ନୂଆଦିଲ୍ଲୀ: ସୁପ୍ରିମକୋର୍ଟକୁ ପଦୋନ୍ନତି ଲାଗି କଲେଜିୟମ୍ ସୁପାରିସ କରିଥିବା ୪ ବିଚାରପତିଙ୍କ ନାମକୁ ସରକାର ବୁଧବାର ଅନୁମୋଦନ କରିଥିବା ଜଣାଯାଇଛି। ଏହି ୪ ବିଚାରପତିଙ୍କୁ ବିଧିବଦ୍ଧ ନିଯୁକ୍ତି ମିଳିବା ପରେ ସୁପ୍ରିମକୋର୍ଟ ବିଚାରପତି ସଂଖ୍ୟା ୩୧କୁ ବୃଦ୍ଧି ପାଇବ। ଯାହା ସୁପ୍ରିମକୋର୍ଟଙ୍କ ଧାର୍ଯ୍ୟ ବିଚାରପତି ସଂଖ୍ୟାକୁ ପୂରଣ କରିବ। ସପଦୋନ୍ନତି ପାଇଁ ସରକାର ଅନୁମୋଦନ କରିଥିବା ୪ ବିଚାରପତି ହେଲେ ଜଷ୍ଟିସ ଅନିରୁଦ୍ଧ ବୋଷ, ଜଷ୍ଟିସ ଏଏସ୍ ବୋପାନ୍ନା, ଜଷ୍ଟିସ ବିଆର ଗାଭାଇ ଓ ଜଷ୍ଟିସ ସୂର୍ଯ୍ୟକାନ୍ତ। ଜଷ୍ଟିସ ବୋଷ ଓ ଜଷ୍ଟିସ ବୋପାନ୍ନାଙ୍କ ନାମକୁ ସରକାର ପୂର୍ବରୁ ଫେରାଇ ଦେଇଥିଲେ। ବରିଷ୍ଠତା ଓ ଆଞ୍ଚଳିକ ପ୍ରତିନିଧିତ୍ବକୁ ଭିତ୍ତିକରି ସରକାର ଏହି ଦୁଇଜଣଙ୍କ ନାମକୁ ଫେରାଇ ଦେଇଥିଲେ। ତେବେ କଲେଜିୟମ୍ ସରକାରଙ୍କ ଅଗ୍ରାହ୍ୟକୁ ପ୍ରତ୍ୟାଖ୍ୟାନ ପୂର୍ବକ ପୁନର୍ବାର ଏହି ଦୁଇଜଣଙ୍କ ନାମକୁ ସୁପାରିସ କରିଥିଲେ। ଫଳରେ ସରକାର ବାଧ୍ୟ ହୋଇ ସେମାନଙ୍କ ନାମକୁ ଅନୁମୋଦନ କରିଛନ୍ତି। ଜଷ୍ଟିସ ଗାଭାଇ ବମ୍ବେ ହାଇକୋର୍ଟର ବିଚାରପତି ଥିବାବେଳେ ଜଷ୍ଟିସ ବୋଷ ଝାଡଖଣ୍ଡ ହାଇକୋର୍ଟ, ଜଷ୍ଟିସ ବୋପାନ୍ନା ଗୌହାଟୀ ହାଇକୋର୍ଟ ଓ ଜଷ୍ଟିସ ସୂର୍ଯ୍ୟକାନ୍ତ ହିମାଚଳ ପ୍ରଦେଶ ହାଇକୋର୍ଟର ମୁଖ୍ୟ ବିଚାରପତି ଅଛନ୍ତି। ଗୁରୁବାର ଏହି ବିଚାରପତିମାନେ ଶପଥ ଗ୍ରହଣ କରିବାର କାର୍ଯ୍ୟକ୍ରମ ଅଛି।
Comments are closed.