ନୂଆଦିଲ୍ଲୀ : ଦକ୍ଷିଣ-ପଶ୍ଚିମ ମୌସୁମି ବାୟୁ ସାରା ଦେଶକୁ ଛୁଇଁଛି। ସାଧାରଣତଃ ଜୁଲାଇ ୮ ତାରିଖ ସୁଦ୍ଧା ଦେଶର ସମସ୍ତ ଅଞ୍ଚଳରେ ମୌସୁମିବାୟୁ ପ୍ରବେଶ କରିଥାଏ ; କିନ୍ତୁ ଚଳିତ ବର୍ଷ ନିର୍ଦ୍ଧାରିତ ସମୟର ୧୨ ଦିନ ଆଗରୁ ମୌସୁମି ବାୟୁ ଦେଶର ସମଗ୍ର ଅଞ୍ଚଳରେ ଅନୁଭୂତ ହୋଇଛି ବୋଲି ଭାରତୀୟ ପାଣିପାଗ ବିଭାଗ କହିଛି।
୨୦୧୩ ମସିହାରେ ଦକ୍ଷିଣ-ପଶ୍ଚିମ ମୌସୁମି ବାୟୁ ଜୁନ୍ ମାସ ୧୬ ତାରିଖରେ ସମଗ୍ର ଦେଶରେ ଅନୁଭୂତ ହୋଇଥିଲା। ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହେବା ଯୋଗୁଁ ମୌସୁମି ବାୟୁ ଶୀଘ୍ର ଦେଶର ଅବଶିଷ୍ଟ ଅଞ୍ଚଳରେ ଅନୁଭୂତ
ହେବାପାଇଁ ଅନୁକୂଳ ବାତାବରଣ ସୃଷ୍ଟି ହୋଇଥିଲା। ତା’ଛଡ଼ା ମଧ୍ୟ-ଭାରତରେ ଏକ ଘୂର୍ଣ୍ଣିବାତ୍ୟା ମୌସୁମି ବାୟୁ ଶୀଘ୍ର ଦେଶର ଅନ୍ୟାନ୍ୟ ଭାଗକୁ ପହଞ୍ଚିବାରେ ସାହାଯ୍ୟ କରିଥିଲା। ପାଣିପାଗ ବିଭାଗ କହିଛି, ରାଜସ୍ଥାନ, ହରିୟାଣା ଓ ପଞ୍ଜାବର ଅବଶିଷ୍ଟ ଅଞ୍ଚଳରେ ମୌସୁମୀ ବାୟୁ ପ୍ରବେଶ କରିସାରିଛି। ମୌସୁମି ଗତ ୨୪ ଘଣ୍ଟା ଭିତରେ ପଶ୍ଚିମ ରାଜସ୍ଥାନ ଓ ଏହାସହ ଲାଗିଥିବା ପଞ୍ଜାବ ଓ ହରିୟାଣାର ଅବଶିଷ୍ଟ ଅଞ୍ଚଳରେ ବ୍ୟାପକ ବର୍ଷା ହୋଇଛି।