ଭୁବନେଶ୍ବର : ଓଡ଼ିଶା ମନ୍ଦିର ସେବାୟତ ସଂଘ ତରଫରୁ ଶୁକ୍ରବାର ଦିନ ଭୁବନେଶ୍ଵର ରାମମନ୍ଦିର ଠାରେ ପ୍ରତିବାଦ ସଭା ଆୟୋଜିତ ହୋଇଯାଇଛି। ୫ ଦଫା ଦାବି ନେଇ ଆୟୋଜନ ଏହି ସଭାରେ ରାମ ମନ୍ଦିର ସେବାୟତ, ଯାଜପୁର ବିରଜା ମନ୍ଦିର ସେବାୟତ, ସାକ୍ଷୀଗୋପାଳ ମନ୍ଦିର ସେବାୟତ, ଦାଣ୍ଡ ମୁକୁନ୍ଦ ପୁର ମନ୍ଦିର ସେବାୟତ, ବାରିପଦା ଜଗନ୍ନାଥ ମନ୍ଦିରର ସେବାୟତ, ବ୍ରହ୍ମଗିରି ଆଲାର୍ ନାଥ ମନ୍ଦିର ସେବାୟତ, କୋଳାଥିଆ ଜଗନ୍ନାଥ ମନ୍ଦିର, ଆଇଗିଣିଆ ହନୁମାନ ମନ୍ଦିର, କାକଟପୁରର ମଙ୍ଗଳା ମନ୍ଦିର, ସିରୁଲି ମହାବୀର ମନ୍ଦିର, ଧବଳେଶ୍ବର ମନ୍ଦିର ସେବାୟତ, ଝଙ୍କଡ ସାରଳା ମନ୍ଦିର ସେବାୟତଙ୍କ ସହିତ ଓଡ଼ିଶାର ଅନ୍ୟାନ୍ୟ ପ୍ରତିଷ୍ଠିତ ମନ୍ଦିରର ସେବାୟତ ମାନେ ଯୋଗଦାନ କରି ରାମ ମନ୍ଦିର ସମ୍ମୁଖରେ ଘଣ୍ଟ ବାଦନ, ବେଦ ପାଠ ଓ ଶଙ୍ଖ ନାଦ କରି ପ୍ରତିବାଦ କରିଥିଲେ।
ଭକ୍ତଙ୍କ ପାଇଁ ମନ୍ଦିର ଖୋଲା ଯାଉ,ସେବାୟତଙ୍କୁ ସହାୟତା ପ୍ରଦାନ, ସେବାୟତଙ୍କୁ ପରିଚୟ ପତ୍ର ପ୍ରଦାନ,ସେବାୟତଙ୍କ ପାର୍ଇ ଭତ୍ତା ବ୍ୟବସ୍ଥା ଓ ସେବାୟତ ମାନଙ୍କୁ ବୀମା ଭୁକ୍ତ କରାଯିବା ଆଦି ସେବାୟତଙ୍କ ମୁଖ୍ୟ ଦାବି ଥିଲା।
ସେବାୟତମାନେ ଏହି ଦାବି ନେଇ ଆଜି ଦିନଯାକ ଆନ୍ଦୋଳନ କରିବାକୁ ଓହ୍ଲାଇଥିବା ବେଳେ ଭୁବନେଶ୍ୱର ପୁଲିସ ପ୍ରଶାସନ ତରଫରୁ ଆନ୍ଦୋଳନକୁ ସ୍ଥଗିତ କରିବାକୁ ବାରମ୍ବାର ଅନୁରୋଧ କରାଯାଇଥିଲା। ସେବାୟତ ସଂଘ ସହିତ ବିଭିନ୍ନ ଅସୁବିଧା ବିଷୟରେ ଆଲୋଚନା କରି ଖୁବ୍ ଶୀଘ୍ର ସଂଘର ପ୍ରଶାସନ ସହିତ ଆଲୋଚନା କରାଇଦେବା ପାଇଁ ପ୍ରତିଶ୍ରୁତି ଦେବା ପରେ ଆନ୍ଦୋଳନକୁ ଆଜି ପାଇଁ ସ୍ଥଗିତ ରଖାଯାଇଛି।
Comments are closed.