ନେପାଳ କଂଗ୍ରେସ ଅଧ୍ୟକ୍ଷ ଶେର ବାହାଦୂର ଦେଓବା ପଞ୍ଚମ ଥର ପାଇଁ ମଙ୍ଗଳବାର ଦେଶର ପ୍ରଧାନମନ୍ତ୍ରୀ ହୋଇଛନ୍ତି। ହିମାଳୟ ଟାଇମ୍ସ ରିପୋର୍ଟ ଅନୁଯାୟୀ, ରାଷ୍ଟ୍ରପତି ବିଦ୍ୟା ଭଣ୍ଡାରୀ ତାଙ୍କୁ ସମ୍ବିଧାନର ଧାରା ୭୬ (୫) ଅନୁଯାୟୀ ପ୍ରଧାନମନ୍ତ୍ରୀ ଭାବେ ନିଯୁକ୍ତ କରିଛନ୍ତି।
ପଞ୍ଚମ ଥର ପାଇଁ ୭୪ ବର୍ଷିୟ ଦେଓବା ନେପାଳର ପ୍ରଧାନମନ୍ତ୍ରୀ ଭାବରେ କ୍ଷମତାକୁ ଫେରିଛନ୍ତି। ତାଙ୍କ ନିଯୁକ୍ତି ବର୍ତ୍ତମାନର କେ ପି ଶର୍ମା ଓଲିଙ୍କ ସ୍ଥାନରେ ଦାବି ଉପସ୍ଥାପନ କରିବାକୁ ସୁପ୍ରିମକୋର୍ଟଙ୍କ ଦ୍ୱାରା ସୋମବାର ଜାରି କରାଯାଇଥିବା ରାୟ ସହିତ ଅନୁରୂପ ଅଟେ। ରାଷ୍ଟ୍ରପତିଙ୍କ କାର୍ଯ୍ୟାଳୟ ଦେଓବାଙ୍କୁ ତାଙ୍କ ନିଯୁକ୍ତି ସମ୍ପର୍କରେ ଅବଗତ କରାଇଛି ବୋଲି ରିପୋର୍ଟରେ କୁହାଯାଇଛି। ଏହାର ପ୍ରସ୍ତୁତି ପାଇଁ ଉଦ୍ୟମ ଚାଲିଥିବାରୁ ଶପଥ ଗ୍ରହଣ ସମାରୋହ କେବେ ହେବ ତାହା ତୁରନ୍ତ ଜଣା ପଡିନାହିଁ।
ଏହା ପୂର୍ବରୁ ଦେଓବା ୨୦୧୭ ଜୁନରୁ ୨୦୧୮ ଫେବୃଆରୀ, ୨୦୦୪ ଜୁନରୁ ୨୦୦୫ ଫେବୃଆରୀ, ୨୦୦୧ ଜୁଲାଇରୁ ୨୦୦୨ ଅକ୍ଟୋବର ଏବଂ ୧୯୯୫ ସେପ୍ଟେମ୍ବରରୁ ୧୯୯୭ ମାର୍ଚ୍ଚ ପର୍ଯ୍ୟନ୍ତ ଚାରିଥର ନେପାଳର ପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ସେଠାକାର ସାମ୍ବିଧାନିକ ବ୍ୟବସ୍ଥା ଅନୁଯାୟୀ ପ୍ରଧାନମନ୍ତ୍ରୀ ଭାବରେ ନିଯୁକ୍ତ ହେବାର ୩୦ ଦିନ ମଧ୍ୟରେ ଦେଓବାଙ୍କୁ ବିଶ୍ୱାସ ମତ ହାସଲ କରିବାକୁ ପଡିବ।
ସୋମବାର ଦିନ ସୁପ୍ରିମକୋର୍ଟ ପ୍ରଧାନମନ୍ତ୍ରୀ ଓଲିଙ୍କ ପ୍ରତିନିଧି ସଭା ଭଙ୍ଗ ନିଷ୍ପତ୍ତିକୁ ରଦ୍ଦ କରି ଦେଓବାଙ୍କୁ ପ୍ରଧାନମନ୍ତ୍ରୀ ଭାବରେ ନିଯୁକ୍ତ କରିବାକୁ ନିର୍ଦ୍ଦେଶ ଦେଇଥିଲେ। ପ୍ରଧାନ ବିଚାରପତି ଚୋଲେନ୍ଦ୍ର ସମଷେର ରାଣାଙ୍କ ନେତୃତ୍ୱରେ ପାଞ୍ଚ ସଦସ୍ୟ ବିଶିଷ୍ଟ ସାମ୍ବିଧାନିକ ଖଣ୍ଡପୀଠ କହିଥିଲେ ଯେ ପ୍ରଧାନମନ୍ତ୍ରୀ ପଦ ପାଇଁ ଅଲିଙ୍କ ଦାବି ଅସାମ୍ବିଧାନିକ।
Comments are closed.