ମଦ ହୋମ୍‌ ଡେଲିଭରି ପାଇଁ ସୁପ୍ରିମକୋର୍ଟଙ୍କ ସଙ୍କେତ

ନୂଆଦିଲ୍ଲୀ: କୌଣସି ରାଜ୍ୟରେ ମଦ ବିକ୍ରି ହେବ କି ନାହିଁ ସେନେଇ ସମ୍ପୃକ୍ତ ରାଜ୍ୟ ସରକାର ନିଷ୍ପତ୍ତି ନେବେ। ଏ ବିଷୟରେ ସୁପ୍ରିମକୋର୍ଟ କୌଣସି ନିର୍ଦେଶ ଦେବେ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ ଶୁକ୍ରବାର ଏକ ଜନସ୍ବାର୍ଥ ମାମଲାର ଶୁଣାଣି କରିବା ଅବସରରେ କହିଛନ୍ତି। ଏହା ସହିତ ସୁପ୍ରିମକୋର୍ଟ ରାଜ୍ୟ ସରକାରମାନଙ୍କୁ ମଦ ହୋମ୍‌ ଡେଲିଭରି ସମ୍ପର୍କରେ ସଙ୍କେତ ଦେଇଛନ୍ତି। ରାଜ୍ୟ ସରକାର ଚାହିଁଲେ ପରୋକ୍ଷା ଭାବେ ଅର୍ଥାତ ହୋମ୍‌ ଡେଲିଭରି ଜରିଆରେ ଲୋକଙ୍କୁ ମଦ ଯୋଗାଇ ପାରିବେ। ଏ ନେଇ ରାଜ୍ୟ ସରକାର ବିଚାର କରନ୍ତୁ ବୋଲି ସୁପ୍ରିମକୋର୍ଟ କହିଛନ୍ତି। ଏହା ସହିତ ମଦ ଦୋକାନ ଖୋଲିଲେ ସାମାଜିତ ଦୂରତା ରକ୍ଷା କରିବା ଦିନରେ ପଦକ୍ଷେପ ନେବାକୁ ରାଜ୍ୟ ସରକାରମାନଙ୍କୁ ପରାମର୍ଶ ଦେଇଛନ୍ତି।

ସୂଚନାଯୋଗ୍ୟ, ବିଭିନ୍ନ ରାଜ୍ୟରେ ମଦ ଦୋକାନ ଖୋଲାଯିବା ପରେ ଦୋକାନ ଆଗରେ ପ୍ରବଳ ଭିଡ ସୃଷ୍ଟି ହୋଇଥିଲା। ଏହା ଦ୍ବାରା କରୋନା ବିରୋଧୀ ଲଢ଼େଇର ବଡ଼ ଅସ୍ତ୍ର କୁହାଯାଉଥିବା ସାମାଜିକ ଦୂରତା ଉଲ୍ଲଂଘନ ହୋଇଥିଲା। ଏହାକୁ ନେଇ ସୁପ୍ରିମକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଥିଲା। ସୁପ୍ରିମକୋର୍ଟଙ୍କ ୩ ଜଣିଆ ଖଣ୍ଡପୀଠ ମାମଲାର ଶୁଣାଣି କରି ଉପରୋକ୍ତ ରାୟ ଦେଇଛନ୍ତି।

Comments
Loading...