ପହିଲାରୁ ଖୋଲିବ ଶିମିଳିପାଳ

ବାରିପଦା : ଦେଶର ଅଷ୍ଟମ ଜୈବମଣ୍ଡଳ ଭାବେ ପରିଚିତ ଶିମିଳିପାଳ ଆସନ୍ତା ନଭେମ୍ବର ପହିଲାରୁ ପର୍ଯ୍ୟଟକଙ୍କ ଲାଗି ଖୋଲିବ। ପର୍ଯ୍ୟଟକଙ୍କ ପାଇଁ ଶିମିଳିପାଳ ଆକର୍ଷଣର କେନ୍ଦ୍ରବିନ୍ଦୁ ରହିଛି। ରାଜ୍ୟ, ଦେଶ ତଥା ବିଦେଶରୁ ପ୍ରତିବର୍ଷ ସହସ୍ରାଧିକ ପର୍ଯ୍ୟଟକ ଏଠାକୁ ଆସି ଜୀବଜନ୍ତୁ ସହିତ ନଦୀ, ଝରଣା, ଜଳପ୍ରପାତ ତଥା ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିଥାନ୍ତି। ଚଳିତବର୍ଷ କୋଭିଡ କଟକଣା ପାଇଁ ଗତ ପର୍ଯ୍ୟଟନ ଋତୁର ଜୁନ୍‍ ୧୫ ତାରିଖରେ ବନ୍ଦ ହେବାର ଥିଲେ ମଧ୍ୟ ବହୁ ଆଗରୁ ପର୍ଯ୍ୟଟକଙ୍କ ପ୍ରବେଶକୁ ନିଷେଧ କରି ଦିଆଯାଇଥିଲା। ପର୍ଯ୍ୟଟକଙ୍କ ପାଇଁ ଶିମିଳିପାଳରେ ଥିବା ବିଭିନ୍ନ କଟେଜ ତଥା ପର୍ଯ୍ୟଟକ ବଙ୍ଗଳାଗୁଡିକରେ ରହିବା ପାଇଁ ଅନ୍‍ଲାଇନ ଅଗ୍ରୀମ ବୁକିଂ ସୁବିଧା ରହିଛି। ଶିମିଳିପାଳରେ ପର୍ଯ୍ୟଟକଙ୍କ ପାଇଁ ଆଦିବାସୀ ଖାଦ୍ୟର ମଧ୍ୟ ବ୍ୟବସ୍ଥା ରହିଛି ଏବଂ ପର୍ଯ୍ୟଟକମାନେ ଚାହିଁଲେ ଏହାର ସ୍ୱତନ୍ତ୍ର ସ୍ୱାଦ ପାଇପାରିବେ। ଏବର୍ଷ ଶୀତ ଶୀଘ୍ର ଅନୁଭୂତ ହେଉଥିବାରୁ ନଭେମ୍ବର ଓ ଡିସେମ୍ବରରେ ଶିମିଳିପାଳରେ ପର୍ଯ୍ୟଟକଙ୍କ ଭିଡ ରହିବ। ଏଠାରେ ସ୍ୱତନ୍ତ୍ରଭାବେ ପର୍ଯ୍ୟଟନ ଡିଏଫଓ ରହିବାର ବ୍ୟବସ୍ଥା ଥିଲେ ମଧ୍ୟ ଏପର୍ଯ୍ୟନ୍ତ ତାହା କାର୍ଯ୍ୟକାରୀ ହେଉ ନ ଥିବାରୁ ସେ ଦିଗରେ ତୁରନ୍ତ ପଦକ୍ଷେପ ନିଆଯିବାକୁ ଜନସାଧାରଣଙ୍କ ପକ୍ଷରୁ ଦୃଢ ଦାବି ହେଉଛି।

Comments
Loading...