ଭୁବନେଶ୍ବର (ବ୍ୟୁରୋ): କ୍ବାରେଣ୍ଟାଇନ (ସଙ୍ଗରୋଧ) କେନ୍ଦ୍ରରେ କୌଣସି ବିଶୃଙ୍ଖଳାକୁ ଗ୍ରହଣ କରାଯିବ ନାହିଁ । ଯେଉଁମାନେ ଏପରି କାର୍ଯ୍ୟ କରିବେ ଓ ସଙ୍ଗରୋଧ ନିୟମ ପାଳନ ନ କରିବେ ସେମାନଙ୍କ ବିରୋଧରେ କଠୋର ପଦକ୍ଷେପ ଗ୍ରହଣ କରାଯିବ ବୋଲି ଚେତାଇ ଦେଇଛନ୍ତି ରାଜ୍ୟ ସରକାରଙ୍କ କୋବିଦ-୧୯ ମୁଖପାତ୍ର ସୁବ୍ରତ ବାଗଚୀ । ପ୍ରବାସରୁ ଓଡ଼ିଶା ଫେରିିଥିବା ଲୋକଙ୍କୁ ଶୃଙ୍ଖଳିତ ଆଚରଣ କରିବା ଓ ମହାମାରୀ ସଙ୍କଟ ମଧ୍ୟରେ କିଛିଟା ତ୍ୟାଗ ସ୍ବୀକାର କରିବାକୁ ପରାମର୍ଶ ଦେଇଛନ୍ତି । ଓଡ଼ିଶା ଫେରିବା ପୂର୍ବରୁ ରାଜ୍ୟ ସରକାରଙ୍କୁ ଅବଗତ କରିବା ସହ ପଞ୍ଜିକରଣକୁ ବାଧ୍ୟତାମୂଳକ କରାଯାଇଥିବାରୁ ଏହାପ୍ରତି ଯତ୍ନବାନ ହେବାକୁ ସେ କହିଛନ୍ତି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରବାସ ଫେରନ୍ତା ଓଡ଼ିଆଙ୍କୁ ସଙ୍ଗରୋଧ ନିୟମ ପାଳନ ପାଇଁ ଦେଇଥିବା ଆହ୍ବାନକୁ ଆଉଥରେ ସ୍ମରଣ କରାଇ ଦେଇଛନ୍ତି ଶ୍ରୀ ବାଗଚୀ । ବିଶୃଙ୍ଖଳା ସୃଷ୍ଟି କଲେ ଅଭାବନୀୟ ପରିସ୍ଥିତି ସୃଷ୍ଟି ହେବ । ଫେରିଥିବା ଲୋକଙ୍କ ପାଇଁ ରାଜ୍ୟର ଲୋକଙ୍କ ମନରେ ସମବେଦନା ରହିବ ନାହିଁ । କରୋନାରେ ମୃତକଙ୍କ ସଂଖ୍ୟା ମଧ୍ୟରୁ ୬୩ % ବୟସ୍କ ଲୋକ । ତେଣୁ ନିଜ ପରିବାର ଓ ଅନ୍ୟମାନଙ୍କ ପରିବାରରେ ରହୁଥିବା ବୟସ୍କ ବ୍ୟକ୍ତିଙ୍କ ପାଇଁ ଏହା ଅତ୍ୟନ୍ତ ଗୁରୁତ୍ବପୂର୍ଣ୍ଣ । ସେହିପରି କରୋନା ଚିକିତ୍ସାରେ ନିଯୁକ୍ତ ସ୍ବାସ୍ଥ୍ୟ କର୍ମୀ ମଧ୍ୟ ଏପରି ବିଶୃଙ୍ଖଳାକୁ ଉଦାର ହୃଦୟରେ ଗ୍ରହଣ କରିବେ ନାହିଁ । ତେଣୁ ରାଜ୍ୟ ସରକାର ପ୍ରବାସୀଙ୍କ ଉପରେ କଡ଼ା ନଜର ରଖିଛନ୍ତି । କ୍ୱାରେଣ୍ଟିନ୍ ନିୟମ ଭାଙ୍ଗିରେ ନିସ୍ତାର ନାହିଁ ଓ ପ୍ରଶାସନର ଧୈର୍ଯ୍ୟକୁ ଅଯଥାରେ ପରୀକ୍ଷା ନକରିବାକୁ ଚେତାଇ ଦେଇଛନ୍ତି ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ।
Comments are closed.