କିଙ୍ଗଷ୍ଟନ: କ୍ରମାଗତ ୨ୟ ଟ୍ବେଣ୍ଟି୨୦ ମ୍ୟାଚ୍ରେ ଉଭୟ ବ୍ୟାଟିଂ ଓ ବୋଲିଂରେ ପ୍ରାଧାନ୍ୟ ବିସ୍ତାରକରି ଘରୋଇ ୱେଷ୍ଟଇଣ୍ଡିଜ୍ ବିପକ୍ଷ ୨ୟ ଟ୍ବେଣ୍ଟି୨୦ ମ୍ୟାଚ୍କୁ ନ୍ୟୁଜିଲାଣ୍ଡ ଜିତିନେଇଛି। ଶୁକ୍ରବାର ରାତିରେ ଖେଳା ଯାଇଥିବା ଏହି ମ୍ୟାଚ୍କୁ ୯୦ ରନ୍ର ବିପୁଳ ବ୍ୟବଧାନରେ ଜିତି ନ୍ୟୁଜିଲାଣ୍ଡ ୨-୦ରେ ଆଗୁଆ ରହିଛି। ଫଳରେ ୩ ମ୍ୟାଚ୍ର ଟି୨୦ ଶୃଙ୍ଖଳାକୁ ନ୍ୟୁଜିଲାଣ୍ଡ ହାତେଇ ନେଇଛି। ସୋମବାର ୩ୟ ତଥା ଅନ୍ତିମ ଟ୍ବେଣ୍ଟି୨୦ ମ୍ୟାଚ୍ ଖେଳାଯିବ। ଗ୍ଲେନ୍ ଫିଲିପ୍ସଙ୍କ ବିସ୍ଫୋରକ ଅର୍ଦ୍ଧଶତକ ବଳରେ ପ୍ରଥମେ ବ୍ୟାଟିଂକରି ୫ ୱିକେଟରେ ବିଶାଳ ୨୧୫ ରନ୍ କରିଥିଲା। ପରେ ବ୍ୟାଟିଂ ବିପର୍ଯ୍ୟୟ ଭୋଗି ୱେଷ୍ଟଇଣ୍ଡିଜ୍ ୯ ୱିକେଟରେ ମାତ୍ର ୧୨୫ ରନ୍ କରି ପାରିଥିଲା।
ନ୍ୟୁଜିଲାଣ୍ଡ ଟସ୍ ଜିତି ବ୍ୟାଟିଂ ନେବା ପରେ ଓପ୍ନର ମାର୍ଟିନ ଗପ୍ଟିଲ ୨୦ ରନ୍କରି ଆଉଟ୍ ହୋଇଥିଲେ। ଅଧିନାୟକ କେନ୍ ୱିଲିୟମ୍ସନ ୪ ରନ୍ କରି ପାରିଥିଲେ। ୩ୟ ୱିକେଟ ପାଇଁ ଓପ୍ନର ଡେଭନ୍ କନ୍ୱେ ଓ ଗ୍ଲେନ୍ ଫିଲିପ୍ସ ୭୧ ରନ୍ ଯୋଡ଼ିଥିଲେ। ବାମହାତି କନ୍ୱେ ୩୪ ବଲ୍ରୁ ୩ଟି ଛକା ଓ ୨ଟି ଚୌକା ସହ ୪୨ ରନ୍ କରିଥିଲେ। ୧୩ ଓଭରରେ ନ୍ୟୁଜିଲାଣ୍ଡ ୧୧୯ ରନ୍ କରିଥିବା ବେଳେ ଶେଷ ୭ ଓଭରରୁ ଏହା ୯୬ ରନ୍ ନେଇଥିଲା। ଏହା ସମ୍ଭବ ହୋଇଥିବା ଫିଲ୍ପ୍ସ ଓ ଡ୍ୟାରିଲ୍ ମିଚେଲଙ୍କ ପ୍ରହାର ଯୋଗୁଁ ନ୍ୟୁଜିଲାଣ୍ଡ ୧୧୫ ରନ୍େର ପହଞ୍ଚି ପାରିଥିଲେ। ମିଚେଲ ମାତ୍ର ୨୦ ବଲ୍ରୁ ୪ଟି ଛକା ଓ ୨ଟି ଚୌକା ସହ ୪୮ ରନ୍ କରିଥିଲେ।
ଗ୍ଲେନ୍ ଫିଲିପ୍ସ ୪୧ ବଲ୍ରୁ ୬ଟି ଛକା ଓ ୪ଟି ଚୌକା ସହ ୭୬ ରନ୍ କରିଥିଲେ। ଓବେଡ୍ ମ୍ୟାକ୍କୟ ୩ଟି ୱିକେଟ ନେଇଥିଲେ। ୨୧୬ ରନ୍ ଲକ୍ଷ୍ୟେର ୱେଷ୍ଟଇଣ୍ଡିଜ୍ ୪୦ ରନ୍ରେ ୬ଟି ୱିକେଟ ହରାଇବା ପରେ ଏହାର ପରାଜୟ ନିଶ୍ଚିତ ଲାଗୁଥିଲା। ୱେଷ୍ଟଇଣ୍ଡିଜ୍ ଏପରି ଦୟନୀୟ ବ୍ୟାଟିଂ କରିଥିଲା ଯେ ଏହାର ୧୧ନଂ ବ୍ୟାଟ୍ସମ୍ୟାନ୍ ଓବେଡ୍ ମ୍ୟାକ୍କୟ ସର୍ବାଧିକ ୨୩ ରନ୍ କରିଥିଲେ। ରୋଭ୍ମ୍ୟାନ ପୱେଲ ୨୧ ଓ ରୋମାରିଓ ସେଫର୍ଡ ୧୮ ରନ୍ କରିଥିଲେ। ମାଇକେଲ ବ୍ରେସ୍ୱେଲ ଓ ମିଚେଲ ସାଣ୍ଟନର ୩ଟି ଲେଖାଏଁ ୱିକେଟ ନେଇଥିଲେ। ଗ୍ଲେନ୍ ଫିଲିପ୍ସ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ।
Comments are closed.