ଲକ୍ଷ୍ନୌ : ସମୀର ବର୍ମା ଏଠାରେ ଚାଲିଥିବା ସୟଦ ମୋଦି ଆନ୍ତର୍ଜାତିକ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟରେ ପୁରୁଷ ସିଙ୍ଗଲ୍ସ ଚମ୍ପିଆନ ହୋଇଥିବାବେଳେ ମହିଳା ସିଙ୍ଗଲ୍ସରେ ସାଇନା ନେହୱାଲଙ୍କୁ ରନର୍ସଅପ୍ରେ ସନ୍ତୁଷ୍ଟ ହେବାକୁ ପଡିଛି। ରବିବାର ଖେଳାଯାଇଥିବା ପୁରୁଷ ସିଙ୍ଗଲ୍ସ ଫାଇନାଲରେ ୩ୟ ସିଡ୍ ସମୀର ୧୬-୨୧, ୨୧-୧୯, ୨୧-୧୪ ଗେମରେ ୬ଷ୍ଠ ସିଡ୍ ମାନ୍ୟତାପ୍ରାପ୍ତ ଚୀନର ଲୁ ଗ୍ୱାଙ୍ଗ୍ଜୁଙ୍କୁ ପରାସ୍ତ କରିଛନ୍ତି। ଏହି ମୁକାବିଲା ୧ ଘଣ୍ଟା ୧୦ ମିନିଟ ଧରି ଚାଲିଥିଲା। ସୂଚନାଯୋଗ୍ୟ ୨୦୧୭ରେ ସମୀର ସ୍ୱଦେଶର ସାଇପ୍ରଣିତଙ୍କୁ ହରାଇ ଏଠାରେ ଚମ୍ପିଆନ ହୋଇଥିଲେ। ଅପରପକ୍ଷରେ ମହିଳା ସିଙ୍ଗଲ୍ସ ଫାଇନାଲରେ ଚୀନର ୟୁଇ ହାନ୍ ସିଧାସଳଖ ୨୧-୧୮, ୨୧-୮ ଗେମରେ ୨ୟ ସିଡ୍ ସାଇନାଙ୍କୁ ପରାସ୍ତ କରିଛନ୍ତି। ପୁରସ୍କାର ବାବଦରେ ଚମ୍ପିଆନ ସମୀରଙ୍କୁ ୧୧,୨୫୦ ଡଲାର ଓ ରନର୍ସଅପ୍ ସାଇନାଙ୍କୁ ୫୭୦୦ ଡଲାର ମିଳିଛି।
ସାଇନା ଓ ସମୀରଙ୍କ ବ୍ୟତୀତ ପୁରୁଷ ଡବଲ୍ସ ଓ ମହିଳା ଡବଲ୍ସରେ ମଧ୍ୟ ଭାରତୀୟ ଖେଳାଳିଙ୍କୁ ରନର୍ସଅପ୍ରେ ସନ୍ତୁଷ୍ଟ ହେବାକୁ ପଡିଛି। ପୁରୁଷ ଡବଲ୍ସ ଫାଇନାଲରେ ୨ୟ ସିଡ୍ ମାନ୍ୟତାପ୍ରାପ୍ତ ଇଣ୍ଡୋନେସିଆ ଯୋଡି ଫଜର ଆଲଫିଆନ୍ ଓ ମହମ୍ମଦ ଆଡ୍ରିଆନୋ ୨୧-୧୧, ୨୨-୨୦ ଗେମରେ ସ୍ୱସ୍ତିକସାଇରାଜ ରାଙ୍କିରେଡ୍ଡି ଓ ଚିରାଗ ସେଟ୍ଟିଙ୍କୁ ପରାସ୍ତ କରି ଚମ୍ପିଆନ ହୋଇଛନ୍ତି। ମହିଳା ଡବଲ୍ସ ଫାଇନାଲରେ ଭାରତୀୟ ଯୋଡି ଅଶ୍ୱିନୀ ପୋନାପ୍ପା ଓ ସିକ୍କି ରେଡ୍ଡି ୧୫-୨୧, ୧୩-୨୧ ଗେମରେ ୩ୟ ସିଡ୍ ମାନ୍ୟତାପ୍ରାପ୍ତ ମାଲେସୀୟ ଯୋଡି ଚୌ ମି କ୍ୱାନ୍ ଓ ଲି ମେଙ୍ଗ୍ ୟିନ୍ଙ୍କଠାରୁ ହାରିଯାଇଛନ୍ତି।
