ଭୁବନେଶ୍ୱର : ଭାରତ ତ୍ରିରାଷ୍ଟ୍ରୀୟ ଦୃଷ୍ଟିହୀନ ଟ୍ୱେଣ୍ଟି୨୦ କ୍ରିକେଟ ସିରିଜ୍ରେ ଚମ୍ପିଆନ ଆଖ୍ୟା ଅର୍ଜନ କରିଛି। ଗୋଆରେ ଶନିବାର ଫାଇନାଲ ମ୍ୟାଚରେ ଭାରତ ୧୦ ୱିକେଟରେ ଶ୍ରୀଲଙ୍କାକୁ ପରାସ୍ତ କରିଛି। ଶ୍ରୀଲଙ୍କା ପ୍ରଥମେ ବ୍ୟାଟିଂକରି ୨୦ ଓଭରରେ ୯ ୱିକେଟରେ ୧୧୯ ରନ୍ କରିଥିଲା। ପ୍ରିୟନାଥ ୩୦ ରନ୍କରି ଅପରାଜିତ ରହିଥିଲେ। ଭାରତୀୟ ଅଧିନାୟକ ଅଜୟ ରେଡ୍ଡୀ ୧୫ ରନ୍ଦେଇ ୪ଟି ୱିକେଟ ନେଇଥିଲେ। ଜବାବରେ ଭାରତ ୧୩.୧ ଓଭରରେ ୱିକେଟ ନ ହରାଇ ବିଜୟୀ ହୋଇଥିଲା। ଦୁର୍ଗା ୬୩ ଓ ଅନୀଲ ୪୫ ରନ୍କରି ଅପରାଜିତ ଥିଲେ। ଅଜୟ ରେଡ୍ଡୀ ମ୍ୟାନ ଅଫ ଦି ଫାଇନାଲ, ବି-୧ ବିଭାଗରେ ଅଜିତ ସିଲ୍ଭା, ବି-୨ରେ ଅଜୟ ରେଡ୍ଡୀ ଓ ବି-୩ରେ ସୁନୀଲ ରମେଶ ମ୍ୟାନ ଅଫ ସିରିଜ୍ ବିବେଚିତ ହୋଇଥିଲେ। ଅତିଥି ଭାବେ ଗୋଆ ରାଜ୍ୟପାଳ ମୃଦୁଳା ସିହ୍ନା ଚମ୍ପିଆନ ଭାରତକୁ ଟ୍ରଫି ପ୍ରଦାନ କରିଥିଲେ। ଭାରତୀୟ ଦଳର ପ୍ରଶିକ୍ଷକ ଭାବେ ଓଡ଼ିଶାର ଚନ୍ଦ୍ରଶେଖର ପଟ୍ଟନାୟକ ଦାୟିତ୍ୱ ତୁଲାଇଥିବାବେଳେ ଖେଳାଳି ଭାବେ ଓଡ଼ିଶାର ପଙ୍କଜ ଭୂଏ ପ୍ରତିନିଧିତ୍ୱ କରିଥିଲେ। ଲିଗ୍ ପର୍ଯ୍ୟାୟରେ ପଙ୍କଜ ଇଂଲଣ୍ଡ ବିପକ୍ଷରେ ଶତକ ମାରିବା ସହ ଅଲ୍ରାଉଣ୍ଡର ପ୍ରଦର୍ଶନ କରି ମ୍ୟାନ ଅଫ ଦି ମ୍ୟାଚ୍ ହୋଇଥିଲେ।
