରେ ୨୦ଟି ଲେଖାଏଁ ଦଳ ଖେଳିବେ। ୨୦ ଦଳଙ୍କୁ ୪ଟି ଗ୍ରୁପ୍ରେ ବିଭକ୍ତ କରାଯିବ। ପ୍ରତି ଗ୍ରୁପ୍ର ୫ଟି ଦଳରୁ ୨ଟି ଲେଖାଏଁ; ଏହିପରି ୮ଟି ଦଳ ସୁପର ଏଇଟ୍ ପର୍ଯ୍ୟାୟ ଖେଳିବେ। ଟି୨୦ ବିଶ୍ବକପ୍ରେ ମୋଟ ୫୪ଟି ମ୍ୟାଚ୍ ଖେଳାଯିବ। ଏହାସହ ପ୍ରତି ୨ ବର୍ଷରେ ଥରେ ୯ଟି ଦଳଙ୍କୁ ନେଇ ବିଶ୍ବ ଟେଷ୍ଟ ଚମ୍ପିଆନ୍ସିପ୍ ଖେଳାଯିବ। ଏହାର ଫାଇନାଲ ୨୦୨୫, ୨୦୨୭, ୨୦୨୯ ଓ ୨୦୩୧ରେ ଖେଳାଯିବ ବୋଲି ନିଷ୍ପତ୍ତି ନିଆଯାଇଛି। ପୁଣି ପ୍ରମୁଖ ଆଇସିସି ଟୁର୍ଣ୍ଣାମେଣ୍ଟ ଚମ୍ପିଆନ୍ସ ଟ୍ରଫି ଫେରିବ ବୋଲି ଆଇସିସି ଘୋଷଣା କରିଛି। ୮ଟି ଦଳଙ୍କୁ ନେଇ ଚମ୍ପିଆନ୍ସ ଟ୍ରଫି ୨୦୨୪ ଓ ୨୦୨୮ରେ ଖେଳାଯିବ। ପ୍ରତି ଗ୍ରୁପ୍ର ଶ୍ରେଷ୍ଠ ୨ ଦଳ ସେମିଫାଇନାଲ ଖେଳିବେ। ୨୦୧୭ରେ ଶେଷଥର ପାଇଁ ଚମ୍ପିଆନ୍ସ ଟ୍ରଫି ଆୟୋଜନ ହୋଇଥିଲା। ଏହାକୁ ପାକିସ୍ତାନ ଜିତିଥିଲା।
Comments are closed.