ନୂଆଦିଲ୍ଲୀ : ଖାଲିସ୍ଥାନ ନେତା ଗୋପାଳ ସିଂହ ଚାୱଲା ଓ ପଞ୍ଜାବ ମନ୍ତ୍ରୀ ନବଜୋତ ସିଂହ ସିଧୁଙ୍କ ଫଟୋକୁ ନେଇ ପଞ୍ଜାବ ରାଜନୀତିରେ ହଇଚଇ ସୃଷ୍ଟି ହୋଇଛି। ଖାଲିସ୍ଥାନ ନେତା ଗୋପାଳ ସିଂହ ଚାୱଲା ଗୁରୁବାର ନିଜ ଫେସ୍ବୁକ୍ ଆକାଉଣ୍ଟରେ ଏହି ଫଟୋ ଅପଲୋଡ଼ କରିଛି। ଏହାକୁ ନେଇ ଅକାଳି ଦଳ ରାଜ୍ୟ ମନ୍ତ୍ରୀ ପଦରୁ ସିଧୁଙ୍କୁ ଇସ୍ତଫା ଦାବି କରିଛନ୍ତି । ଦିଲ୍ଲୀର ଅକାଳି ଦଳ ବିଧାୟକ ମନଜିନ୍ଦର ସିଂହ ସିର୍ସା ଏନେଇ ଏକ ଟ୍ୱିଟ୍ କରି କହିଛନ୍ତି ଯେ ‘ଗୋଟିଏ ଗ୍ରୁପ ଫଟୋରେ ନରେନ୍ଦ୍ର ମୋଦୀଙ୍କଠାରୁ ବହୁତ ଦୂରରେ ଥିବା ନିରବ ମୋଦୀଙ୍କୁ ନେଇ ହଙ୍ଗାମା କରୁଥିବା କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଏହି ଫଟୋକୁ ନେଇ କ’ଣ କହିବେ। ସେ ମୋଦୀଙ୍କୁ କ୍ଷମା ମାଗନ୍ତୁ, ନଚେତ୍ ସିଧୁଙ୍କୁ ଦଳରୁ ନିଲମ୍ବନ କରନ୍ତୁ।
ଉଲ୍ଲେଖଯୋଗ୍ୟ ଯେ କରତାରପୁର କରିଡର ଭିତ୍ତିପ୍ରସ୍ତର ସ୍ଥାପନ କାର୍ଯ୍ୟକ୍ରମରେ ପଞ୍ଜାବ ମନ୍ତ୍ରୀ ତଥା କଂଗ୍ରେସ ନେତା ନବଜୋତ ସିଂହ ସିଧୁ ଯୋଗ ଦେଇଥିଲେ। ପ୍ରଧାନମନ୍ତ୍ରୀ ଇମ୍ରାନ ଖାଁ ଭାରତ ସହିତ ଶାନ୍ତି ସ୍ଥାପନ କଥା କହୁଥିଲାବେଳେ ପାକିସ୍ତାନ ସେନାଧ୍ୟକ୍ଷ କାମାର ବାଜୱା ଖାଲିସ୍ଥାନ ନେତା ଗୋପାଳ ସିଂହ ଚାୱଲାଙ୍କୁ କୋଳାଗ୍ରତ ପୂର୍ବକ ଖୁସିଗପ କରୁଥିବା ଦେଖିବାକୁ ମିଳିଥିଲା। ଗୋପାଳ ଚାୱଲାର କୁଖ୍ୟାତ ଲସ୍କର-ଇ-ତୋଇବା ଆତଙ୍କବାଦୀ ହାଫିଜ ସୟିଦ ଓ ପାକିସ୍ତାନୀ ଗୁଇନ୍ଦା ସଂସ୍ଥା ଆଇଏସ୍ଆଇ ସହିତ ଉତ୍ତମ ସମ୍ପର୍କ ରହିଛି। ଅମୃତସରଠାରେ ନିରଙ୍କରୀ ଭକ୍ତ ସମ୍ମିଳନୀ ଉପରେ ଗ୍ରେନେଡ଼ ମାଡ଼ ଘଟଣାରେ ଖଲିସ୍ଥାନୀଙ୍କ ସମ୍ପୃକ୍ତି ସ୍ପଷ୍ଟ ହୋଇଥିଲାବେଳେ ସିଧୁଙ୍କ ସହ ତାଙ୍କ ଫଟୋ ଚର୍ଚ୍ଚାର ବିଷୟ ହୋଇଛି।
