ହାଇଦ୍ରାବାଦ: ଯୁଗ୍ମ ପ୍ରବେଶିକା ପରୀକ୍ଷା(ଜେଇଇ)ରେ ବିଫଳ ହେବା ପରେ ଜଣେ ଛାତ୍ର ନିଜକୁ ଗୁଳି କରି ଆତ୍ମହତ୍ୟା କରିଛନ୍ତି। ଏହି ୨୧ ବର୍ଷୀୟ ଛାତ୍ରଙ୍କ ଘର ତେଲେଙ୍ଗାନାର ସିକନ୍ଦରାବାଦ ଅନ୍ତର୍ଗତ ମାଲକାଜଗିରି ସହରରେ। ମଙ୍ଗଳବାର ସକାଳେ ସେ ବାପାଙ୍କ ବନ୍ଧୁକରୁ ନିଜକୁ ଗୁଳି କରି ଏଭଳି ପଦକ୍ଷେପ ନେଇଥିବା ପୁଳିସ କହିଛନ୍ତି।
ମଙ୍ଗଳବାର ପୁଲିସ ସମ୍ପୃକ୍ତ ଛାତ୍ରଙ୍କ ମୃତଦେହ ତାଙ୍କ ଘରୁ ଜବତ କରିଛି। ତାଙ୍କ ନାମ ହେଉଛି ସାହିଲ। ଛାତ୍ର ଜଣକ ନିଜ ମୁଣ୍ଡକୁ ଗୁଳି କରିଥିବା ଜଣାପଡ଼ିଛି। ମୃତଦେହ ପଡ଼ିରହିଥିବା ବେଡ୍ଟି ରକ୍ତରଞ୍ଜିତ ହୋଇପଡ଼ିଛି। ଛାତ୍ରଙ୍କ ବାପା ଜଣେ ଅବସରପ୍ରାପ୍ତ ସେନା କର୍ମଚାରୀ। ଅବସର ପରେ ସେ ଏକ ଘରୋଇ ବ୍ୟାଙ୍କରେ ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରୁଛନ୍ତି ବୋଲି ପୁଲିସ ଇନ୍ସପେକ୍ଟର ଏ. ନରସିହ୍ମା ସ୍ବାମୀ କହିଛନ୍ତି।
ପୁଲିସ ସୂଚନା ମୁତାବକ, ସାହିଲ ନିକଟରେ ସିବିଏସଇ ଦ୍ବାଦଶ ପରୀକ୍ଷା ଦେଇଥିଲେ। ଆଇଆଇଟିରେ ପଢ଼ିବା ଲାଗି ସେ ପ୍ରସ୍ତୁତି କରିବା ସହ ଜେଇଇ ଦେଇଥିଲେ। କିନ୍ତୁ ସୋମବାର ଫଳାଫଳ ପ୍ରକାଶ ପାଇବାରେ ସେ ପରୀକ୍ଷାରେ ବିଫଳ ହୋଇଥିବା ଜାଣିପାରିଥିଲେ। ଏଥିପାଇଁ ବାପା ତାଙ୍କୁ ଗାଳି କରିଥିଲେ। ଏଥିରେ ହତୋତ୍ସାହିତ ହୋଇ ସେ ଏଭଳି ପଦକ୍ଷେପ ନେଇଥିବା ସନ୍ଦେହ କରାଯାଉଛି। ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି।
Comments are closed.