ନୂଆଦିଲ୍ଲୀ: ସର୍ବୋଚ୍ଚ ନ୍ୟାୟାଳୟ ସର୍ବଦା ଗଣତନ୍ତ୍ରର ଅଭିଭାବକ ଭାବେ କାର୍ଯ୍ୟକରେ। ଦେଶରେ ଯେତେବେଳେ କିଛି ବ୍ୟତିକ୍ରମ ଘଟେ ସେତେବେଳେ ସର୍ବୋଚ୍ଚ ନ୍ୟାୟାଳୟ ସାଧାରଣ ଜନତାଙ୍କ ପକ୍ଷରେ ଛିଡ଼ା ହୁଏ। ସମ୍ବିଧାନକୁ ସୁରକ୍ଷା ପ୍ରଦାନ କରେ। ଜନତା ଏହି ଜାଣିଛନ୍ତି। ଧର୍ମ ଯେଉଁଠି ବିଜୟ ସେଇଠି। ସେଥିପାଇଁ ନ୍ୟାୟିକ ବ୍ୟବସ୍ଥା ଉପରେ ଲୋକଙ୍କର ଆସ୍ଥା ରହିଆସିଛି ବୋଲି କହିଛନ୍ତି ପ୍ରଧାନ ବିଚାରପତି ଏନ୍.ଭି ରମଣା।
ଶନିବାର ଭାରତ-ସିଙ୍ଗାପୁର ସମ୍ମିଳନୀରେ ବିଚାରପତି ରମଣା ଆଧାର ବ୍ୟାଖ୍ୟାନ ଉପସ୍ଥାପନ କରି ସେ କହିଛନ୍ତି ଯେ ଭାରତରେ ଯେ କୌଣସି ସମାଜରେ ବିବାଦ ଅବଶ୍ୟମ୍ଭାବୀ। ଏହା ବିଭିନ୍ନ ପ୍ରକାର; କିନ୍ତୁ ଏହାଦ୍ବାରା ବିକାଶର ପଥରୋଧ କରାଯିବା ପରିବର୍ତ୍ତେ ଏଥିରୁ ବିକାଶର ପଥ ବାହାର କରାଯିବା ଉଚିତ। ଭାରତ ସମେତ ବିଭିନ୍ନ ଏସୀୟ ରାଷ୍ଟ୍ରରେ ଆପୋଷ ବୁଝାମଣା ଜରିଆରେ ବିବାଦ ସମାଧାନର ପରମ୍ପରା ରହିଆସିଛି ବୋଲି ସେ କହିଛନ୍ତି। ଏହି ଅବସରରେ ଭାରତରେ ପ୍ରଚଳିତ ଆଇନସେବା ସହାୟତା କାର୍ଯ୍ୟକ୍ରମର ସେ ଉଚ୍ଚ ପ୍ରଶଂସା କରିଛନ୍ତି। ଏହା ବେଶ୍ ସଫଳତା ଲାଭ କରିଥିବା ଏବଂ ୭୦ପ୍ରତିଶତ ସାଧାରଣ ଜନତାଙ୍କୁ ଏହା ମାଧ୍ୟମରେ ନ୍ୟାୟ ପ୍ରଦାନ କରାଯାଇପାରୁଥିବା ସେ କହିଛନ୍ତି।
ଏଥିସହିତ ଦେଶରେ ୪୫ ନିୟୁତ ମାମଲା ବିଚାରାଧୀନ ଥିବା ନେଇ ଯାହା କୁହାଯାଉଛି ତାହା ଅତିରଞ୍ଜିତ ଏବଂ ଗ୍ରହଣଯୋଗ୍ୟ ନୁହେଁ ବୋଲି ବିଚାରପତି ରମଣା କହିଛନ୍ତି। କାର୍ଯ୍ୟକ୍ରମରେ ସିଙ୍ଗାପୁର ପ୍ରଧାନ ବିଚାରପତି ସୁନ୍ଦରେଶ ମେନନ୍ ରମଣାଙ୍କୁ ଶୁଭେଚ୍ଛା ଜ୍ଞାପନ କରିଛନ୍ତି।
Comments are closed.