ଖାକିରେ ଗୋଲାପୀ ଦାଗ: ସବ ଇନ୍ସପେକ୍ଟରଙ୍କୁ ନିଲମ୍ବିତ କଲେ ଗଜପତି ଏସପି

ପାରଳାଖେମୁଣ୍ଡି: ଖାକିରେ ପୁଣି ଗୋଲାପୀ ଦାଗ । ପୁଲିସ ବାବୁଙ୍କ ବିରୋଧରେ ପ୍ରେମ-ପ୍ରତାରଣା ଅଭିଯୋଗ । ଏପରି ଘଟଣା ଘଟିଛି ଗଜପତି ଜିଲାରେ । ଜନୈକ ଯୁବତୀଙ୍କୁ ବିବାହ ପ୍ରତିଶ୍ରୁତି ଦେଇ ଶୋଷଣ କରିଥିବା  ଜଣେ ପୁଲିସ ଏସ୍ଆଇଙ୍କ ବିରୋଧରେ ଅଭିଯୋଗ ଆସିବା ପରେ ଗଜପତି ଏସପି ସାରା ଶର୍ମା ତାଙ୍କୁ ନିଲମ୍ବିତ କରିଥିବା ସୂଚନା ମିଳିଛି । ସମ୍ପୃକ୍ତ ଏସ୍ଆଇ ଗଜପତି ଜିଲାର  ଆର୍.ଉଦୟଗିରି ଥାନାରେ କାର୍ଯ୍ୟ କରୁଥିଲେ ।

ଅଭିଯୋଗ ଅନୁସାରେ  ସମ୍ପୃକ୍ତ ପୁଲିସ ବାବୁ ବିବାହ ପ୍ରତିଶ୍ରୁତି ଦେଇ ତାଙ୍କ ସହ ଦୈହିକ ସମ୍ପର୍କ ରଖିଥିଲେ । ମାତ୍ର ବିବାହ କରିବାକୁ ପରବର୍ତୀ ସମୟରେ ରାଜି ହୋଇ ନ ଥିଲେ । ଏ ସମ୍ପର୍କରେ ସେ ଥାନାରେ ଅଭିଯୋଗ କରିଥିଲେ ହେଁ ସମ୍ପୃକ୍ତ ପୁଲିସ ବାବୁଙ୍କ ବିରୋଧରେ କିଛି ପଦକ୍ଷେପ ଗ୍ରହଣ କରାଯାଇ ନ ଥିଲା ।  ବାଧ୍ୟ ହୋଇ ଯୁବତୀ ଗଜପତି ଏସ୍‌ପି ସାରା ଶର୍ମାଙ୍କ ନିକଟରେ ଅଭିଯୋଗ କରିଥିଲେ  । ଯୁବତୀଙ୍କ ଅଭିଯୋଗ ଓ କାର୍ଯ୍ୟରେ ଅବହେଳା ଅଭିଯୋଗରେ ସମ୍ପୃକ୍ତ ଏସ୍ଆଇଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଥିବା ଜଣାପଡ଼ିଛି ।

Comments
Loading...