ଓଡ଼ିଆ ଶିଳ୍ପୋଦ୍ୟୋଗୀ ଶୁଭ୍ରକାନ୍ତ ପଣ୍ଡା ‘ଫିକି’ର ଉପ ସଭାପତି ନିର୍ବାଚିତ

ନୂଆଦିଲ୍ଲୀ: ୨୦୨୦-୨୧ ବର୍ଷ ପାଇଁ ଅନୁଷ୍ଠିତ ନିର୍ବାଚନରେ  ଓଡ଼ିଆ ଶିଳ୍ପୋଦ୍ୟୋଗୀ ତଥା ଇଣ୍ଡିଆନ୍ ମେଟାଲ୍ସ ଆଣ୍ଡ ଫେରୋ ଆଲୟଜ ଲିମିଟେଡ୍ (ଇମ୍ଫା)ର ପରିଚାଳନା ନିର୍ଦ୍ଦେଶକ ଶୁଭ୍ରକାନ୍ତ ପଣ୍ଡା ଏଫଆଇସିସିଆଫେଡେରେସନ୍ ଅଫ୍ ଇଣ୍ଡିଆନ୍ ଚାମ୍ବରସ୍ ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରି  (ଫିକି)ର ସର୍ବଭାରତୀୟ  ଉପସଭାପତି ରୂପେ ନିର୍ବାଚିତ ହୋଇଛନ୍ତି । ସେହିପରି ୱାର୍ଲଡ଼ ଡ଼ିଜନୀ କମ୍ପାନୀ ଏପିଏସି ତଥା ଷ୍ଟାର ଏଣ୍ଡ ଡ଼ିଜନୀ ଇଣ୍ଡିଆର ଅଧ୍ୟକ୍ଷ ଉଦୟ ଶଙ୍କର ଫିକିର ସଭାପତି ଏବଂ ହିନ୍ଦୁସ୍ତାନ ୟୁନିଲିଭର ଲିଃର ସିଏମଡ଼ି ସଞ୍ଜୀବ ମେହେଟ୍ଟା ବରିଷ୍ଠ ଉପସଭାପତି ରୂପେ ନିର୍ବାଚିତ ହୋଇଛନ୍ତି ।  କରୋନା ମହାମାରୀ ଯୋଗୁଁ ନିମ୍ନଗାମୀ ଆର୍ଥିକ ଅଭିବୃଦ୍ଧି କାଳରେ ଫିକି ପରି ଏକ ସଂସ୍ଥାର ଶୀର୍ଷ ପଦ ହାସଲ କରିଥିବା ବ୍ୟକ୍ତିବିଶେଷଙ୍କ ଠାରୁ ଦେଶ ଅନେକ କିଛି ଆଶା କରେ ଏବଂ ସେମାନଙ୍କର ପୂର୍ବ ଅଭିଜ୍ଞତା ଫିକି ଓ ସରକାରଙ୍କୁ ସହାୟକ ହେବ ବୋଲି ଶିଳ୍ପ ସମୁଦାୟ ଆଶାପ୍ରକାଶ କରିଛନ୍ତି ।

୧୯୯୩ ମସିହାରେ ଇମଫା ଗ୍ରୁପରେ ଯୋଗ ଦେବା ପରେ ଶୁଭ୍ରକାନ୍ତ ପଣ୍ଡା ବିଭିନ୍ନ ଗୁରୁତ୍ବପୂର୍ଣ୍ଣ ଦାୟିତ୍ବ ଗ୍ରହଣ କରିଛନ୍ତି । ୨୦୦୬ ମସିହାରେ ସେ ପରିଚାଳନା ନିର୍ଦେଶକ ଭାବରେ ନିଯୁକ୍ତି ପାଇଥିଲେ ସେ ଫେଡେରେସନ୍ ଅଫ୍ ଇଣ୍ଡିଆନ୍ ଚାମ୍ବରସ୍ ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରି (FICCI) ସହିତ ସକ୍ରିୟ ଭାବରେ ଜଡିତ ଅଛନ୍ତି । ପୂର୍ବରୁ ସେ  ପରିଚାଳନା କମିଟିର ସଦସ୍ୟ ତଥା ଜାତୀୟ ଉତ୍ପାଦନ କମିଟିର ଚେୟାରମ୍ୟାନ୍ଓ  ଏହା ପୂର୍ବରୁ ଓଡ଼ିଶା ରାଜ୍ୟ ପରିଷଦର ଚେୟାରମ୍ୟାନ୍ ଭାବରେ କାର୍ଯ୍ୟ କରିଛନ୍ତି।

ଶ୍ରୀ ପଣ୍ଡା ଇଣ୍ଟରନ୍ୟାସନାଲ ଚାମ୍ବର ଅଫ୍ କମର୍ସ – ଇଣ୍ଡିଆ ଅଧ୍ୟାୟର ସଭାପତି (୧୯୧୭-୧୮) ଥିଲେ ଏବଂ ପ୍ୟାରିସ୍ ଭିତ୍ତିକ ଆନ୍ତର୍ଜାତୀୟ କ୍ରୋମିୟମ୍ ଡେଭଲପମେଣ୍ଟ ଆସୋସିଏସନ୍ (ଆଇସିଡିଏ) ର ସଭାପତି ଭାବରେ ନିର୍ବାଚିତ ହେବାରେ ତୃତୀୟ ଭାରତୀୟ । ଶିଳ୍ପ ପରିଚାଳନା କ୍ଷେତ୍ରରେ ଉଲ୍ଲେଖନୀୟ ସଫଳତା ଲାଗି ତାଙ୍କୁ ବେଟା ଗାମା ସିଗମା ସମ୍ମାନ, ସୋସାଇଟି ଫର କଲେଜିୟଟ୍ ସ୍କୁଲ୍ ଅଫ୍ ବିଜିନେସ୍, ଗୋଲ୍ଡେନ୍ କି ଜାତୀୟ ସମ୍ମାନ ସମାଜ ଏବଂ ଆମେରିକୀୟ ବିଶ୍ୱବିଦ୍ୟାଳୟ ସମ୍ମାନରେ ସମ୍ମାନିତ ହୋଇଛନ୍ତି ।

ଫିକିର ନବ ନିର୍ବାଚିତ ସଭାପତି ଉଦୟ ଶଙ୍କର ବର୍ତମାନ ସମୟକୁ ଏକ କଠୋର ସମୟ ରୂପେ ବର୍ଣନା କରିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କରୋନା କାରବାର କରିବାରେ ଭାରତ ବିଶ୍ବକୁ ନୂତନ ରାସ୍ତା ଦେଖାଇଥିବା ନେଇ ଯେଉଁ ଅଭିଭାଷଣ ପ୍ରଦାନ କରିଛନ୍ତି ତାହାକୁ ପ୍ରଶଂସା କରିଛନ୍ତି । ଏହା ଫିକି ସଦସ୍ୟମାନଙ୍କ ମଧ୍ୟରେ ଆତ୍ମବିଶ୍ବାସ ସୃଷ୍ଟି କରିଥିବା ଉଦୟଶଙ୍କର କହିଛନ୍ତି । ସେ ପୁଣି କହିଛନ୍ତି ଯେ ସରକାରଙ୍କୁ ତଥ୍ୟଗତ ସହଯୋଗ କରିବା, ଅଭିବୃଦ୍ଧିର ଗତିଶୀଳତାକୁ ତୀବ୍ରତର କରିବା ଓ ଜାତୀୟ ଜିଡ଼ିପିକୁ ପୁନର୍ବାର ୮%ରୁ ୧୦% ପର୍ଯ୍ୟନ୍ତ ଫେରାଇ ଆଣିବା କ୍ଷେତ୍ରରେ ଫିକି କାର୍ଯ୍ୟ କରିବ ବୋଲି ଉଦୟଶଙ୍କର କହିଛନ୍ତି ।

Comments are closed.