ବରିଷ୍ଠ ନାଗରିକଙ୍କର ଚିତ୍ତବିନୋଦନ ସମାବେଶ

ଆଠଗଡ: ଆଠଗଡ ଉପଖଣ୍ଡ ସମେତ କଟକ ଜିଲ୍ଲା ଓ ଅନ୍ୟ ଜିଲ୍ଲାର ବରିଷ୍ଠ ନାଗରିକମାନଙ୍କୁ ଏକାଠି ଗୋଟିଏ ସ୍ଥାନରେ ଓ ଗୋଟିଏ ମଞ୍ଚରେ ଏକତ୍ରିତ କରି ସେମାନଙ୍କ ଚିତ୍ତବିନୋଦନ ପାଇଁ ପ୍ରୟାସ କରିଛନ୍ତି ଆଠଗଡର ଜଣେ ଯୁବ ସମାଜସେବୀ। ସନ୍ତାନସନ୍ତତିଙ୍କ ଅନୁପସ୍ଥିରେ ପରିଣତ ବୟସରେ ବିରହ ଜୀବନ ବିତାଉଥିବା ବରିଷ୍ଠ ନାଗରିକଙ୍କ ମୁଁହରେ ଟିକେ ହସ ଫୁଟାଇବା ପାଇଁ ଆଠଗଡ ଅଞ୍ଚଳର ଯୁବ ସମାଜସେବୀ ବିଜୟ କୁମାର ସାହୁ ଗତ ୭ବର୍ଷ ଧରି ଏହିପରି ସମାବେଶ ମାଧ୍ୟମରେ ଉଦ୍ୟମ ଚଳାଇ ଆସିଛନ୍ତି। ବୁଧବାର ସ୍ଥାନୀୟ ଜଗେଇ ମିଶ୍ର ତଇଲାରେ ଅନୁଷ୍ଠିତ ଏହି ବରିଷ୍ଠ ନାଗରିକଙ୍କ ସମାବେଶ ଅବସରରେ ସର୍ବାଧିକ ୧୦୪ବର୍ଷ ବୟସ୍କ ବରିଷ୍ଠ ନାଗରିକ ଭ୍ରମରବର ସାହାଣିଙ୍କୁ ଏହି ଅବସରରେ ପୁଷ୍ପଗୁଚ୍ଛ, ମାନପତ୍ର ଓ ଶୀତବସ୍ତ୍ର ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଥିଲା।

ଏହି ବରିଷ୍ଠ ନାଗରିକ ସମାବେଶରେ ଅନ୍ୟତମ ବରିଷ୍ଠ ନାଗରିକ ଗୁଣନିଧି ତ୍ରିପାଠୀ ସଭାପତିତ୍ୱ କରିଥିବାବେଳେ ନିର୍ମଳ ପଟ୍ଟନାୟକ, ଇଂ ଶିବପ୍ରସାଦ ପଣ୍ଡା, ପରମାନନ୍ଦ ସାମଲ, ଯୋଗେନ୍ଦ୍ର ସାହାଣୀ, ମଙ୍ଗୁଳି ବେହେରା, ଧରଣୀଧର ପ୍ରଧାନ ଓ ବ୍ରହ୍ମାନନ୍ଦ ସାହୁଙ୍କ ସମେତ ଅନ୍ୟମାନେ ବକ୍ତବ୍ୟ ରଖି ସେମାନଙ୍କ ଜୀବନର ଅନୁଭୁତି ସମ୍ପର୍କରେ ଆଲୋକପାତ କରିଥିଲେ। ବରିଷ୍ଠ ନାଗରିକମାନେ ନିଜ ନିଜ ମଧ୍ୟରେ ଏବଂ ଆୟୋଜକଙ୍କ ସହିତ ଭାବର ଆଦାନପ୍ରଦାନ କରିବା ସହ ସେମାନଙ୍କର ଭଲମନ୍ଦ ବିଷୟରେ ଆଲୋଚନା କରିଥିଲେ। ଆୟୋଜକଙ୍କ ପକ୍ଷରୁ ସେମାନଙ୍କୁ ଗୋଲାପ ଫୁଲ ପ୍ରଦାନ କରିବା ସହ ଖାଦ୍ୟପେୟରେ ଆପ୍ୟାୟିତ କରି ସେମାନଙ୍କର ବ୍ୟକ୍ତିଗତ ସମସ୍ୟା ସଂପର୍କରେ ଆଲୋଚନା କରିଥିଲେ। ବିଜୟଙ୍କର ଏଭଳି ମହନୀୟ ପ୍ରୟାସକୁ ବରିଷ୍ଠ ନାଗରିକମାନେ ଉଚ୍ଚ ପ୍ରଶଂସା କରିବା ସହ ତାଙ୍କୁ କୃତଜ୍ଞତା ଜଣାଇଥିଲେ। ଏହି କାର୍ଯ୍ୟକ୍ରମ ପରିଚାଳନାରେ ସଂଜୟ ରଥ, ପ୍ରମୋଦ ପାତ୍ର, ଏକାଦଶୀ ସେଠୀ, ବିଜୟ ନାୟକ, ବାବି ଗୋପାଳ ପଟ୍ଟନାୟକ, ଲଲାଟେନ୍ଦୁ ସେନାପତି ପ୍ରମୁଖ ସହଯୋଗ କରିଥିଲେ।

Comments
Loading...