ତୁର୍କୀକୁ ଭାରତର ଚେତାବନୀ: ମନ୍ତବ୍ୟ ଦେବା ବେଳେ ସଞ୍ଜତ ଓ ସତର୍କ ରୁହ

ନୂଆଦିଲ୍ଲୀ:  କୌଣସି ମନ୍ତବ୍ୟ ଦେବା ବେଳେ ସଞ୍ଜତ ଓ ସତର୍କ ରହିବାକୁ ତୁର୍କୀକୁ ଚେତାବନୀ ଦେଇଛି ଭାରତ । ଜାମ୍ମୁକାଶ୍ମୀରରୁ ଧାରା ୩୭୦ ଉଚ୍ଛେଦ ପ୍ରସଙ୍ଗରେ ତୁର୍କୀ ପକ୍ଷରୁ ଦିଆଯାଇଥିବା ମନ୍ତବ୍ୟ ଆଧାରରେ ଭାରତ ଏପରି ଚେତାବନୀ ଦେଇଛି । ଭାରତ ପକ୍ଷରୁ କୁହାଯାଇଛି ତୁର୍କୀ ଜାମ୍ମୁକାଶ୍ମୀର ପ୍ରସଙ୍ଗରେ ଦେଇଥିବା ମନ୍ତବ୍ୟ ଅନାବଶ୍ୟକ, ତଥ୍ୟଗତ ଭ୍ରମପୂର୍ଣ୍ଣ ଓ ପକ୍ଷପାତପୂର୍ଣ । ଗୁରୁବାର ଭାରତୀୟ ବିଦେଶ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଭାରତର ଆଭ୍ୟନ୍ତରୀଣ ପ୍ରସଙ୍ଗ, ଭୂମିଗତ ସ୍ଥିତି ସମ୍ପର୍କରେ ନ ଜାଣି ତୁର୍କୀ କୌଣସି ମନ୍ତବ୍ୟ ଦେବା ଅନୁଚିତ । ଏଠାର ସ୍ଥିତି ସମ୍ପର୍କରେ ଜାଣିବା ପରେ କୌଣସି ମନ୍ତବ୍ୟ ଦେବା ଉଚିତ  ହେବ ବୋଲି ଭାରତ ତୁର୍କୀକୁ ଚେତାଇ ଦେଇଛି ।

It’s factually incorrect,biased & unwarranted. Would urge Govt of Turkey to get a proper understanding of ground situation & refrain from interfering in matters internal to India: MEA on statement by Govt of Turkey that Article 370 abrogation doesn’t contribute to peace in region pic.twitter.com/YXlIH2O9f2

— ANI (@ANI) August 6, 2020

କିଛିଦିନ ତଳେ ତୁର୍କୀ ରାଷ୍ଟ୍ରପତି ରେସେପ ତୈୟପ ଏର୍ଦୋଆନ କାଶ୍ମୀର ଘଟଣାକୁ ପାଲେଷ୍ଟାଇନ ସହ ତୁଳନା କରି ଏଠାରେ କରୋନା ସଙ୍କଟ କାଳରେ ଅତ୍ୟାଚାର ଚାଲିଥିବା ଅଭିଯୋଗ କରିଥିଲେ । ଇଦ୍ ଅବସରରେ ଏର୍ଦୋଆନ ପାକ୍ ରାଷ୍ଟ୍ରପତି ଆରିଫ ଅଲ୍ଭି ଓ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ସହ କଥାବାର୍ତା କରିବା ଅବସରରେ କାଶ୍ମୀର ପ୍ରସଙ୍ଗରେ ପାକିସ୍ଥାନର ଆଭିମୁଖ୍ୟକୁ ସମର୍ଥନ କରିଥିବା ଚର୍ଚା ହୋଇଥିଲା । କେବଳ ସେତିକି ନୁହେଁ କାଶ୍ମୀରକୁ ନେଇ ପାକିସ୍ଥାନ ସହ ତୁର୍କୀ ଠିଆ ହୋଇଥିବା ଆଶ୍ଵାସନା ଦେଇଥିବା ପାକିସ୍ଥାନର ପ୍ରମୁଖ ଖବରକାଗଜ ‘ଡ଼ନ୍’ରେ ପ୍ରକାଶିତ ହୋଇଥିଲା ।