ନୂଆଦିଲ୍ଲୀ : ଲୋକପାଳ ନିମନ୍ତେ ଅନୁସନ୍ଧାନ କମିଟି ଗଠନ ଦିଗରେ ଅଦ୍ୟାବଧି ଗ୍ରହଣ କରାଯାଇଥିବା ପଦକ୍ଷେପ ସମ୍ବନ୍ଧରେ ସୁପ୍ରିମକୋର୍ଟ ଶୁକ୍ରବାର କେନ୍ଦ୍ର ସରକାରଙ୍କୁ ଜବାବ ଲୋଡିଛନ୍ତି। ଏ ସମ୍ବନ୍ଧରେ ଏକ ସତ୍ୟପାଠ ଜାନୁଆରୀ ୧୭ରେ ପରବର୍ତ୍ତୀ ଶୁଣାଣି ବେଳେ ଦାଖଲ କରିବାକୁ ପ୍ରଧାନ ବିଚାରପତି ରଞ୍ଜନ ଗୋଗୋଇ ଏବଂ ବିଚାରପତି ଏସ୍. କେ. କାଉଲଙ୍କ ପୀଠ ଆଟ୍ଟର୍ଣ୍ଣି ଜେନେରାଲ କେ. କେ. ବେଣୁଗୋପାଳଙ୍କୁ ନିର୍ଦେଶ ଦେଇଛନ୍ତି। ୨୦୧୮ ସେପ୍ଟେମ୍ବରରୁ ଇତିମଧ୍ୟରେ ଏହି କମିଟି ଗଠନ ଲାଗି ବହୁ ପଦକ୍ଷେପ ଗ୍ରହଣ କରାଯାଇଛି ବୋଲି ଶୁଣାଣି ସମୟରେ ବେଣୁଗୋପାଳ କହିଥିଲେ। ମାତ୍ର ଇତିମଧ୍ୟରେ ବହୁ ସମୟ ଅତିବାହିତ ହୋଇଥିବା ବେଳେ ସରକାର କି ପଦକ୍ଷେପ ଗ୍ର ହଣ କରିଛନ୍ତି ବୋଲି ପୀଠ ପ୍ରଶ୍ନ କରିବାରୁ ବେଣୁଗୋପାଳ ପୁନଃ ତାଙ୍କ ଯୁକ୍ତି ଦୋହରାଇଥିଲେ। ଫଳରେ ଉତ୍କ୍ଷିପ୍ତ ହୋଇ କମିଟି ଗଠନ ସମ୍ବନ୍ଧୀୟ ସମସ୍ତ ତଥ୍ୟ ଲିଖିତ ଆକାରରେ ଦାଖଲ କରିବାକୁ ପୀଠ ନିର୍ଦେଶ ଦେଇଛନ୍ତି। ଅନ୍ୟପଟେ ସରକାର ଅନୁସନ୍ଧାନ କମିଟିର ସଦସ୍ୟଙ୍କ ତାଲିକା ସରକାରୀ ୱେବସାଇଟରେ ସାର୍ବଜନୀନ କରି ନ ଥିବା ମାମଲାର ଅନ୍ୟତମ ପକ୍ଷ ତଥା ସ୍ବେଚ୍ଛାସେବୀ ସଂଗଠନ ‘କମନକଜ’ ପକ୍ଷରୁ ଯୁକ୍ତି ଦର୍ଶାଯାଇଥିଲା।
