ଶ୍ରୀଲଙ୍କା କହିଲା ଆମ ପାଇଁ ’ପ୍ରଥମେ ଭାରତ’: ଚୀନକୁ ହବନଟୋଟା ବନ୍ଦର ଦିଆଯିବା ଥିଲା ଭୁଲ ନିଷ୍ପତ୍ତି

ଭାରତ ସହ ସମ୍ପର୍କକୁ ଅଧିକ ଦୃଢ଼ କରିବାକୁ ଉଦ୍ୟମ ଆରମ୍ଭ କରିଛି ଶ୍ରୀଲଙ୍କା । ବିଦେଶ ସଚିବ ଜୟନାଥ କୋଲବେଜ କହିଛନ୍ତି ଯେ ଶ୍ରୀଲଙ୍କା ଏକ ନିର୍ଦିଷ୍ଟ ବିଦେଶନୀତିକୁ ନେଇ ଆଗକୁ ବଢ଼ିବାକୁ ଚାହୁଁଛି ଏବଂ ରାଜନୈତିକ ଓ ପ୍ରତିରକ୍ଷା କ୍ଷେତ୍ରରେ ଭାରତ ଆମ ପାଇଁ ପ୍ରଥମ, ଅର୍ଥାତ୍ ‘ଇଣ୍ଡିଆ ଫାଷ୍ଟ’ ।
ଶ୍ରୀଲଙ୍କାର ଏକ ଟିଭି ଚ୍ୟାନେଲ ସହ ଆଲୋଚନା କାଳରେ କୋଲମ୍ବେଜ କହିଛନ୍ତି ଯେ ରାଷ୍ଟ୍ରପତି ଗୋଟବାୟା ରାଜପକ୍ଷେ ଭାରତ ପ୍ରତି ବିଶେଷ ଅନୁରାଗ ପୋଷଣ କରିଛନ୍ତି । ଭାରତର ପ୍ରତିରକ୍ଷା ନିମନ୍ତେ ଆମେ କେବେହେଲେ ବିପଦ ହେବୁନାହିଁ କିମ୍ବା ହେବା ପାଇଁ ଚାହିଁବୁ ନାହିଁ । ଭାରତଠାରୁ ଆମକୁ ଲାଭାନ୍ବିତ ହେବାର ଅଛି । ରାଷ୍ଟ୍ରପତି ରାଜପ​‌କ୍ଷେ ଭାରତ ଆମ ପାଇଁ ପ୍ରଥମ ପ୍ରାଥମିକତା, ମାତ୍ର ଦେଶର ଆର୍ଥିକ ସମୃଦ୍ଧି ଦୃଷ୍ଟିକୁ ଅନ୍ୟମାନଙ୍କ ସହ ଆମ ଦେଶ ଭଲ ସମ୍ପର୍କ ରଖିବାକୁ ମଧ୍ୟ ପ୍ରୟାସ କରିବ । ଏହି ଅବସରରେ ସେ ଦେଶର ବୈଦେଶିକ ନୀତି ସମ୍ପର୍କରେ କହିବା ସହ ଶ୍ରୀଲଙ୍କାର ହମ୍ବନଟୋଟା ବନ୍ଦରକୁ ୯୯ ବର୍ଷ ପାଇଁ ଚୀନକୁ ଲିଜ୍ ଦେବା ଏକ ଭୁଲ ନି​‌ଷ୍ପତ୍ତି ବୋଲି କୋଲମ୍ବେଜ କହିଛନ୍ତି ।

ସୂଚନାଯୋଗ୍ୟ ଯେ ଭାରତର ବିଦେଶ ମନ୍ତ୍ରୀ ଏସ୍.ଜୟଶଙ୍କର ନିକଟରେ ଶ୍ରୀଲଙ୍କା ବିଦେଶ ମନ୍ତ୍ରୀ ଦୀନେଶ ଗୁଣବର୍ଧନେଙ୍କ ସହ ଆଲୋଚନା କରିଛନ୍ତି । ପୂର୍ବରୁ ରାଜପକ୍ଷେ ସରକାର ଭାରତ ତୁଳନାରେ ଚୀନ ପ୍ରତି ଅଧିକ ନିକଟତର ହୋଇଥିଲା, ଯାହା ଫଳରେ ଶ୍ରୀଲଙ୍କା-ଭାରତ ସମ୍ପର୍କ କିଛି ପରିମାଣରେ ପ୍ରଭାବିତ ହୋଇଥିଲା । ଭାରତ- ଶ୍ରୀଲଙ୍କା ମଧ୍ୟରେ କଣ୍ଟେନର ଟର୍ମିନାଲ ପ୍ରସଙ୍ଗ ସବୁଠାରୁ ଗୁରୁତ୍ବପୂର୍ଣ୍ଣ, ଯେଉଁ ପ୍ରକଳ୍ପକୁ ସ୍ଥାନୀୟ ଲୋକମାନେ ବିରୋଧ କରୁଛନ୍ତି । ଶ୍ରୀଲଙ୍କା ଏହି ପ୍ରସଙ୍ଗରେ ଭାରତର ସ୍ବାର୍ଥ ରକ୍ଷାରେ ସହଯୋଗ କରିବ ବୋଲି ପ୍ରତିଶ୍ରୁତି ଦେଇଛି । ମାତ୍ର ଏହା ଉପରେ କୌଣସି ଔପଚାରିକ ଘୋଷଣା ହୋଇନାହିଁ।