୧୨ ଦିନରେ ପହଞ୍ଚିଲା ସ୍ବାତୀ ମାଲିୱାଲଙ୍କ ଅନଶନ: ସ୍ବାସ୍ଥ୍ୟାବସ୍ଥା ବିଗୁଡୁଛି, ଅଚିନ୍ତାରେ ସରକାର

ନୂଆଦିଲ୍ଲୀ: ମହିଳାଙ୍କ ସୁରକ୍ଷା ପାଇଁ ଲଢ଼େଇ ଜାରି ରଖିଥିବା ଦିଲ୍ଲୀ ମହିଳା କମିଶନ ଅଧ୍ୟକ୍ଷା ସ୍ବାତୀ ମାଲିୱାଲଙ୍କ ସ୍ବାସ୍ଥ୍ୟାବସ୍ଥା ଦିନକୁ ଦିନ ଖରାପ ହେବାରେ ଲାଗିଛି। ବଳାତ୍କାର ମାମଲାକୁ ଫାଷ୍ଟଟ୍ରାକ୍‌ କୋର୍ଟ ଜରିଆରେ ବିଚାର କରି ୬ମାସ ମଧ୍ୟରେ ଅଭିଯୁକ୍ତଙ୍କୁ ଫାଶୀଦଣ୍ଡ ଦେବା ଲାଗି ବ୍ୟବସ୍ଥା କରିବା ଦାବିରେ ସ୍ବାତୀ ରାଜଘାଟସ୍ଥିତ ସମତା ସ୍ଥଳରେ ଚଳାଇଥିବା ଅନଶନ ଶନିବାର ୧୨ ଦିନରେ ପହଞ୍ଚିଛି। ସେ ଖାଦ୍ୟ ଏବଂ ଜଳ ଗ୍ରହଣ କରୁ ନ ଥିବାରୁ ସ୍ବାସ୍ଥ୍ୟାବସ୍ଥା ଦୁର୍ବଳ ହୋଇପଡ଼ିଛି। ତାଙ୍କ ରକ୍ତଚାପ ଲଗାତର ହ୍ରାସ ପାଇବାରେ ଲାଗିଛି। ଅନ୍ୟପଟେ ସରକାର ଏଯାଏ ସ୍ବାତୀଙ୍କ ଅନଶନକୁ ଗୁରୁତ୍ଵ ଦେଇନାହାନ୍ତି। ସ୍ବାତୀଙ୍କ ଦାବିକୁ ସରକାର ଅଣଦେଖା କରିବା ସହିତ ମହିଳାଙ୍କ ସୁରକ୍ଷା ପ୍ରତି ଆଦୌ ଚିନ୍ତା କରୁ ନ ଥିବା ମତପ୍ରକାଶ ପାଇଛି। ଅନଶନ ଯୋଗୁ ସ୍ବାତୀଙ୍କ ଶରୀରର ଓଜନ ୬.୩ କି.ଗ୍ରା. ହ୍ରାସ ପାଇଛି। ଗତ ଶୁକ୍ରବାର ଡାକ୍ତରମାନେ ତାଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରିଥିଲେ। ରକ୍ତ ଚାପ ପୂର୍ବାପେକ୍ଷା ହ୍ରାସ ପାଇଥିବା ଜଣାପଡ଼ିଛି। ସ୍ବାତୀ କହିଛନ୍ତି, ଦିଲ୍ଲୀରେ ୪୫ଟି ଫାଷ୍ଟ୍ରଟ୍ରାକ୍‌ କୋର୍ଟର ଅଭାବ ରହିଛି। ଦିଲ୍ଲୀ ପୁଲିସ ଗତ ୧୩ ବର୍ଷ ଧରି ପ୍ରାୟ ୬୬ ହଜାର ଯବାନ ମାଗିଆସୁଛି, କିନ୍ତୁ କେନ୍ଦ୍ର ସରକାର ଏହା ଉପରେ ଆଦୌ ଧ୍ୟାନ ଦେଉନାହାନ୍ତି।

Comments are closed.