ଲଣ୍ଡନ . – ବିଶ୍ୱର ପ୍ରଥମ ମାନବ ମସ୍ତିଷ୍କପରି ଆଚରଣ କରୁଥିବା ସୁପର କମ୍ପ୍ୟୁଟର କାମ କରିବା ଆରମ୍ଭ କରିଛି । ବିଶ୍ୱର ସର୍ବ ବୃହତ ନ୍ୟୁରୋମୋର୍ଫିକ୍ ସୁପର କମ୍ପ୍ୟୁଟର ‘ସ୍ପିନ୍ନାକେର୍’କୁ ପ୍ରଥମ ଥର ପାଇଁ ଅନ୍ କରାଯାଇଛି । ଏଥିରେ ଦଶ ଲକ୍ଷ ପ୍ରୋସେସର୍ ବ୍ୟବହାର କରାଯାଇଛି । ଗୋଟିଏ ସେକେଣ୍ଡରେ ଏହା ୨୦୦୦୦୦୦୦୦୦୦୦୦୦୦୦ଟି କାମ ଏକାସଙ୍ଗରେ କରି ପାରିବ । ରିଅଲ୍ ଟାଇମ୍ ବା ପ୍ରକୃତ ସମୟରେ ‘ସ୍ପିନ୍ନାକେର୍’ ଅଧିକ ବାଓଲଜିକାଲ୍ ନ୍ୟୁରୋନ୍ର ମଡେଲ୍ ତିଆରି କରିପାରିବ ବୋଲି ଏହାକୁ ତିଆରି କରିଥିବା ଗବେଷକମାନେ ଦାବି କରିଛନ୍ତି ।
ଏହି ମାନବ ମସ୍ତିଷ୍କ ବା ‘ହ୍ୟୁମାନ ବ୍ରେନ ’ ସୁପର କମ୍ପୁଟର ‘ସ୍ପିନ୍ନାକେର୍’କୁ ତିଆରି କରିବା ପାଇଁ ୨୦ ବର୍ଷର ପ୍ରସ୍ତୁତି ସହ ବୈଜ୍ଞାନିକମାନେ୧୨ ବର୍ଷର ଅକ୍ଳାନ୍ତ ପରିଶ୍ରମ କରିଛନ୍ତି । ଏଥିପାଇଁ ୧୫୦ କୋଟି ଟଙ୍କା ଆର୍ଥିକ ପ୍ରୋତ୍ସାହନ ସୁତ୍ରରେ ମିଳିଥିଲା । ୨୦୦୬ ମସିହାରେ ଏହି ସୁପର କମ୍ପ୍ୟୁଟରର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ଚଳିତ ନଭେମ୍ବର ୨ ତାରିଖରେ ଏହାକୁ ପ୍ରଥମ ଥର ଅନ୍ କରାଯାଇଥିଲା । ୟୁରୋପିଆନ୍ ହ୍ୟୁମାନ ବ୍ରେନ୍ ପ୍ରୋଜେକ୍ଟ ଓ ଇପିଏସ୍ଆରସି ପକ୍ଷରୁ ଏହି ପ୍ରକଳ୍ପ ଆର୍ଥିକ ପ୍ରୋତ୍ସାହନ ଦିଆଯାଇଥିଲା । ମାଞ୍ଚେଷ୍ଟର ବିଶ୍ୱବିଦ୍ୟାଳୟର କମ୍ପୁଟରସାଇନ୍ସ ବିଭାଗରେ ନିର୍ମାଣ କରାଯାଇଛି । ମଣିଷର ସ୍ନାୟୁତନ୍ତ୍ରର ମୂଳ ବା ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଥିବା ନ୍ୟୁରନ୍ ଯେପରି କାମ କରିଥାଏ ଏଥିରେ ସେହିପରି ଯାନ୍ତ୍ରିକ ବ୍ୟବସ୍ଥା କରାଯାଇଛି । ଏଥିରେ ମଣିଷର ମସ୍ତିଷ୍କ ପରି କେତକ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।