ଆଇପିଏଲ୍‌ରୁ ସାକିବ୍‌ଙ୍କୁ ସ୍ବଦେଶ ଡକରା

ଢାକା : ବିଶ୍ବକପ୍ ଲାଗି ପ୍ରସ୍ତୁତହେବା ପାଇଁ ତାରକା ଅଲ୍‌ରାଉଣ୍ଡର ସାକିବ୍ ଅଲ୍‌ ହାସନ୍‌ଙ୍କୁ ଆଇପିଏଲ୍ ଛାଡ଼ି ସ୍ବଦେଶ ଫେରିଆସିବା ଲାଗି ବାଂଲାଦେଶ କ୍ରିକେଟ ବୋର୍ଡ ନିର୍ଦେଶ ଦେଇଛି। ଆସନ୍ତା ସପ୍ତାହରେ ଢାକାରେ ବାଂଲାଦେଶ କ୍ରିକେଟ ଦଳର ଶିବିର ଆରମ୍ଭହେବ। ଏହି ଶିବିରରେ ଯୋଗଦେବା ଲାଗି ସାକିବ୍‌ଙ୍କୁ ତାଙ୍କ କ୍ରିକେଟ ବୋର୍ଡ ନିର୍ଦେଶ ଦେଇଛି। ସାକିବ୍ ଚଳିତ ଆଇପିଏଲ୍‌ରେ ସନ୍‌ରାଇଜର୍ସ ହାଇଦରାବାଦ ପାଇଁ ଖେଳୁଛନ୍ତି। ଚଳିତ ସିଜିନ୍‌ରେ ସାକିବ୍‌ଙ୍କୁ ମାତ୍ର ଗୋଟିଏ ମ୍ୟାଚ୍ ଖେଳିବାର ସୁଯୋଗ ମିଳିଛି। ତାଙ୍କ ପୂର୍ବତନ ଫ୍ରାଞ୍ଚାଇଜି କଲକାତା ନାଇଟ ରାଇଡର୍ସ (କେକେଆର୍) ବିପକ୍ଷରେ ଏହି ମ୍ୟାଚ୍ ଖେଳି ସାକିବ୍ ୪୨ ରନ୍‌ଦେଇ ଗୋଟିଏ ୱିକେଟ ନେଇଥିଲେ। ଗତ ଜାନୁୟାରୀରେ ବାଂଲାଦେଶ ପ୍ରିମିୟର ଲିଗ୍ ଖେଳୁଥିବା ବେଳେ ଆହତ ହେବା ପରଠାରୁ ଏହା ସାକିବ୍‌ଙ୍କ ପ୍ରଥମ ମ୍ୟାଚ୍ ଥିଲା। ଆଇପିଏଲ୍‌ରେ ତାଙ୍କୁ ନିୟମିତ ମ୍ୟାଚ୍ ଖେଳିବାକୁ ନ ମିଳିବାରୁ ନିକଟରେ ସାକିବ୍ ତାଙ୍କ ବ୍ୟକ୍ତିଗତ ପ୍ରଶିକ୍ଷକ ମହମ୍ମଦ ସଲାହୁଦ୍ଦିନ୍‌ଙ୍କୁ ଭାରତ ଡାକି ବିଶ୍ବକପ୍ ଲାଗି ପ୍ରସ୍ତୁତ ହେଉଛନ୍ତି। ବାଂଲାଦେଶ ଆୟରଲାଣ୍ଡରେ ମେ’ ୫ରୁ ୧୭ ପର୍ଯ୍ୟନ୍ତ ତ୍ରିରାଷ୍ଟ୍ରୀୟ ଟୁର୍ଣ୍ଣାମେଣ୍ଟ ଖେଳିବ।

Comments
Loading...